Uzmacnić miažu i zabyć? Što aznačaje dla Biełarusi žadańnie Polščy vydatkavać $2,5 miljarda na ŭzmacnieńnie miažy
Premjer-ministr Polščy Donald Tusk dniami zajaviŭ, što Polšča vyłučyć $2,5 miljarda na ŭzmacnieńnie ŭschodniaj miažy. Takoje rašeńnie padtrymlivajuć 64,3% apytanych palakaŭ.
24.05.2024 / 17:20
Ilustracyjny zdymak. Fota: Michal Dyjuk/AP
Jeŭropa admiažoŭvajecca ad nas i pakidaje sam-nasam z Rasijaj?
«My pačynajem vialiki prajekt budaŭnictva biaśpiečnaj miažy, uklučajučy sistemu ŭmacavańniaŭ, taki reljef miascovaści, ekałahičnyja rašeńni, jakija zrobiać hetuju miažu nieprydatnaj dla patencyjnaha voraha», — zajaviŭ Tusk.
Uličvajučy toje, što praciahłaść biełaruska-polskaj miažy składaje 398 kiłamietraŭ, možna mierkavać, što na jaje ŭzmacnieńnie spatrebicca nie tolki šmat hrošaj, ale i času.
Heta jak minimum namiakaje na toje, što ŭ Polščy ŭśviedamlajuć, što ŭ ahladnaj budučyni Biełaruś tak i zastaniecca krainaj, ad jakoj budzie sychodzić niebiaśpieka. Inšymi słovami — na chutkija demakratyčnyja pieramieny jany nie raźličvajuć.
«Palaki reahujuć na tyja vykliki, jakija jość siońnia»
Takija dziejańni z boku polskaha ŭradu, palityčny ahladalnik Radyjo Svaboda Valer Karbalevič traktuje nastupnym čynam:
«Palityki žyvuć siońniašnim dniom i vyrašajuć tyja zadačy i vykliki, jakija siońnia stajać pierad krainaj i ŭradam. Tamu jany nie mohuć kiravacca niejkimi pierśpiektyvami i nadziejami, jakija nieviadoma kali buduć realizavanymi. Heta nie palityčny padychod», — tłumačyć Karbalevič.
Valer Karbalevič. Fota: «Naša Niva»
Analityk adznačaje, što biełaruskaja miaža dla Polščy na siońnia sapraŭdy źjaŭlajecca realnaj prablemaj i pahrozaj. Napružańnie na miažy adbyvajecca, jak vajskovaje, tak i z dapamohaj mihrantaŭ.
Tamu, na dumku Karbaleviča, palaki reahujuć na tyja vykliki, jakija jość siońnia, a nie biaździejničajuć u spadziavańni na toje, što niekali situacyja moža źmianicca ŭ inšy bok, bo ŭ Biełarusi źmienicca režym.
Pry hetym ahladalnik ličyć, što kali raptam u Biełarusi adbuducca pieramieny, to prajekt možna budzie zharnuć.
«Bierlinski mur razburyli ŭ karotki čas. I tam ściana była bujniejšaja i macniejšaja za tuju, jakuju ciapier budujuć na miažy ź Biełaruśsiu», — pryvodzić prykład Karbalevič.
Ilustracyjny zdymak. Fota: «Naša Niva»
Jon kaža, što polski ŭrad adlustroŭvaje intaresy Polščy i polskaha hramadstva. Jon vyrašaje polskija nacyjanalnyja prablemy, a dumać pra Biełaruś i biełaruskija pierśpiektyvy — heta zadača biełarusaŭ, a nie polskaha ŭradu.
«Polščy i jaje ŭradu było b vyhadna, kab na ŭschodniaj miažy była demakratyčnaja, družalubnaja jeŭrapiejskaja Biełaruś, ale źmianić našu krainu jany nie ŭ ich siłach. Tamu jany robiać toje, što im pad siłu — uzmacniajuć miažu», — tłumačyć analityk.
Reakcyja na ahresiŭnyja pavodziny
Kamientujučy rašeńnie Polščy dać $2,5 miljarda na ŭzmacnieńnie miažy ź Biełaruśsiu, Valer Kavaleŭski adznačaje, što nam treba zrazumieć łohiku pryniaćcia rašeńniaŭ našymi susiedziami.
Valer Kavaleŭski. Fota: «Naša Niva»
«Dla ich (palakaŭ — «NN») biezumoŭnym pryjarytetam budzie biaśpieka svajoj krainy i hramadstva. Jany ŭvažliva sočać za padziejami ŭ Biełarusi, za tymi vajaŭničymi zajavami, jakija vydaje režym, bo iduć davoli niedvuchsensoŭnyja pahrozy na adras našych susiedziaŭ.
Navat pryznačeńnie novaha kiraŭnika Hienštaba samo pa sabie źjaŭlajecca peŭnym sihnałam taho, kudy moža razvaročvacca palityka režymu.
Vierahodna, jany ličać, što vybudoŭvańnie takoj žaleznaj zasłony na miažy ź Biełaruśsiu — heta dobraja ideja.
Ale moj pohlad — nijakaj žaleznaj zasłony pamiž Jeŭropaj i Biełaruśsiu jak jeŭrapiejskaj krainaj być nie pavinna».
Takuju pazicyju Kavaleŭski abhruntoŭvaje ŭ tym liku tym, što ŭmacavańnie miažy nie vyrašaje prablemy, bo režym taksama evalucyjanuje ŭ svaich represijach i pahrozach.
Fota: skryn ź videa
Treba vylečyć «chvarobu», a nie pabaroć tolki adzin ź simptomaŭ
«Možna siońnia inviestavać $2,5 miljarda, a praz dva hady vyśvietlicca, što treba dadać jašče $5 miljardaŭ. Tamu heta nie vyrašeńnie prablemy. My pavinny inviestavać u vyrašeńnie krynicy prablemy. A krynicaj usich prablem źjaŭlajecca režym Łukašenki».
Umacavańnie miažy Kavaleŭski nazyvaje taktyčnymi zachadami pa zabieśpiačeńni biaśpieki svaich krain.
«Mahčyma, vybudova ŭmacavańniaŭ na miažy dapamoža zmahacca ź simptomami, ale heta nie vylečvaje chvarobu».
Palityk ličyć, što całkam vyrašyć prablemu biaśpieki ŭ rehijonie možna tolki praz źjaŭleńnie demakratyčnaj Biełarusi. Mienavita źmienu režymu Łukašenki na demakratyčny Kavaleŭski nazyvaje tymi «lekami», jakija dapamohuć całkam vylečyć «chvarobu», a nie pieramahčy tolki adzin ź simptomaŭ.
Ilustracyjny zdymak. Fota: «Naša Niva»
Łukašenka sam nie choča, kab biełarusy źjazdžali na Zachad
«Pry hetym my ŭśviedamlajem, što vyzvaleńnie Biełarusi ad dyktatury i rasijskaha impieryjalizmu — heta najpierš abaviazak biełaruskaha naroda, bo kožny narod sam musić zmahacca za svaju svabodu i niezaležnaść. Ale tut nam patrebnaja dapamoha».
Ukraina atrymlivaje takuju dapamohu ŭ baraćbie suprać rasijskaj ahresii, ale i biełarusy jaje taksama zasłuhoŭvajuć, bo my taksama zmahajemsia i z dyktaturaj, i z rasijskaj ahresijaj, choć jana i adbyvajecca pa inšych lakałach z vykarystańniem inšych instrumientaŭ».
Palityk taksama vykazvaje mierkavańnie, što lubyja zasłony na šlachu Biełarusi i biełarusaŭ u Jeŭropu hrajuć na ruku Łukašenku. I tyčycca heta ŭ tym liku takich pobytavych pytańniaŭ, jak składanaści z atrymańniem viz.
«Łukašenka sam nie choča, kab ludzi bačyli źniešni śviet. Jon choča, kab ludzi nie źjazdžali z krainy, a zastavalisia faktyčna jaho rabami, pracavali, płacili padatki i nie leźli ŭ palityku. Jon nie choča, kab biełarusy jechali vučycca na Zachad. Tamu ciapier i zatrymlivajuć vydaču atestataŭ vypusknikam, kab jany nie mahli pastupać u zachodnija ŭniviersitety.
Tamu žaleznaja zasłona pamiž našaj krainaj i Jeŭropaj adnaznačna nie ŭ intaresach ludziej i nie ŭ intaresach Biełarusi», — upeŭnieny palityk.