Rakieta chusitaŭ trapiła ŭ tankier z rasijskimi naftapraduktami. Jon zahareŭsia
Bloomberg nazyvaje hetuju ataku na vychadzie z Čyrvonaha mora na tankier samym maštabnym napadam jemienskich chusitaŭ na naftanaliŭnoje sudna.
27.01.2024 / 08:25
Ilustracyjnaje fota. Fota: Kaitlin Watt / U.S. Navy via AP
U tankier Marlin Luanda ŭ Adenskim zalivie trapiła rakieta. Jemienski ruch chusitaŭ zajaviŭ, što heta jany abstralali sudna. Apieratar tankiera paviedamiŭ, što ŭ vyniku na im uźnik pažar, piša Bi-bi-si.
Brytanskaja kampanija-apieratar tankiera Trafigura paviedamiła, što ŭ vyniku traplańnia rakiety pačaŭsia pažar u adnym z hruzavych adsiekaŭ sudna i dla jaho łakalizacyi było vykarystana supraćpažarnaje abstalavańnie.
Bloomberg nazyvaje hetuju ataku na vychadzie z Čyrvonaha mora na tankier, jaki pieravoziŭ rasijskaje paliva, samym maštabnym napadam jemienskich chusitaŭ na naftanaliŭnoje sudna.
Ahienctvu Reuters u Trafigura paviedamili, što tankier pieravoziŭ lihrain — naftu, sumieś ciažkich vuhlevadarodaŭ, ciažejšuju za bienzin — rasijskaha pachodžańnia.
Hety hruz byŭ nabyty pa canie tańniejšaj za stol, ustanoŭlenuju zachodnimi krainami amal hod tamu, adznačyŭ pradstaŭnik apieratara.
Stol, adna z formaŭ sankcyj za ahresiju suprać Ukrainy, maje roznyja ŭzroŭni dla roznych katehoryj nafty i naftapraduktaŭ, ale Rasii ŭdajecca ekspartavać značnuju častku vyrablenaha pa bolš vysokich koštach u abychod abmiežavańniaŭ.
Tankier Marlin Luanda chodzić pad ściaham Maršałavych vyspaŭ. Aficyjnyja asoby ZŠA paviedamili CBS, što ŭ jaho trapiła supraćkarabielnaja balistyčnaja rakieta.
Paviedamleńniaŭ ab paciarpiełych nie pastupała, a dapamohu akazvaŭ karabiel VMS ZŠA, zajaviła Centralnaje kamandavańnie ZŠA (CENTCOM).
Prykładna praz vosiem hadzin amierykanskija vajskoŭcy źniščyli supraćkarabielnuju rakietu chusitaŭ, jakaja była nacelenaja na Čyrvonaje mora i była hatovaja da zapusku, paviedamiła taksama kamandavańnie.
Słužba UKMTO, jakaja arhanizuje abmien infarmacyjaj pamiž brytanskim vajenna-marskim fłotam i handlovymi sudami ŭ rehijonie, udakładniła, što incydent adbyŭsia za 60 marskich milaŭ na paŭdniovy ŭschod ad Adena.
UKMTO papiaredziła inšyja sudny, kab jany išli z aściarožnaściu i paviedamlali ab luboj padazronaj dziejnaści.
Kampanija Trafigura paćvierdziła, što sudna paškodžana i vajennyja karabli nakiravalisia da jaho dla akazańnia dapamohi.
Vajskovy pradstaŭnik chusitaŭ Jacha Sareja zajaviŭ, što hrupoŭka ŭžyła «niekalki adpaviednych vajskova-marskich rakiet», a traplańnie ŭ tankier było pramoje.
Chusity, jakija dziejničajuć u sajuzie ź Iranam i pry jaho padtrymcy, śćviardžajuć, što sprabujuć dapamahčy CHAMAS u Hazie. Spačatku jany zajaŭlali, što napadajuć tolki na sudny, jakija majuć niejkuju suviaź ź Izrailem, choć takaja suviaź prasočvałasia daloka nie zaŭsiody.
11 studzienia ZŠA i Vialikabrytanija nanieśli pieršyja ŭdary pa abjektach chusitaŭ, paśla čaho tyja zajavili, što z hetaha času buduć atakavać i suda, źviazanyja i z hetymi krainami taksama.
Abstreły nie spynilisia, niahledziačy na niekalki sieryj nastupnych udaraŭ pa Jemienie, i mnohija sudny, jakija kursujuć pamiž Jeŭropaj i Azijaj, pačali abychodzić hety rajon i prytrymlivacca bolš doŭhaha šlachu vakoł Afryki, što pryvodzić taksama da bolšaha koštu pieravozak.
Čytajcie taksama:
ZŠA i Brytanija nanieśli ŭdar pa Jemienie