Ермаловіч сыходзіць з адміністрацыі Лукашэнкі
Максім Ермаловіч будзе працаваць у Еўразійскай эканамічнай камісіі. Цяпер ён займае пасаду намесніка кіраўніка адміністрацыі Лукашэнкі.
27.12.2023 / 12:08
Вышэйшая Еўразійская эканамічная рада зацвердзіла новы склад Калегіі ЕЭК, які пачне працу 1 лютага 2024 года пад казахстанскім старшынствам. Замест 73-гадовага Міхаіла Мясніковіча камісію ўзначаліць Бакытжан Сагінтаеў.
Максім Ермаловіч будзе міністрам па канкурэнцыі і антыманапольным рэгуляванні ЕЭК, заўважыў reform.by. Нагадаем, Ермаловіч быў міністрам фінансаў ва ўрадзе Сяргея Румаса. Потым яго накіравалі паслом у Вялікабрытанію. У жніўні 2022 года Ермаловіч стаў намеснікам кіраўніка адміністрацыі Лукашэнкі.
Другім прадстаўніком Беларусі стане старшыня Дзяржстандарта Валянцін Татарыцкі. Ён будзе міністрам па тэхнічным рэгуляванні.