U Breście za ŭdzieł u akcyi pratestu ŭ žniŭni 2020 hoda asudzili adrazu 8 čałaviek
Sud Maskoŭskaha rajona Bresta 20 traŭnia 2024 hoda vynies prysud vaśmi miascovym žycharam za ŭdzieł u žnivieńskaj akcyi pratestu pavodle č. 1 art. 342 Kryminalnaha kodeksa (aktyŭny ŭdzieł u hrupavych dziejańniach, jakija hruba parušajuć hramadski paradak), piša «Viasna».
22.05.2024 / 12:05
Pavodle viersii abvinavačvańnia, z 10 da 11 žniŭnia 2020 hoda, na toj momant niepaŭnaletnija Julija Šaranava, Mikita Vajciuk, Mikałaj Nikiciuk, a taksama Vasil Alaksiejuk, Hleb Klimovič, Vital Varfałamiejeŭ, Alaksandr Tysievič, Maksim Sobaleŭ, znachodzilisia na prajeznaj častcy praśpiekta Mašerava, bulvaraŭ Kasmanaŭtaŭ i Šaŭčenki, vuł. Savieckaj u Breście, «vykrykvali łozunhi, demanstravali pałotny bieła-čyrvona-biełaha koleru, hruba parušajučy hramadski paradak, naŭmysna pieraškadžali ruchu transpartnych srodkaŭ i narmalnamu funkcyjanavańniu pradpryjemstvaŭ dy arhanizacyj».
U sudovym pasiadžeńni ŭsie vinu pryznali całkam.
Paviedamlajecca, što Julija Šaranava ŭdzielničała ŭ akcyjach pratestu 16-hadovaj, a Mikitu Vajciuku i Mikałaju Nikiciuku było pa 17 hadoŭ. Taksama viadoma, što Maksim Sobaleŭ, Hleb Klimovič, Julija Šaranava asudžanyja ŭ tym liku pavodle «narkatyčnych» artykułaŭ.
U vyniku, Vital Varfałamiejeŭ, Alaksandr Tysievič, Vasil Alaksiejuk i Mikałaj Nikiciuk byli asudžanyja da dvuch hadoŭ kałonii va ŭmovach ahulnaha režymu kožny.
Mikitu Vajciuku pryznačany adzin hod kałonii va ŭmovach ahulnaha režymu.
Maksimu Sobalevu pavodle č. 1 art. 342 KK było pryznačana dva hady pazbaŭleńnia voli. Ale z nahody taho, što jon užo asudžany pavodle «narkatyčnaha» č. 4 art. 328 KK, šlacham častkovaha składańnia asnoŭnych pakarańniaŭ i poŭnaha dałučeńnia dadatkovaha pakarańnia, pryznačana 12 hadoŭ kałonii z adbyvańniem u papraŭčaj kałonii va ŭmovach uzmocnienaha režymu sa štrafam u sumie 3 200 rubloŭ.
Juliju Šaranavu za ŭdzieł u žnivieńskaj akcyi pratestu asudzili na paŭtara hady pazbaŭleńnia voli. Ale praz toje, što jana była asudžanaja pavodle č. 4 art. 328 KK, joj u vyniku pryznačana 13 hadoŭ kałonii va ŭmovach ahulnaha režymu sa štrafam u sumie 3 700 rubloŭ.
Hlebu Klimoviču pryznačana pavodle č. 1 art. 342 KK dva hady pazbaŭleńnia voli, i pa sukupnaści złačynstvaŭ šlacham pahłynańnia mienš strohaha pakarańnia bolš strohim, jamu kančatkova pryznačana pakarańnie ŭ vyhladzie pazbaŭleńnia voli na termin dva hady z adbyvańniem pakarańnia ŭ papraŭčaj kałonii va ŭmovach ahulnaha režymu.
Takoje rašeńnie vynies sudździa Jaŭhien Brehan.
Razam z ksiandzom Akałatovičam z Vałožyna zatrymali dvuch prychadžanaŭ. Adzin ź ich były vajskoviec
Žychara Rečycy zatrymali za kamientary
Palina Šarenda-Panasiuk nie vyjšła na svabodu. Jana znajšłasia ŭ Homielskim SIZA