Kamandujučy armijaj Łatvii: Sajuźniki tut buduć chutčej, čym na krainu chtości napadzie
Leanid Kałnińš miarkuje, što achovu łatvijskaj miažy treba zabiaśpiečvać tut i ciapier i nie treba pałochać ludziej zmročnymi prahnozami.
05.02.2024 / 14:21
Kamandujučy nacyjanalnymi ŭzbrojenymi siłami (NUS) Łatvii Leanid Kałnińš nie zhodny z prahnozami zachodnich lidaraŭ i vysokapastaŭlenych pradstaŭnikoŭ NATO ab tym, što ŭ pieryjad ad troch da dziesiaci hadoŭ Rasieja napadzie na adnu z krain NATO. Pra heta jon zajaviŭ u intervju ahienctvu LETA, piša Delfi.lv.
Leanid Kałnińš. Fota: instahram Leanida Kałnińša
Sa słoŭ Kałnińša, achovu łatvijskaj miažy treba zabiaśpiečvać tut i ciapier, i nie treba pałochać ludziej takimi prahnozami. Užo z samaha pačatku Łatvija ŭ svajoj acency zamiežnapalityčnych ryzyk rasceńvała Rasiju jak pahrozu, i na hetym pabudavanaja łatvijskaja abaronnaja stratehija. NUS viadzie ŭsiu nieabchodnuju padrychtoŭčuju pracu, kab nabrać reziervy, jak materyjalnyja, tak i čałaviečyja, skazaŭ kamandujučy.
«U kožnaj krainy NATO moža być svajo mierkavańnie. Ja jak kamandujučy NUS Łatvii, krainy NATO, z takimi prahnozami nie zhodny. Usie zajavy i prahnozy ab mahčymaści vajny nakiravany na mabilizacyju zachodniaha hramadstva, jakoje pačynaje stamlacca ad padtrymki Ukrainy.
Ja chaču skazać narodu Łatvii: nie chvalujciesia, usie hetyja zajavy pryznačanyja dla taho, kab zachodnija hramadstvy pieraaryjentavalisia ad pasłableńnia paśla chałodnaj vajny da hatoŭnaści inviestavać u abaronu», — zajaviŭ Kałnińš.
Na jaho dumku, Rasija i NATO pa-roznamu hladziać na patencyjny kanflikt. «NATO hladzić na taki kanflikt z abarončaj pazicyi — my abaraniajem našy demakratyčnyja kaštoŭnaści, dziaržaŭnaść, ludziej. Rasija, niahledziačy na svaju publičnuju rytoryku, demanstruje svaje impieryjalistyčnyja, zavajavalnyja tendencyi, nakiravanyja na terytaryjalnuju ekspansiju. Darečy, Rasija davoli šmat kapijuje ŭ NATO — i našu sistemu płanavańnia, i aficyjnyja zajavy. U cełym NATO hladzić na Rasiju z abarončaj pazicyi, a Rasieja hladzić na nas z nastupalnaha punktu hledžańnia».
Taksama Kałnińš padkreśliŭ, što nielha vieryć pastajannym zajavam prezidenta Pucina pra toje, što Rasija nie choča vajavać z NATO, u jaje niama pamiežnaha kanfliktu ni z adnoj krainaj NATO i naohuł usio heta tryźnieńnie.
«My daŭno nie daviarajem tamu, što kaža Kreml. Naša sistema abarony z samaha pačatku pabudavanaja dla adbićcia rasijskaj pahrozy. Kali b my daviarali słovam rasijanaŭ, u nas užo daŭno byli b vialikija prablemy, mahčyma, navat kanviencyjanalnyja», — miarkuje jon.
«Ja chaču supakoić łatvijskaje hramadstva i skazać jasna: my zanadta šmat havorym pra mahčymaść vajny. Nasamreč situacyja nie bolš pahroźlivaja, čym dziesiać hadoŭ tamu. My zaŭsiody ŭsprymali Rasiju jak pahrozu. My nie razvažajem pra patencyjnyja kanflikty, a robim usio mahčymaje, kab vyklučyć mahčymaść vajny», — zajaviŭ Kałnińš.
Pavodle jaho słoŭ, dla palityki strymlivańnia važna, kab hramadstva adčuvała siabie ŭ biaśpiecy i padtrymlivała dziaržaŭnuju abaronnuju palityku, i tolki tady ŭzbrojenyja siły buduć mocnyja.
Čytajcie taksama:
NATA čakaje napadu Rasii praź Biełaruś užo ŭ pačatku 2025 — Bild
Prezident Litvy: Rasija choča kinuć vyklik usiamu NATO
U Minabarony Litvy prakamientavali infarmacyju Bild ab budučaj vajnie Rasii i NATA