Cełuju siamju z-pad Homiela sudziać za «zdradu dziaržavie» — baćka-čarnobylec, maci-sanitarka i syn-budaŭnik
Stała viadoma, pa jakich artykułach buduć sudzić siamju Procharavych ź biełaruska-ukrainskaha pamiežža. Im moža pahražać da piatnaccaci hadoŭ kałonii.
08.05.2024 / 17:19
Łarysa, Vasil i Pavieł Procharavy (źleva naprava i źvierchu ŭniz). Fota: BELPOL, staronka Ukantakcie Vasila i jutub-kanał Vasila
U raskładzie sudoŭ źjaviłasia imia Vasila, Łarysy i Paŭła Procharavych. Pra ich zatrymańnie stała viadoma ŭ śniežni 2023-ha.
Dačku Anastasiju, jakuju zatrymlivali razam ź imi, padobna, sudzić nie buduć.
Usia siamja žyła ŭ vioscy Hraboŭka Homielskaha rajona — jana za niekalki kiłamietraŭ ad miažy z Ukrainaj i za 25 kiłamietraŭ ad Homiela.
Vasilu Procharavu 54 hady. Jon rodam z horada Čarnobyl, u jakim znachodziłasia sumna viadomaja atamnaja elektrastancyja. Procharaŭ słužyŭ u desantnych vojskach. Potym pracavaŭ na budoŭlach i padpracoŭvaŭ hruzapieravozkami, a taksama vioŭ nievialiki błoh.
Vasil Procharaŭ. Fota ź jahonaj staronki Ukantakcie
U błohu Vasil raspaviadaje pra svaje vandroŭki ŭ Čarnobylskuju zonu, asablivaści pracy i svoj byt.
Viadoma, što jon paciarpieły ŭ avaryi na ČAES.
Jahonamu synu Paŭłu 27 hadoŭ. Jon naradziŭsia ŭ Hraboŭcy. Viadoma, što chłopiec pracavaŭ na budoŭli.
Pavieł Procharaŭ na viełaprabiehu ŭ Homieli. Fota z kanała Vasila Procharava ŭ YouTube
Łarysa Procharava — zusim niepubličny čałaviek. Jana naradziłasia ŭ 1975 hodzie ŭ Hraboŭcy, dzie pražyła ŭsio žyćcio. Pracavała sanitarkaj u miascovaj lakarni.
Łarysa Procharava. Fota: BELPOL
Ź imi razam pa spravie prachodziać Fiodar Aksienienka i Rusłan Pracharenka. Pra ich ničoha nieviadoma.
Hrupu abvinavačvajuć pa čytaroch artykułach — «zdrada dziaržavie» (č. 1 art. 356 KK), «raspalvańnie varožaści ci varažniečy» (č. 1 art. 130 KK), «sadziejničańnie ekstremisckaj dziejnaści» (č. 1 art. 361-4 KK) i «niedaniasieńnie pra złačynstva» (č. 1 art. 406 KK).
Nieviadoma napeŭna, kaho ź ich vinavaciać pa jakim artykule. «Homielskaja Viasna» paviedamlała, što za «zdradu dziaržavie» zatrymlivali mienavita Procharavych. Sud pačniecca 20 maja ŭ Homielskim haradskim sudzie.
U Homieli za «zdradu dziaržavie» zatrymali ŭsiu siamju
Stała viadoma, u čym vinavaciać dydžeja z Kobryna z ukrainskim pašpartam. Jon źnik bolš za hod tamu