«Ukraina budzie vymušana sieści za stoł pieramovaŭ. Kontrnastup nivodnaha z bakoŭ niemahčymy» — polski analityk
Śpiecnazaviec i viadomy vajskovy analityk Navał u intervju polskamu partału Głos24 vykazaŭ svoj pohlad na raźvićcio padziej u vajnie Rasii z Ukrainaj.
05.02.2024 / 18:48
Fota: USU
Były polski śpiecnazaviec, viadomy pad psieŭdanimam Navał (Naval), prasłužyŭ u atradzie GROM čatyrnaccać hadoŭ. Bolšuju častku hetaha pieryjadu jon pravioŭ u zamiežnych misijach u Piersidskim zalivie, Iraku i Afhanistanie. Ciapier mužčyna vystupaje jak vajskovy analityk i aŭtar knih na vajskovuju tematyku.
Pryvodzim najbolš cikavyja miescy ź jaho intervju.
Ukrainskaje kontrnastupleńnie było apraŭdanym?
Na dumku vajskovaha analityka, ukraincam treba było niešta rabić, kab zachavać bajavy duch. Kali b miedyjnaja prapahanda ź ich boku zajaviła, što kontrnastupleńnia nie čakajecca i budzie paŭza, heta było b pośpiecham dla rasijan. Choć mnohija, napeŭna, z razumieńniem uspryniali b takoje rašeńnie Ukrainy.
«Kali ruskija pačuli, što budzie mahutnaja i vialikaja adpłata, im pryjšłosia nakiravać svaje siły i resursy na ŭmacavańnie svaich pazicyj. I heta taksama namahańnie, jakoje asłablaje praciŭnika», — adznačaje analityk.
Acenka ŭkrainskaha kontrnastupleńnia
Navał adznačaje:
«Ciapier, kali my akryjali ad šoku i pryzvyčailisia da pahrozy, my ŭsprymajem kanflikt va Ukrainie jak svajho rodu hulniu, spartovaje spabornictva. My nie ŭśviedamlajem, što tam, na linii ahniu, znachodziacca ludzi, jakim davodzicca iści i zmahacca, ryzykujučy svaim žyćciom i zdaroŭjem».
Jon prapanuje pahladzieć na toje, što adbyvałasia padčas kontrnastupleńnia, hetak ža sama, jak na heta hladzieli kamandziry sa štaba USU pry płanavańni apieracyi i bajavych dziejańniaŭ. Im pryjšłosia zrabić usio, kab abmiežavać čałaviečyja straty. I heta vielmi važna.
«Dla mianie było ciažka čakać i patrabavać ad ukraincaŭ, kab jany pačali masiravany šturm rasijskich minnych paloŭ i tranšej», — kaža Navał.
Były polski śpiecnazaviec a ciapier vajskovy analityk Navał. Fota: navalpolska.pl
Ci viernie Ukraina stračanyja terytoryi?
Na dumku byłoha śpiecnazaŭca, Rasija zanadta mocnaja, zanadta vialikaja, kab jaje možna było prosta vycisnuć. Ukraincy, viadoma, majuć mocnuju padtrymku, u ich jość technałahičnyja inavacyi, ale ŭ ich značna mienš sił i resursaŭ. Jany vielmi dobra abaraniajucca, navučylisia vajavać, ale ŭ ich na hety momant niama mahčymaściaŭ vycisnuć Rasiju sa svajoj terytoryi ŭ karotkija terminy.
«Hetaja vajna, na žal, pačynaje stanavicca vajnoj na źniasileńnie. A Ukraina… Ja nie chaču skazać, što jana nie zmoža vyjhrać takuju vajnu, ale rasijanam, biezumoŭna, budzie lahčej pieražyć čas uzajemnaha źniščeńnia. U Rasii prosta značna bolšy patencyjał va ŭsich adnosinach», —
kaža Navał i padkreślivaje, što biezumoŭnym zjaŭlajecca toj fakt, što Ukraina abaraniła siabie ŭ pieršyja dni vajny i zdolnaja supraćstajać Rasii ŭ doŭhaterminovaj pierśpiektyvie.
Ukraincy mahli b zrabić niešta bolšaje?
Na dumku vajskovaha analityka, ukraincy nie mahli zrabić bolš, čym zrabili. Kali kazać pra techničnuju dapamohu z boku Zachadu, to nieabchodna razumieć, što patrebnyja śpiecyjalisty, jakija mohuć kiravać atrymanymi źniščalnikami, tankami i inšaj technikaj. A heta patrabuje praciahłaj padrychtoŭki.
Na hety čas, jak adznačaje Navał, mnohija prafiesijnyja sałdaty i śpiecyjalisty Uzbrojenych sił Ukrainy ŭžo byli zabityja abo paranienyja. Ciapier u boj iduć pryzyŭniki, jakija prajšli karotkuju, dvuch— ci trochmiesiačnuju padrychtoŭku. Jany vielmi chutka nabirajucca vopytu, ale i płaciać za jaho nievierahodna vysokuju canu.
Kudy ruchajecca ŭkrainska-rasijski kanflikt?
Navał adznačaje:
«Ja nie sumniavajusia, što Ukrainie ŭ niejki momant daviadziecca sieści za stoł pieramovaŭ. Kali niechta dumaje, što nikoli na heta nie pahodzicca, to, na žal, jon pamylajecca».
Na jaho dumku, kali zvyšdziaržavy (heta značyć ZŠA i Rasija) dabjucca svajho, šlachu nazad nie budzie. U hety momant Zachad moža prosta skazać Ukrainie sieści za stoł pieramovaŭ z Rasijaj i vieści ich, navat kali heta budzie aznačać vialikija terytaryjalnyja straty.
U vypadku niazhody ź pieramovami, prahnazuje Navał, budzie pierakryty kran zabieśpiačeńnia, Ukraina zastaniecca addadzienaja samoj sabie. I tady, mahčyma, jana nie prajhraje adrazu, ale joj budzie vielmi składana vytrymać cisk Rasii, jakaja maje značna bolšuju stratehičnuju hłybiniu.
Kali budzie padpisana pieramirje, ci mahčymaja novaja vajna
Na dumku Navała, nasielnictva Ukrainy stamiłasia ad vajny. Bolšaść hramadstva žadaje, kab vajna chutčej skončyłasia. Na toje, kab adnavicca, spatrebicca prykładna 30 hadoŭ. Za taki pieryjad, ličyć analityk, vyraście novaje pakaleńnie, jakoje nie budzie pamiatać, jak było na vajnie.
Ci varta čakać rasijskaha kontrnastupleńnia?
Na dumku Navała, siońnia pravieści efiektyŭnaje kontrnastupleńnie niemahčyma nivodnamu z bakoŭ, pakolki jano patrabuje zasiarodžvańnia bujnych sił i srodkaŭ pablizu linii frontu.
Jon tłumačyć:«Kali praciŭnik nazapašvaje svaje siły i ŭ nas jość zbroja z dalokaściu dziejańnia 100, 200, 300 km, my možam adsočvać jaho z dapamohaj spadarožnikaŭ, a značyć, chutka źniščyć jaho arsienał. Ciapier praktyčna niemahčyma prajechać 5-10 km da miažy za karotki čas i sabrać piać tysiač ludziej tak, kab chutka patrapić u zadadzienaje miesca. A chutkaść dziejańniaŭ i raptoŭnaść — asnova efiektyŭnaha nastupu.
U ciapierašni čas pierad płaniroŭščykami i štabami staić zadača ździvić praciŭnika. Heta vielmi składana, i ni toj, ni inšy bok nie zmohuć hetaha zrabić u hetaj vajnie».
Čytajcie jašče:
U Kramla praz šeść miesiacaŭ mohuć skončycca bajavyja mašyny — Forbes
Pucin pryznaŭ, što rasijskija vojski majuć na froncie prablemy z-za bieśpiłotnikaŭ
U baraćbie za inicyjatyvu ŭ vajnie Załužny robić staŭku na bieśpiłotniki