Dyrektara biełaruskaha sanatoryja ŭ Druskienikach pazbavili litoŭskaha DNŽ
Dazvoł na žycharstva ŭ Litvie dla dyrektara sanatoryja «Biełaruś» u Druskienikach Ilji Jepifanava anulavany, paviedamiŭ partał 15min.lt.
04.01.2024 / 22:23
Kałaž: 15min.lt
Ilja Jepifanaŭ pierad katalickimi Kaladami viartaŭsia ŭ Litvu, ale nie zmoh ujechać u krainu.
«Hramadzianin Biełarusi Ilja Jepifanaŭ, jaki pracuje dyrektaram sanatoryja «Biełaruś», pazbaŭleny dazvołu na žycharstva ŭ Litvie, tamu jaho nie ŭpuścili ŭ krainu», — napisaŭ partał.
Pradstaŭnik Departamienta mihracyi pry MUS Litvy Rokas Pukinskas paviedamiŭ vydańniu, što vid na žycharstva Jepifanava anulavany pa toj pryčynie, što jon moža ŭjaŭlać pahrozu nacyjanalnaj biaśpiecy.
Sanatoryj «Biełaruś» u litoŭskich Druskienikach naležyć biełarusam jašče z savieckich časoŭ, vałodańnie im paśla raspadu SSSR było aformlena dvuchbakovymi damoŭlenaściami. Sa śniežnia 2020 hoda sanatoryj znachodzicca pad sankcyjami. Na toj momant jon uvachodziŭ va Kiraŭnictva spravami Łukašenki, ale letam 2021 hoda jaho pieradali ŭ padparadkavańnie Respublikanskamu centru pa azdaraŭleńni i sanatorna-kurortnym lačeńni nasielnictva. Spačatku zabłakavanyja rachunki sanatoryja byli razbłakavanyja, ale jon usio adno sutykajecca ŭ svajoj pracy ź ciažkaściami.
Čytajcie taksama:
U Druskienikach hareŭ sanatoryj «Biełaruś»
Byłoha hałoŭnaha lekara biełaruskich sanatoryjaŭ u Druskienikach i Sočy buduć sudzić za «špijanaž»
Sanatoryj «Biełaruś» u Litvie znoŭ pracuje. Ale biełarusy tam adpačyvać pakul nie mohuć