Biełaruskija dziaržaŭnyja ŚMI nie nazyvajuć Karabach Karabacham
Dla aśviatleńnia pajezdki Alaksandra Łukašenki i Ilchama Alijeva vykarystoŭvajecca eŭfiemizm «terytoryi, jakija adradžajucca».
17.05.2024 / 12:26
Alaksandr Łukašenka i Ilcham Alijeŭ padčas naviedańnia horada Fizuli. Fota: pul_1 / Telegram
Alaksandr Łukašenka naviedvaje terytoryju Nahornaha Karabacha ŭ Azierbajdžanie. U aeraporcie horada Fizuli, jaki pierajšoŭ pad kantrol Azierbajdžana ŭ kastryčniku 2020 hoda, jaho sustreŭ Ilcham Alijeŭ.
Aśviatlajučy hetuju padzieju, biełaruskaja prapahanda imkniecca nie vykarystoŭvać nazvu «Nahorny Karabach». Zamiest hetaha pišuć «terytoryi, što adradžajucca» (na ruskaj movie — «vozroždajemyje»).
Paviedamleńnie na sajcie BiełTA
Paviedamleńnie na sajcie «SB. Biełaruś siońnia»
Paviedamleńnie ŭ telehram-kanale BiełTA
Adznačym, što azierbajdžanskaje dziaržaŭnaje infarmacyjnaje ahienctva vykarystoŭvaje inšaje słovazłučeńnie — «vyzvalenyja terytoryi».
Paviedamleńnie na sajcie Azierbajdžanskaha dziaržaŭnaha infarmacyjnaha ahienctva AZIERTADŽ
Vyhladaje na toje, što biełaruskija prapahandysty zaŭvažyli niežadańnie vykarystańnia nazvy «Nahorny Karabach» aficyjnym Azierbajdžanam. Ale i nie chočuć uśled za im vykarystoŭvać prymietnik «vyzvalenyja».
U kantekście namieraŭ aficyjnaha Minska pašyryć ekanamičnaje supracoŭnictva i dapamahčy ŭ adnaŭleńni paciarpiełaha ad vajennaha kanfliktu rehijona, vykarystoŭvajecca rasijski prymietnik «vozroždajemyje».
Nahadajem, što nazva «Karabach» etymałahična pachodzić ad ciurkskaha «kara» — čorny i piersidskaha «bach» — sad. Karabach zdaŭna padzialaŭsia na Raŭninny i Nahorny. U 1923 hodzie ŭ składzie Azierbajdžanskaj SSR była stvorana Aŭtanomnaja vobłaść Nahornaha Karabacha (z 1937 hoda — Nahorna-Karabachskaja aŭtanomnaja vobłaść — NKAV) z centram u Chankiendzi (paźniej pierajmienavanym u Ściepanakiert).
U 1988 hodzie nasielenaja pieravažna armianami NKAV zajaviła pra svoj vychad sa składu Azierbajdžana. U vieraśni 1991 hoda na terytoryi NKAV i Šaŭmianskaha rajona Azierbajdžana była abvieščana Nahorna-Karabachskaja Respublika (Respublika Arcach), jakaja zastałasia nikim nie pryznanaj. Jaje aktyŭna padtrymlivała Armienija, jakaja ŭ vyniku vajennych dziejańniaŭ pačatku 1990-ch zmahła ŭtrymać kantrol za hetym rehijonam.
19 vieraśnia 2023 hoda Azierbajdžan pačaŭ vajennuju apieracyju ŭ Nahornym Karabachu. Vynikam jaje stała viartańnie ŭsioj terytoryi rehijona pad svoj poŭny kantrol.
Što takoje Nahorny Karabach i što armianie z azierbajdžancami tam dzielać
Łukašenka choča zabudavać Nahorny Karabach ahraharadkami
Francyja abvinavačvaje Azierbajdžan u biesparadkach u Novaj Kaledonii