Adnoj ź pieršych ad sankcyj suprać avijakampanii Southwind Airlines paciarpieła prapahandystka ANT
Naprykancy sakavika stała viadoma, što Jeŭrasajuz zabaraniŭ avijakampanii Southwind Airlines paloty z Turcyi ŭ ES i praź ES. Heta stała niečakanaściu dla šmatlikich pasažyraŭ. Z admienaj rejsa sutyknułasia i televiadučaja ANT Kaciaryna Ciškievič, jakaja nie zmahła vylecieć sa Stambuła ŭ Minsk.
02.04.2024 / 10:52
Kaciaryna Ciškievič. Skrynšot jaje instahrama
Southwind Airlines pryjšłosia terminova admianiać palotnuju prahramu Minsk-Stambuł praź niečakanyja sankcyi Jeŭrasajuza. Hetaje rašeńnie abhruntavali suviaziami z Rasijaj, bo vyśvietliłasia, što avijakampanija naležyć Turcyi tolki farmalna.
Rejsy karystalisia papularnaściu ŭ biełarusaŭ, tamu što Southwind Airlines mahli dastaŭlać pasažyraŭ u Stambuł na 2 hadziny chutčej, čym Belavia.
Paviedamlałasia, što ŭsim vandroŭnikam, jakija paciarpieli praz sankcyi, zabiaśpiečyli pražyvańnie i charčavańnie. Vyvaz turystaŭ robicca roznymi avijakampanijami — u tym liku «Biełavija», Azurair, «Aerafłot» i inšymi.
Tieleviadučaja ANT Kaciaryna Ciškievič pryśviaciła niepryjemnaj situacyi storys u instahramie: «Daroha dadomu sa Stambuła ŭ Minsk zaniała dvoje sutak. Dziakuj usim za dapamohu i padtrymku! I asobnaja padziaka SANKCYJAM. Ciapier ja viedaju, jak možna padarožničać 8 dzion pa košcie 6».
Skrynšot storys Kaciaryny Ciškievič
Kaciaryna Ciškievič pracuje na telebačańni 17 hadoŭ, 12 ź jakich na ANT. Bolš za šeść hadoŭ jana ŭznačalvaje adździeł viadučych infarmacyjna-analityčnych prahram. Žančyna taksama viadzie mnohija praŭładnyja mierapryjemstvy.
Paśla falsifikacyi vybaraŭ i žorstkich razhonaŭ mirnych demanstracyj u 2020 hodzie Kaciaryna była siarod tych, chto trymaŭsia za svajo miesca abieruč. Ci ciažka joj było hladzieć na toje, jak zvalniajucca najbolš pryncypovyja viadučyja, jakich jana «vyhadavała»?
Voś što sama žančyna adkazvała na hetaje pytańnie ŭ intervju «Sovietskoj Biełoruśsii»:
«Kali kiruješ padraździaleńniem, kožnaja takaja zajava ab zvalnieńni — heta jašče i asabistaja mini-drama. Ty ŭkłaŭ u hetaha čałavieka siły, emocyi, a jon raptam vyrašyŭ, što pasada viadučaha jamu nie vielmi važnaja.
Ciapier ja hladžu na heta prosta jak na abjektyŭnuju realnaść. Tyja, kamu naša pazicyja akazałasia niablizkaja, zrabili svoj vybar. Mnie zdajecca, tut usio zaležała ad asiarodździa. Ludzi nie znajšli ŭ svaim asiarodździ našaj padtrymki, syšli na supraćlehły bok.
Maja siamja, skažam, mianie padtrymlivała da kanca, inšyja varyjanty navat nie abmiarkoŭvalisia. Mama, pamiataju, tady skazała: «Sieła ŭ kadr — i tapi da kanca». Dumać, što ty niezamienny i na tabie ŭsio trymajecca, pa-durnomu i pa-dziciačy. Nichto nikoha nie ŭhavorvaŭ zastacca, nikoha nie trymali.
Televizijny praces u lubym vypadku budzie iści: z taboj ci bieź ciabie. U 2020 hodzie mnohija nie zmahli spravicca z emocyjami. Nu što ž, heta ich vybar».
Čytajcie taksama:
Southwind Airlines admianiaje palotnuju prahramu Minsk — Stambuł
Bolš za 40 turystaŭ ź Biełarusi zastajucca ŭ Stambule z-za admieny rejsa Southwest Airlines
«Tureckaj» Southwind Airlines zabaranili lotać nad ES. Siońniašni rejs ź Minska admienieny