Uciečka pakazvaje, što Hiermanija nie tolki nie pastaŭlaje Taurus Ukrainie, ale tołkam i nie abmiarkoŭvała heta
Kancler Ołaf Šolc zajaviŭ, što Niamieččyna rasśleduje «vielmi surjoznuju ŭciečku» infarmacyi. Napiaredadni rasiejskaja prapahandystka Marharyta Simańjan apublikavała aŭdyjazapis, na jakim, jak śćviardžajecca, hienierał i niekalki aficeraŭ Vajskova-pavietranych sił Hiermanii abmiarkoŭvajuć paramietry vykarystańnia rakiet Taurus, u tym liku dla ŭdaraŭ pa Krymskim moście, piša BBC.
03.03.2024 / 09:48
Demanstracyja z ukrainskimi ściahami la Brandenburhskich varot u Bierlinie. Fota: Sean Gallup / Getty Images
«Heta vielmi surjoznaje pytańnie, i mienavita tamu zaraz idzie vielmi dbajnaje, vielmi intensiŭnaje i chutkaje rasśledavańnie», — zajaviŭ u subotu kancler.
Paźniej Ministerstva abarony Hiermanii paćvierdziła, što sakretnaja narada vajskovaha kiraŭnictva krainy, infarmacyja ab jakoj pratačyłasia ŭ sieciva, sapraŭdy prasłuchoŭvałasia.
«Pavodle našych acenak, narada ŭ VPS była padsłuchana. Pakul što my nie možam skazać z upeŭnienaściu, ci byli ŭniesieny źmieny ŭ aŭdyjazapis i rasšyfravanuju viersiju, jakija cyrkulujuć u sacsietkach», — zajaviła jana žurnalistam. Vydańni Spiegel i Bild raniej pisali, što aŭdyjozapis, vierahodna, sapraŭdny.
Što skazana ŭ rasšyfroŭcy
Pa śćviardžeńni Simańjan, havorka idzie ab razmovie, jakaja adbyłasia 19 lutaha. U im, pavodle źviestak prapahandystki, prymaŭ udzieł «načalnik adździeła apieracyj i vučeńniaŭ kamandavańnia VPS Bundeśviera» i supracoŭniki «centra pavietranych apieracyj kaśmičnaha kamandavańnia» niamieckaj armii.
Na zapisy hałoŭnakamandujučy VPS Hiermanii hienierał Inha Hiercharc daručyŭ svaim pamočnikam padrychtavać prezientacyju dla ministra abarony ab tym, jak Hiermanija moža pastavić Ukrainie Taurus i jak Kijeŭ moža vykarystoŭvać jaho dla źniščeńnia celaŭ, uklučajučy składy bojeprypasaŭ i Krymski most.
Miarkujučy pa rasšyfroŭcy na ruskaj movie, jakuju publikuje Simańjan, adzin z surazmoŭcaŭ kaža, što ministr abarony Hiermanii Barys Pistoryus «maje namier staranna prapracavać pytańnie pastavak rakiet Taurus va Ukrainu», i dadaje: «Nichto nie viedaje, čamu fiederalny kancler błakuje hetyja pastaŭki».
Šolc raniej nieadnarazova vystupaŭ suprać mahčymaj pieradačy Ukrainie dalnabojnych rakiet Taurus, zajaŭlajučy, što heta moža ŭciahnuć krainu ŭ vajnu z Rasijaj.
29 lutaha jon zajaviŭ, što nie choča pastaŭlać Ukrainie rakiety Taurus, pakolki dalokaść ich dziejańnia dazvalaje parazić celi ŭ Maskvie. «Radyus dziejańnia Taurus składaje 500 km, i kali jaho niapravilna vykarystoŭvać, jon moža dasiahnuć peŭnych celaŭ dzie-niebudź u Maskvie», — skazaŭ kancler.
Niamieččyna maje na ŭzbrajeńni kala 600 rakiet Taurus, ź jakich kala 500 ličacca bajazdolnymi. Hienierał Hiercharc zajaviŭ, što Niamieččyna moža dazvolić sabie pastavić Ukrainie 100 rakiet dvuma tranšami.
Na zapisie surazmoŭcy padrabiazna abmiarkoŭvajuć roznyja techničnyja aśpiekty mahčymych pastavak rakiet Taurus Ukrainie — ad sposabu ich ustanoŭki na samaloty da navučańnia vajennaha piersanału i sposabaŭ pastaŭki. To-bok na najvyšejšym uzroŭni hetyja pytańni jašče nie abmiarkoŭvalisia.
Pry hetym jany vykazvajuć mierkavańnie, što kali rašeńnie ab pastaŭkach budzie pryniata, jany mohuć być prymienienyja nie raniej jak praz vosiem miesiacaŭ.
Va ŭciečcy razmovy hienierał Hiercharc zajaviŭ, što niama sensu pradastaŭlać Ukrainie bolš za 100 rakiet, pakolki hetaja zbroja nie moža mieć istotnaha ŭpłyvu na pole boju, bo va Ukrainy nie chapaje vojskaŭ, kab vyzvalić novuju ci navat utrymać kantralavanuju terytoryju.
Pavodle jaho słoŭ, źniščeńnie Krymskaha mosta było b stratehična i palityčna važnym, ale Ukraina, chutčej za ŭsio, nie zmoža pradoŭžyć naziemny nastup.
«Heta nie źmienić chod vajny, my pavinny heta dakładna ŭśviedamlać», — skazaŭ hienierał Hiercharc.
Jon dadaŭ, što Vialikabrytanija i Francyja cisnuć na Hiermaniju z patrabavańniem pradastavić rakiety, tamu što jany sami vyčarpali svaje zapasy.
Sudziačy pa zapisie, udzielniki taksama kažuć ab mahčymych celach, jakija mahli b urazić rakiety. «Jość dźvie cikavyja celi — most na ŭschodzie i składy bojeprypasaŭ, jakija znachodziacca vyšej, — zajaŭlaje adzin ź niamieckich vajskoŭcaŭ, vierahodna, majučy na ŭvazie Kierčanski most. — Most na ŭschodzie ciažka dastać, heta dosyć drobnaja cel, ale Taurus heta moža zrabić, składy bojeprypasaŭ taksama moža ŭrazić».
Pry hetym udzielniki hutarki kažuć: «Most z-za svajoj vieličyni padobny da ŭźlotnaj pałasy. Tamu dla jaho moža spatrebicca nie 10 i navat nie 20 rakiet».
Adnak hałoŭnyja pytańni ŭdzielnikaŭ razmovy vyklikaje pytańnie ab tym, jakim čynam pryznačać celi dla ŭdaraŭ i jak paźbiehnuć pramoha ŭdziełu ŭ hetym pracesie hiermanskich vajennych. «Nam treba sačyć, kab z samaha pačatku nie było farmulovak, jakija robiać nas bokam kanfliktu», — kaža adzin z aficeraŭ.
Ministr zamiežnych spraŭ Rasiei Siarhiej Łaŭroŭ u subotu nazvaŭ publikacyju razmovy «samavykryćciom».
«My ŭ apošni čas stali śviedkami faktaŭ, jakija vyjavilisia ab supraćstajańni kanclera Šolca z Bundeśvieram, ab niejkich chitrych zadumach Bundeśviera, jakija stali vidavočnymi z-za apublikavańnia hetaha aŭdyjazapisu. Heta hučnaje samavykryćcio», — skazaŭ Łaŭroŭ.
Čytajcie taksama:
Čatyry krainy NATA nie vyklučyli adpraŭki svaich vojskaŭ va Ukrainu
Rasija maje płan vajny z Kitajem — FT
Čamu Makron raptam zahavaryŭ pra mahčymy ŭvod zachodnich vojskaŭ va Ukrainu