У Брэсце міліцыянта асудзілі за падпіску на старонку ў фэйсбуку і нават правялі ператрус
Незразумела, чаму сілавікі зацікавіліся сваім калегам, але ператрус у ягонай кватэры правялі з санкцыі намесніка пракурора Брэста.
25.03.2024 / 10:20
Звычайных беларусаў кожны дзень судзяць за «распаўсюд экстрэмісцкіх матэрыялаў», прызначаючы ім суткі адміністрацыйнага арышту або вялікія штрафы з канфіскацыяй тэлефонаў у «даход дзяржавы». Але вось суд над супрацоўнікам МУС за «экстрэмізм» — рэдкі выпадак. Журналісты BGmedia знайшлі такі ў банку судовых рашэнняў, дзе апублікавалі пастанову суда Ленінскага раёна Брэста ад 11 сакавіка.
Суд Ленінскага раёна 11 сакавіка ў адкрытым пасяджэнні разгледзеў адміністрацыйную справу паводле папулярнага пасля 2020 года артыкула — ч.2 арт.19. 11 КаАП (распаўсюд экстрэмісцкіх матэрыялаў). Судзілі ўраджэнца Расіі, у якога ёсць беларускае грамадзянства. З пастановы суда таксама вядома, што ў яго ёсць вышэйшая адукацыя, а працуе ён у МУС Беларусі. Жыве ў Брэсце, выхоўвае непаўналетняе дзіця і даглядае маці з інваліднасцю.
Яго абвінавацілі ў тым, што ён у неўстаноўлены час на сваёй старонцы ў фэйсбуку падпісаўся на старонку на літару T, якая ўключана ў «рэспубліканскі спіс экстрэмісцкіх матэрыялаў» рашэннем суда Чыгуначнага раёна Віцебска. Падпіску на «забаронены « рэсурс знайшлі ў яго супрацоўнікі АУС Ленінскага раёна Брэста.
Падчас суда ён растлумачыў, што падпісаўся ў фэйсбуку на «старонку Т», калі яна яшчэ не была прызнаная «экстрэмісцкай». Пазней ён даведаўся пра існаванне «Рэспубліканскага спісу экстрэмісцкіх матэрыялаў», таму адпісаўся ад большасці «забароненых» інтэрнэт-рэсурсаў у сацсетках. Па няўважлівасці засталася толькі падпіска на «старонку». Да яе яго калегі і прычапіліся. На думку суда, чалавек прызнаў віну часткова.
З пастановы суда стала зразумела, калі ў яго знайшлі «экстрэмісцкую» падпіску і пры якіх абставінах. Вядома, што 6 сакавіка агледзелі «месца здзяйснення адміністрацыйнага правапарушэння»: ператрус у кватэры, у якой пражывае мужчына, санкцыянаваў намеснік пракурора Брэста. Падчас яго агледзелі ўсе тэхнічныя прылады.
А ўжо ў суботу, 9 сакавіка, сілавікі вывучылі планшэт мужчыны і знайшлі на яго старонцы ў Facebook тую самую «экстрэмісцкую» падпіску. Алега затрымалі ў той жа дзень у 12.46. Раз суд правялі ў панядзелак, 11 сакавіка, то выходныя мужчына правёў у ІЧУ Ленінскага РАУС Берасця.
Дарэчы, у «Рэспубліканскім спісе экстрэмісцкіх матэрыялаў» журналісты BGmedia не знайшлі старонку ў Facebook на літару «Т», якую прызнаў «экстрэмісцкай» суд Чыгуначнага раёна Віцебска. Такой старонкі ў рашэннях гэтага суда няма. Сам суд прызнаў «экстрэмісцкімі «толькі дзве старонкі ў фэйсбуку: «Супольнасць беларускіх анархістаў «Прамень» і старонку «Хартыі97». Магчыма, у пастанове суда ёсць памылка друку.
Чытайце таксама:
За распаўсюд «экстрэмізму» арыштавалі жыхара Наваполацка
У Жлобіне затрымалі і асудзілі не менш за чатырох чалавек
У Гомелі мужчыну асудзілі да пазбаўлення волі паводле чатырох артыкулаў