«Raniejšaha lidara ŭžo nie budzie». Ramzan Kadyraŭ nievylečna chvory
Stan zdaroŭja 47-hadovaha Ramzana Kadyrava nie pakidaje nadziej na jaho vylačeńnie, piša vydańnie «Novaja hazieta Jeŭropa». U svaim rasśledavańni žurnalisty raskazvajuć, čamu Ramzan Kadyraŭ tak časta źnikaje z publičnaha pola.
23.04.2024 / 00:11
Ramzan Kadyraŭ, skrynšot ź videa, raspaŭsiudžanaha jahonaj pres-słužbaj 22 krasavika 2024 hoda
«Časovaja niepracazdolnaść»
… U studzieni 2019 hoda, kali daktary ŭpieršyniu pastavili jamu dyjahnaz «niekroz padstraŭnikavaj załozy», Ramzan Kadyraŭ nie nadta chavaŭ, što vymušany pajści ŭ adpačynak u suviazi z «časovaj niepracazdolnaściu».
I sam ža patłumačyŭ svoj vodpusk prablemami sa zdaroŭjem: «Zusim niadaŭna ja ździejśniŭ dvuchdzionnuju inśpiekcyjnuju pajezdku vysoka ŭ hory. Va ŭmovach śniehapadu i mocnaha vietru krychu zastudziŭsia. Jak śledstva, nievialikaje niedamahańnie, tempieratura i hryp.
Na nastupnyja dni ŭ mianie byli zapłanavany važnyja kamandziroŭki. Tamu <…> časova daručyŭ vykanańnie abaviazkaŭ kiraŭnika ČR staršyni ŭrada ČR Muślimu Chučyjevu… Chvała Ałachu, arhanizm u mianie mocny, kropielnicy stavili ŭsiaho dva dni.
Usio zaraz narmalna. Z 16 lutaha ŭ poŭnym abjomie vykonvaju svaje słužbovyja abaviazki. I vam raju zajmacca sportam, kali žadajecie chutka zładzicca z roznymi chvarobami».
Užo tady lačeńnie banalnaj prastudy kropielnicami vyklikała ŭ mnohich ździŭleńnie, jakoje pierajšło va ŭstojlivaje padazreńnie vosieńniu 2019 hoda.
Vośmaha kastryčnika ŭ Piacihorsku prajšło pasiadžeńnie Nacyjanalnaha antyterarystyčnaha kamiteta, na jakim prysutničali kiraŭniki ŭsich paŭnočna-kaŭkazskich rehijonaŭ, akramia kiraŭnika Čačni.
Tady ž ananimny telehram-kanał «SKFO Telegraph» raspaŭsiudziŭ paviedamleńnie ab drennym stanie zdaroŭja Kadyrava.
Viersiju atručvańnia apieratyŭna abvierh u siabie ŭ instahramie pamočnik kiraŭnika Čačni Achmied Dudajeŭ: «Infarmacyja ab zamachu na Kadyrava — nie bolš čym čutki. Vakoł piersony Ramzana Kadyrava, jak hryby paśla daždžu, vyraśli čutki ab jaho niemačy, jakija pieraraśli ŭ čutki ab atručeńni…
Ludzi, Kadyraŭ zvyčajny čałaviek, jaki moža zachvareć, atrymać udar, schapić hryp i tamu padobnaje <…> Chopić užo šyć biełymi nitkami teoryju ab zamachu i atručvańni, što nie maje pad saboj ni padstavy, ni dokazaŭ…»
Ale ŭ studzieni 2020 hoda Kadyraŭ znoŭ vymušany byŭ uziać vodpusk u suviazi z «časovaj niepracazdolnaściu». I znoŭ, pavodle aficyjnaj viersii (u hety raz situacyju sa zdaroŭjem kamientavaŭ deputat Dziarždumy ad Čačni Šamsaił Saralijeŭ), u Kadyrava byli «drobnyja prablemy sa zdaroŭjem», jakija tym nie mienš znoŭ lačyli «kursam kropielnic» u Maskvie.
Tady ž, u 2019 hodzie, mała chto nadaŭ značeńnie tamu faktu, jak mocna schudnieŭ Ramzan Kadyraŭ.
Mienavita rezkaja strata ŭ vazie — pieršy simptom pankreaniekrozu, hetaha vielmi surjoznaha, pakutlivaha zachvorvańnia z vysokaj stupieńniu śmiarotnaści.
Na fatahrafii vidać jak mocna schudnieŭ Kadyraŭ u 2018-2019 hadach. Fota: sacsietki
Mienavita z 2019-ha minimum dvojčy ŭ hod Kadyraŭ pačaŭ prachodzić rehularnyja, u tym liku i chirurhičnyja, pracedury ŭ CKB Upraŭleńnia spravami prezidenta RF.
A letam 2020-ha kiraŭnik Čačni pierachvareŭ na kavid i atrymaŭ u nahruzku da asnoŭnaha zachvorvańnia surjoznyja prablemy z endakrynnaj sistemaj.
Uviesnu 2022-ho stan zdaroŭja Kadyrava staŭ imkliva paharšacca, adnak hetaja tema stała «topavaj» tolki ŭ minułym hodzie.
Navat samy niaŭvažlivy naziralnik nie moh nie zaŭvažyć, jak u vyniku admovy nyrak i zastoju vadkaści ŭ lohkich (nastupstvy asnoŭnaha zachvorvańnia) Kadyraŭ pavialičyŭsia ŭ pamierach u paŭtara raza.
Forma jaho žyvata nabyła ŭsie prykmiety pankreatahiennaha ascytu, jon staŭ ź ciažkaściu havaryć, pavolna chadzić, zanadta ciopła dla čačenskaha klimatu apranacca.
Vizit Dźmitryja Miadźviedzieva ŭ Hrozny zimoj 2024 hoda. Na fota vidać dziŭnaja vuhłavataja forma žyvata Kadyrava. Stop-kadr videa
Ale samaje hałoŭnaje, jon pačaŭ źnikać z publičnaj prastory ŭ samyja nieprydatnyja dla hetaha momanty.
Adsutnaść na fiederalnym pasłańni Pucina ŭ lutym 2023-ha, maŭčańnie padčas miaciažu Pryhožyna, propusk narady prezidenta RF z kiraŭnikami paŭnočnakaŭkazskich rehijonaŭ, pryśviečanaj lubimaj temie Kadyrava — turyzmu, — usie hetyja momanty stanavilisia ŭ minułym hodzie padstavaj dla čutak ab chvarobie Kadyrava i prymušali jaho ź ciažkaściu, ale zjaŭlacca ŭsio ž na publicy, tolki kab dakazać, što jon jašče kantraluje situacyju.
Napružany hrafik kiraŭnika rehijonu i varjackaja padazronaść, jakaja daŭno pierajšła ŭ maniju, nie dazvalali Kadyravu narmalna i, što važna, doŭha lačycca. U vyniku ŭ vieraśni minułaha hady zdaryŭsia pradkazalny kryzis.
Koma
Ab špitalizacyi Kadyrava ŭ stanie komy ŭ reanimacyjnaje adździaleńnie CKB Upraŭleńnia spravami prezidenta RF pieršym paviedamiŭ ananimny čačenski telehram-kanał «Nijso». Vidavočna, hetuju infarmacyju źliŭ niechta z akružeńnia Kadyrava, pry hetym tołkam nie razabraŭšysia ŭ miedycynskaj śpiecyficy momantu.
Pa danych krynic «NHIE» ŭ CKB, Kadyraŭ trapiŭ u balnicu z vostraj lohačnaj niedastatkovaściu, jakaja raźviłasia ŭ jaho ŭ vyniku pieradaziroŭki trankvilizatara «Dormikum».
Heta mahutny siedatyŭny preparat, jaki zvyčajna vykarystoŭvajecca dla taho, kab supakoić pacyjentaŭ pierad chirurhičnym umiašańniem. «Dormikum» akazaŭsia efiektyŭnym srodkam dla Kadyrava, jaki pakutuje ad mocnych bolaŭ, biessani i padvyšanaj tryvožnaści.
Adnak złoŭžyvańnie hetym preparatam moža pryvieści da pryhniotu dychalnaj dziejnaści. Mienavita ŭ takim vostrym stanie, pa słovach krynic vydańnia, kiraŭnik Čačenii i byŭ špitalizavany ŭ vieraśni minułaha hoda ŭ CKB.
Dla stabilizacyi dychalnaj funkcyi Kadyrava padklučyli da ŠVŁ, dla čaho ŭviali ŭ miedykamientozny son. Taki stan jašče nazyvajuć «miedykamientoznaj komaj».
Ułasna, adsiul i pajšli čutki pra komu čačenskaha lidara, chacia na toj momant dziakujučy vysokaprafiesijnym dziejańniam daktaroŭ pramoj pahrozy dla žyćcia pacyjenta ŭžo nie było.
Adnak słova «koma», jakoje prahučała ŭ adnym kantekście z proźviščam Kadyraŭ, spravakavała sapraŭdnaje infarmacyjnaje cunami. Adsutnaść kiraŭnika Čačni ŭ respublicy z pačatku vieraśnia i toje, što čačenskaja elita pasialiłasia na terytoryi CKB Upraŭleńnia spravami prezidenta ledź nie ŭ poŭnym składzie, uźniali ažyjataž vakoł temy da kaśmičnych maštabaŭ i sparadzili samyja dzikija čutki, až da paviedamleńniaŭ ab śmierci Kadyrava.
Abviarhać ich było składana: na hety raz stan zdaroŭja nie dazvalaŭ kiraŭniku Čačni ŭ terminovym paradku viarnucca ŭ respubliku.
Tamu jaho znachodžańnie ŭ CKB patłumačyli publicy vielmi aryhinalnym čynam.
20 vieraśnia ŭ sacsietkach zjaviłasia videa, na jakim Kadyraŭ siadzić u balničnaj pałacie kala łožka svajho dziadźki Mahamieda, utykanaha trubkami i kropielnicami. Sam kiraŭnik Čačni na hetym videa ničoha nie havoryć i amal nie ruchajecca. Zamiest jaho havorać jaho bližejšyja paplečniki — Adam Delimchanaŭ i Bekchan Tajmaschanaŭ.
Supracoŭnik CKB Upraŭleńnia spravami prezidenta, paviedamlaje, što pacyjent (imia jakoha jon nie ŭdakładniaje) znachodzicca ŭ špitali dva tydni i jašče prykładna stolki ž jamu nieabchodna pralačycca da poŭnaj vypiski. Pa dziŭnym supadzieńni, mienavita stolki času Ramzan Kadyraŭ pravioŭ u Maskvie, pa aficyjnaj viersii — «u słužbovaj kamandziroŭcy».
Ramzan Kadyraŭ naviedvaje dziadźku Mahamieda Kadyrava ŭ balnicy, 20 vieraśnia 2023 hoda. Fota: RKadyrov_95 / Telegram
Heta byŭ pieršy vypadak za ŭvieś čas jahonaha kiravańnia, kali jon pakinuŭ respubliku tak nadoŭha.
A kali jon zjaviŭsia ŭ Čačni, to znoŭ źniaŭsia ŭ videaroliku razam sa svaim dziadźkam. Praŭda, heta była nie narychtoŭka jaho pijarščykaŭ (mienavita tak usio ŭspryniali dziŭnaje videa z «pamirajučym» dziadźkam Kadyrava ŭ CKB Upraŭleńnia spravami prezidenta RF), a, chutčej, ich surjozny prakoł.
Šostaha kastryčnika minułaha hoda ŭ Hroznym adkryvali miačeć imia praroka Ibrahima, jakuju pieršapačatkova płanavali nazvać u honar samoha Kadyrava (ale jon ścipła pieradumaŭ).
U repartažy ab adkryćci miačeci ŭ kadr trapiŭ i Mahamied Kadyraŭ. Vyhladaŭ jon pry hetym prosta nieprystojna zdarovym, niby i nie lažaŭ jašče paru tydniaŭ tamu «pry śmierci» na balničnym łožku. A voś Ramzan Kadyraŭ, jaki ź ciažkaściu pierasoŭvaje nohi, na kantraście z badziorym dziadźkam, choć i na čverć stahodździa starejšym, hladzieŭsia, prama skažam, kiepska.
Dziadźka Kadyrava Mahamied i sam Kadyraŭ na adkryćci miačeci ŭ Hroznym u kastryčniku 2023 hoda. Fota: grozny.tv
U vieraśni minułaha hoda lekaram CKB Upraŭleńnia spravami prezidenta RF atrymałasia stabilizavać stan svajho tajamničaha pacyjenta i bolš-mienš viarnuć jamu dziejazdolnaść.
Adnak, pa źviestkach krynicy ŭ CKB Upraŭleńnia spravami RF, u chodzie praviadzieńnia ahulnaha abśledavańnia VIP-pacyjenta byli atrymany danyja MRT mozhu, vyniki jakoj pryviali blizkich Kadyrava ŭ pryhniečany stan. Vydańnie cytuje słovy jašče adnoj krynicy, blizkaj da Adama Delimchanava. Voś jak surazmoŭca interpretavaŭ reakcyju rodnych Kadyrava na niaŭmolny dyjahnaz daktaroŭ:
«Raniejšaha lidara ŭžo nie budzie, [novaja] chvaroba budzie surjozna [na jaho] upłyvać. Navat u tym vypadku, kali jon zaraz i ačuniaje, jon budzie ŭžo ni žyvym, ni miortvym…»
Chto budzie pierajemnikam
«Novaja hazieta Jeŭropa» vykazvaje dumku, što pierajemnikam Kadyrava stanie kamandzir čačenskaha śpiecnaza «Achmat» hienierał-major Hieroj Rasii Apci Ałaŭdzinaŭ. Mienavita jon niečakana vystupaŭ ad Čačni na 21-ym zjeździe «Adzinaj Rasii», na jakim delehaty padtrymali kandydaturu Uładzimira Pucina na piaty prezidencki termin.
Vystupleńnie Apci Ałaŭdzinava na źjeździe Adzinaj Rasii 17 śniežnia 2023 hoda. Stop-kadr videa
Ničym asablivym hetaje mierapryjemstva ad papiarednich nie adroźnivałasia, akramia adnaho: ci ledź nie ŭpieršyniu adnym z centralnych śpikieraŭ zjezdu staŭ čačeniec. I heta byŭ nie Ramzan Kadyraŭ.
Ramzan Kadyraŭ pryznačyŭ svajho 18-hadovaha syna ministram
U siecivie «chavajuć» Kadyrava. Ale siońnia jon apublikavaŭ videa z saboju — upieršyniu za dva tydni