Biełaruskija pamiežniki zaŭvažyli mihranckuju prablemu na miažy
Na staroncy ŭ fejsbuku Smarhonskaj pamiežnaj hrupy źjaviłasia paviedamleńnie, jakim miascovyja žychary zaklikajucca paviedamlać pamiežnikam pra sustrečy ź mihrantami z uschodnich i paŭdniovych krain.
01.02.2024 / 17:39
«U ciapierašni čas pačaścilisia vypadki źjaŭleńnia pablizu dziaržaŭnaj miažy Respubliki Biełaruś hramadzian afra-azijackaha i kaŭkazskaha rehijonu, Blizkaha Uschodu, jakija čaściakom majuć na mecie naŭmysnaje parušeńnie miažy. Akramia taho, takija hramadzianie ździajśniajuć kradziažy i padpały ŭ prymiežnych nasielenych punktach», — bjuć tryvohu pamiežniki.
U suviazi z hetym Smarhonskaja pamiežnaja hrupa zaklikaje miascovych žycharoŭ «być maksimalna pilnymi i paviedamlać pra znachodžańnie nieviadomych asob u pamiežnaj zonie».
Taksama pamiežnikaŭ cikaviać «nieviadomyja asoby słavianskaj źniešnaści, jakija cikaviacca prachodžańniem miažy, a taksama miescami dysłakacyi pahraničnikaŭ i supracoŭnikaŭ MUS». Pra ich taksama prosiać paviedamlać.
Varta adznačyć, što prablema masavaj mihracyi vychadcaŭ z azijackich i afrykanskich krain praź miažu Biełarusi ź Jeŭrasajuza źjaviłasia nie siońnia, jana nabyła vostry charaktar jašče ŭ 2021 hodzie, kali režym Łukašenki sprabavaŭ praz pravakavańnie mihranckaha kryzisu šantažavać krainy ES i vymusić ich rabić jamu palityčnyja sastupki. Paśla ćviordaj i rašučaj reakcyi na heta z boku ŭładaŭ sumiežnych Polščy, Litvy i Łatvii vastrynia kryzisu da kanca 2021 hoda spała, ale i ŭ nastupnyja hady prablema mihrantaŭ nie źnikła, i ich sproby niezakonna pierajści miažu rehularna fiksujucca. Pry hetym nieadnarazova publikavalisia dokazy taho, što ŭ dastaŭcy da miažy i sprobach jaje pierachodu mihranty majuć dziejnuju padtrymku z boku łukašenkaŭskich siłavikoŭ.
Čytajcie taksama:
Mihrantka z Efiopii ciažarnaj lacieła ŭ Jeŭrasajuz, a naradziła ŭ Mahilovie
Film «Zialonaja miaža»: što chacieła pakazać Ahnieška Chołand i što atrymałasia