Наўседа пра закрыццё КПП на мяжы з Беларуссю: Жалезная заслона паміж Захадам і Усходам ужо апусцілася
«І верагодна, надоўга», — кажа літоўскі прэзідэнт аб планах закрыць яшчэ два кантрольна-прапускныя пункты (КПП) на мяжы з Беларуссю.
09.02.2024 / 09:41
«Яна ўжо апусцілася, яна апусцілася ўсім сваім цяжарам 24 лютага 2022 года», — сказаў Наўседа журналістам у чацвер, адказваючы на пытанне, ці з'яўляецца скарачэнне прапускной здольнасці мяжы з Беларуссю прыкметай таго, што апускаецца новая жалезная заслона, піша LRT.
Па словах прэзідэнта Літвы, нават пасля пачатку вайны некаторыя заходнія лідары «яшчэ некаторы час мелі ілюзіі» адносна магчымасці дыялогу паміж Захадам і Усходам, але яны развеяліся пасля разні ў Бучы.
«Нават пасля пачатку вайны некаторыя мае калегі ў еўрапейскай Радзе ўсё яшчэ мелі ілюзіі, але некаторыя з іх тут жа адмовіліся ад іх, даведаўшыся пра зверствы, якія Расія прадэманстравала ў Бучы. Так што «жалезная заслона» ўжо ёсць, яна, імаверна, апусцілася надоўга, я не бяруся меркаваць, на дзесяцігоддзі ці на гады, гэта шмат у чым будзе залежаць ад будучага расійскага рэжыму», — сказаў Наўседа.
Ён таксама адзначыў, што «існаванне гэтай жалезнай заслоны стварае праблемы як для NATO агулам, так і для Літвы, якой трэба будзе зрабіць» шмат працы і зрабіць яе хутка».
«Павольная праца сёння немагчымая, асабліва ў сферы абароны нам трэба дзейнічаць хутка, каб падрыхтавацца да любых выклікаў, якія могуць узнікнуць», — адзначыў кіраўнік Літоўскай дзяржавы.
Камісія нацыянальнай бяспекі ў аўторак прапанавала прыпыніць рух тавараў, транспарту і людзей праз КПП «Лаварышкі» («Катлоўка» з беларускага боку) і «Райгарад» («Прывалка» з беларускага боку), а таксама паступова скараціць колькасць рэгулярных пасажырскіх аўтобусных рэйсаў у Беларусь. Рашэнне аб гэтым павінен прыняць урад.
Яшчэ адна прапанова — абмежаваць пасадку і высадку пасажыраў у чыгуначным пункце пропуску «Кяна» («Кібартай»). Гэта прапанова накіравана на вырашэнне праблемы высадкі ў Літве асоб, якія ідуць транзітнымі цягнікамі ў Калінінград, з дакументамі, выдадзенымі любой краінай-членам Еўрапейскага Саюза для паездак у краіны супольнасці. Каля 13 тыс.чалавек у год высаджваюцца або садзяцца ў Кяне.
Літоўскія ўлады сцвярджаюць, што гэтыя ініцыятывы накіраваныя на развязанне праблем нацыянальнай бяспекі, кантрабанды і парушэння міжнародных санкцый.
У жніўні мінулага года Літва закрыла два з шасці пунктаў пропуску на мяжы з Беларуссю — «Шумск» («Лоша») і «Цверач» («Відзы»). З закрыццём «Лаварышак» і «Райгарда» на мяжы з Беларуссю застанецца яшчэ два КПП — «Мядзінінкай» («Каменны Лог») і «Шальчынінкай» («Беняконі»).
Чытайце таксама:
У Літве зноў прапанавалі закрыць яшчэ два памежныя пункты на мяжы з Беларуссю
Ці стала складаней праходзіць беларуска-літоўскую мяжу пасля таго, як пастрожылі праверку беларусаў