«U SSSR pačali, a tut praciahnuli». Vierniki z roznych kanfiesij Biełarusi vykazalisia nakont novaha zakona ab relihii
Pradstaŭniki pratestantaŭ, musulman i marmonaŭ u Biełarusi prakamientavali niadaŭna padpisany Łukašenkam zakon, jaki pahražaje isnavańniu mnohich relihijnych arhanizacyj u krainie. Reakcyju viernikaŭ pryvodzić narviežskaje ahienctva Forum 18.
13.01.2024 / 19:24
Likvidavanaja sudom i razburanaja pratestanckaja carkva «Novaje žyćcio». Fota: gospel.by
Narviežskaje ahienctva za svabodu vieravyznańnia Forum 18 (nazvanaje ŭ honar adpaviednaha artykuła Usieahulnaj dekłaracyi pravoŭ čałavieka AAN) uziała kamientary ŭ čalcoŭ niekalkich kanfiesij Biełarusi nakont novaha zakona ab abaviazkovaj pierarehistracyi relihijnych abjadnańniaŭ.
«My hladzim na novy zakon z aściarožnaściu. Heta nie abiacaje ničoha dobraha, bo farmuloŭka ŭ niekatorych častkach zakona niezrazumiełaja. Biaskonca pašyrajecca śpis pryčyn, pa jakich dziaržava moža likvidavać relihijnyja supołki i, pry žadańni, jany mohuć być užytyja suprać čaho zaŭhodna», — zajaviŭ ahienctvu Forum 18 pratestancki pastar ź Biełarusi, jaki pažadaŭ zastacca ananimnym.
Zaniepakojenyja novym zakonam i ŭ carkvie biełaruskich marmonaŭ, asabliva ŭ častcy raskryćcia asabistych źviestak viernikaŭ.
«Niekatoryja z našych viernikaŭ mohuć adčuvać siabie niajomka z-za nieabchodnaści raskryvać svaje asabistyja danyja padčas pierarehistracyi. Čalcy našych supołak u asnoŭnym arandujuć budynki dla sustreč i malitvaŭ, ale jość i tyja, u kaho niama takoj mahčymaści, i tamu jany vymušanyja sustrakacca ŭ anłajnie», — raskazaŭ ahienctvu adzin z čalcoŭ minskaj supołki marmonaŭ.
U toj ža čas siarod musulman raspaŭsiudžvajecca strach praz mahčymaje zakryćcio Musulmanskaha relihijnaha abjadnańnia ŭ Biełarusi «z-za ryzyki nieprachodžańnia pierarehistracyi mnohimi jaho supołkami».
Usia sprava ŭ adnym z kryteryjaŭ novaha zakona, jaki dla lehalnaha isnavańnia supołki patrabuje mieć u joj nie mienš za 20 darosłych viernikaŭ.
«Mnohija z našych supołak nie atrymajuć pierarehistracyju, bo u asnoŭnym jany znachodziacca ŭ sielskaj miascovaści, dzie nie tak šmat ludziej. Jość taksama ryzyka taho, što naša relihijnaja asacyjacyja, Muftyjat, nie budzie mieć dastatkovaj kolkaści supołak-čalcoŭ dla rehistracyi», — skazaŭ adzin ź siabraŭ Musulmanskaha relihijnaha abjadnańnia ŭ Biełarusi.
Z-za patrabavańnia mieć 20 darosłych u kožnaj supołcy niepakoicca i staršynia Sajuza jevanhielskich chryścijan baptystaŭ (JECHB) biskup Leanid Michovič, jaki, pa infarmacyi Forum 18, «vitaŭ niekalki źmien u kančatkovaj viersii zakona ŭ paraŭnańni ź jaho papiarednim prajektam».
Siarod hetych źmienaŭ była admiena patrabavańnia da relihijnych arhanizacyj davać spravazdaču pierad miascovymi vykanaŭčymi kamitetami pra relihijnaje vychavańnie dziaciej.
«Ale našym hałoŭnym kłopatam usio jašče zastajecca patrabavańnie mieć 20 darosłych dla rehistracyi relihijnaj supołki. U niekatorych vioskach u nas niama nieabchodnaj kolkaści ludziej, a zakon nie praduhledžvaje nijakaha inšaha varyjantu», — adznačyŭ Michovič u razmovie z ahienctvam Forum 18.
Jašče adzin pradstaŭnik biełaruskich baptystaŭ vykazaŭ pazicyju, što novy zakon nie źjaŭlajecca čymści niečakanym, bo heta ŭžo adbyvałasia ŭ SSSR.
«Jak skazana ŭ Biblii [Eklezijast 1:9], pad soncam niama ničoha novaha. Abaviazkovaja rehistracyja pačałasia ŭ Savieckim Sajuzie, i z tych časoŭ ničoha nie źmianiłasia. Našy supołki buduć prytrymlivacca ćviordaj pazicyi niazhody ź dziaržaŭnaj rehistracyjaj», — padkreśliŭ adzin ź biełaruskich baptystaŭ.
Ahienctva Forum 18 taksama sprabavała źviazacca i z upaŭnavažanym pa spravach relihij u Biełarusi Alaksandram Rumakam, ale ŭ jaho pryjomnaj adkazali, što čynoŭnik «nie daje intervju pa telefonie».
Darečy, zhodna z aficyjnym sajtam kancylaryi Rumaka, usiaho ŭ krainie ciapier naličvajecca 25 kanfiesij i 3590 relihijnych arhanizacyj, 173 ź jakich majuć ahulnakanfiesijnaje značeńnie (relihijnyja abjadnańni, manastyry, misii, bractvy, siastrynstvy, duchoŭnyja navučalnyja ŭstanovy), a astatnija 3417 — heta zvyčajnyja relihijnyja supołki.
- Bolšaja častka z hetych supołak naležyć pravasłaŭnym viernikam (1733), za imi pratestanty (1040), u skład jakich uvachodziać i baptysty (282).
- Śledam iduć kataliki rymskaha i hreckaha abradaŭ (sumarna 516). A kolkaść supołak musulman i marmonaŭ u Biełarusi składaje 24 i 4 adpaviedna.
- Z poŭnaj statystykaj pa usich kanfiesijach možna aznajomicca tut.
Jak my pisali raniej, asnoŭnaja vierahodnaja meta novaha zakona ab relihii — heta pratestanty. Za apošnija 30 hadoŭ jany vybilisia ŭ lidary pa kolkaści rostu prychodaŭ, a da taho ž pratestanckija vierniki razam sa svaimi pastarami časta zajmajuć niezaležnuju i pryncypovuju pazicyju, što, viadoma, nie padabajecca režymu Łukašenki.
Jak pakazaŭ niadaŭni prykład z palityčnymi partyjami, mnohija pratestanckija supołki i inšyja relihijnyja abjadnańni mohuć nie prajści pierarehistracyju i pierastać isnavać lehalna.
Svojeasablivaj «pieršaj łastaŭkaj» takoj tendencyi ŭžo stała minskaja pratestanckaja carkva «Novaje žyćcio», jakaja była likvidavanaja ŭ kastryčniku minułaha hoda. Taksama dastałosia i katalikam, dla jakich zakryli Čyrvony kaścioł «z-za dziŭnaha pažaru» ŭnutry budynka.
Akramia taho, ciaham apošnich troch hadoŭ rehularna źjaŭlajucca paviedamleńni pra zatrymańni śviataroŭ roznych kanfiesij i pastaraŭ pa ŭsioj krainie.
Čytajcie jašče pa temie relihii:
Jak ja pahavaryŭ ź milicyjanierami, jakija pryjšli mianie prafiłaktavać, pra Boha, zakon i sumleńnie
U biełaruskaj armii źjavilisia instruktary pa pracy z vajskoŭcami-viernikami
Rada BNR: RPC — hałoŭnaja pryčyna mižrelihijnaj napružanaści ŭ Biełarusi
Ad śvinarnikaŭ da śpirtzavoda: jak u BSSR vykarystoŭvali začynienyja cerkvy
«Možna prosta piačy bułki». Vysokapastaŭleny vykanaŭca represij uvieravaŭ u Boha i syšoŭ ź milicyi