Kali samalot u aeraporcie Tokia zahareŭsia, 367 pasažyraŭ mieli niekalki chvilin, kab vyratavacca. Voś jak jany heta zrabili
Pra toje, što adbyvałasia na borcie samalota japonskich avijalinij, raspavioŭ adzin z pasažyraŭ.
04.01.2024 / 12:56
Pałajučy Airbus A350-900. Skryn videa BBCNews
/ YouTube
2 studzienia hetaha hoda ŭvieś śviet ablacieli kadry, na jakich vidać, jak samalot japonskaj avijakampanii Japan Airlines zahareŭsia na ŭźlotna-pasadačnaj pałasie takijskaha aeraporta Chaneda. Na jaho borcie znachodzilisia 367 pasažyraŭ. Samalot lacieŭ pa adnym z samych ažyŭlenych pavietranych maršrutaŭ u śviecie, ad Sapara na poŭnačy Japonii da Tokia.
Mnohija z pasažyraŭ viartalisia ŭ stalicu paśla naviedvańnia rodnych padčas navahodnich śviat, niekatoryja — z adpačynku. Siarod apošnich — 28-hadovy Džozef Chajasi (Joseph Hayashi), jaki kataŭsia na łyžach na poŭnačy krainy. Mienavita jon raspavioŭ The Wall Street Journal, što adbyvałasia na borcie.
Pa słovach Chajasi, samalot paśpiachova pryziamliŭsia. Jon čuŭ, jak šasi kranulisia ziamli. «A potym litaralna ŭ nastupny momant adbyłosia sutyknieńnie, i ŭsie pačuli mocny hrukat».
Jak viadoma, samalot Japan Airlines sutyknuŭsia z samalotam bierahavoj achovy, jaki znachodziŭsia na toj ža ŭźlotna-pasadačnaj pałasie i byŭ nahružany praduktami charčavańnia, vadoj dy inšymi rečami dla akazańnia dapamohi rehijonu na ŭźbiarežžy Japonskaha mora, jaki paciarpieŭ ad ziemlatrusu napiaredadni.
Jak paźniej raspavioŭ na bryfinhu pradstaŭnik ministerstva transpartu, niama nijakich zapisaŭ ab tym, što samalot bierahavoj achovy atrymaŭ dazvoł na ŭvachod na ŭźlotna-pasadačnuju pałasu. Dyśpietčary dazvolili jamu pačakać u punkcie ŭtrymańnia kala hetaj pałasy za dźvie chviliny da sutyknieńnia.
Paśla sutyknieńnia samalot bierahavoj achovy ŭzarvaŭsia. Zahinuła piać čałaviek z šaści, što ŭ im znachodzilisia. Vyžyŭ kapitan samalota, jaki paźniej paviedamiŭ, što vyvieŭ samalot na pałasu paśla atrymańnia dazvołu ad bierahavoj achovy. Ale ich pradstaŭnik zajaviŭ, što jany nie mohuć znajści zapisu takoj razmovy.
Pažar na samalocie pačaŭsia ŭ 17:47. Ale hareła, što vielmi važna, pakul tolki zvonku. Tamu byŭ čas na evakuacyju.
U chodzie vyprabavańniaŭ vytvorcy samalotaŭ pavinny prademanstravać, što jany mohuć evakujavać samalot za 90 siekund. Ale ŭ realnych situacyjach šmat što moža pajści nie tak. Na evakuacyju ŭsich pasažyraŭ samalota Japan Airlines syšło 18 chvilin.
Jak piša vydańnie, Chajasi padličyŭ, što dla adkryćcia dźviarej spatrebiłasia kala troch-piaci chvilin. Jak zajaviła Japan Airlines, ściuardesam nieabchodna było atrymać paćvierdžańnie piłota ab tym, što samalot poŭnaściu spyniŭsia, i pravieryć, ci biaśpiečnaj budzie evakuacyja.
Dla evakuacyi byli vykarystany tolki try žałaby z vaśmi. Bo za astatnimi dźviaryma hareŭ ahoń, i było b niebiaśpiečna ich adčyniać. Paśla kamunikacyi ź piłotam ściuardesy adkryli dźvie piarednija dźviery. Trecija dźviery ŭ levaj tylnaj častcy ściuardesa adčyniła biez dazvołu piłota, bo dazvoł niemahčyma było atrymać praz pałomku sistemy suviazi.
Na borcie nie pracavała sistema apaviaščeńnia, tamu niekatoryja ściuardesy vykarystoŭvali miehafony ci prosta kryčali.
Schiema samalota. Koleram pakazany evakuacyjnyja žałaby, jakija vykarystoŭvalisia. Hrafika: Andrew Mollica / The Wall Street Journal
«Pasažyry kryčali na ściuardes, kab tyja adčynili dźviery. Pačałasia šturchanina. Ja ŭpieršyniu ŭbačyŭ, jak japoncy pichajuć adno adnaho. Niekatoryja sprabavali zabrać svaje rečy, i takim čynam zatrymlivali astatnich», — dzielicca ŭspaminami Chajasi.
Pa słovach avijakampanii, ściuardesy skazali ludziam pakinuć svaje rečy i źniać abutak, jaki maje vostryja abcasy, kab nie paškodzić evakuacyjnych žałaboŭ.
Pa słovach Chajasi, jon dziejničaŭ zhodna z paradami svajoj susiedki, jakaja, miarkujučy z usiaho, viedała, jak siabie pavodzić u nadzvyčajnaj situacyi. U momant pieršapačatkovaha ŭdaru jana kryknuła: «Apuści hałavu, pryšpili remień biaśpieki, zastavajsia na svaim miescy».
Evakuacyja pasažyraŭ. Skryn videa Firstpost / YouTube
Chajasi zhadvaje, što jon sa svajoj susiedkaj zastavaŭsia niekatory čas na miescy. Ale zatym ahoń zvonku pačaŭ padymacca. Jon pahladzieŭ na damu i skazaŭ, što, mahčyma, pryjšoŭ čas pakinuć samalot. Jana pahadziłasia.
«Ja padniaŭsia. Nadzieŭ palito i pabieh napierad», — raspaviadaje japoniec. Mužčyna pakinuŭ samalot i adbieh u biaśpiečnaje miesca, adkul naziraŭ na praciahu nastupnych 10 chvilin, jak astatnija ludzi evakujavalisia praź piarednija vychady.
Pa słovach mužčyny, jon i inšyja pasažyry bačyli jašče adzin samalot, achopleny ahniom, ale nie razumieli, u čym pryčyna. Tolki paźniej, znachodziačysia ŭ terminale, jany daviedalisia, što piać čałaviek z taho samalota zahinuli.
Pa słovach Japan Airlines, evakuacyja skončyłasia ŭ 18:05. Usie byli ŭ biaśpiecy. A praź niekalki chvilin samalot achapiła ahniom i jon byŭ całkam źniščany.
Čytajcie jašče:
Prezident Arhienciny palacieŭ zvyčajnym samalotam. I heta samalot «Biełavija»