U KNDR zajavili, što ich vojska ŭžo «źniało zaścierahalnik»
Uzbrojenyja siły KNDR užo «źniali zaścierahalnik», lubaja pamyłka z boku paŭdniovakarejskich vajskoŭcaŭ moža pastavić pad pahrozu Sieuł. Pra heta zajaviła siastra lidara KNDR Kim Jo Čžon, piša Centralnaje telehrafnaje ahienctva Karei.
07.01.2024 / 12:45
Kim Jo Čžon. Fota: kcna.kp
«Patłumaču jašče raz: naša armija ŭžo źniała zaścierahalnik sa spuskavoha kručka. U vypadku niaznačnaj pravakacyi našy vojski nieadkładna projduć [bajavoje] chryščeńnie ahniom», — skazała Kim Jo Čžon.
Jana taksama śćviardžaje, što 6 studzienia KNDR nie vypuściła nivodnaha snarada ŭ bok Žoŭtaha mora, vajskoŭcy Respubliki Kareja byli ŭviedzieny ŭ zman z dapamohaj uzryŭčatki, jakaja imitavała huł artyleryjskich harmat. Kamitet načalnikaŭ štaboŭ US Respubliki Kareja napiaredadni zajaviŭ, što KNDR vypuściła 60 snaradaŭ i što jany ŭpali ŭ akvatoryi na poŭnač ad Paŭnočnaj raźmiežavalnaj linii, jakuju ŭ Sieule ličać faktyčnaj marskoj miažoj.
«Mnie vielmi škada nasielnictva Respubliki Kareja, jakoje vymušana davieryć «biaśpieku» hetym prafanam i addavać im vializnyja hrošy z padatkaŭ», — skazała Kim Jo Čžon.
Jana vystupiła z pahrozaju, što Sieuł, dzie pražyvaje bolš za 10 młn čałaviek, padvierhniecca niebiaśpiecy, kali ŭ vyniku «pamyłak i zdahadak nievuckich hałavarezaŭ», jak zajaviła jana, zdarycca incydent.
Kim Jo Čžon u prapahandysckim styli paŭtaryła, što «pamyłki, niapravilnyja acenki i ŭpartaść» «vykličuć niepapraŭnyja niaščaści».
Čytajcie taksama:
Rakieta, jakoj RF udaryła pa Charkavie, mahła być z KNDR
Paŭdniovakarejskaja raźviedka: Kim Čen Yn haduje z 10-hadovaj dački pierajemnicu
U Paŭdniovaj Karei evakujujuć ceły vostraŭ z-za masiravanaha abstrełu z boku KNDR