ЗША ўвядуць візавыя санкцыі за падрыў дэмакратыі ў Грузіі
Пра гэта заявіў дзяржсакратар Энтані Блінкен.
25.05.2024 / 01:09
Энтані Блінкен. Фота: AP Photo / Alex Brandon
ЗША ўвядуць візавыя абмежаванні ў дачыненні да асоб, якія маюць дачыненне да падрыву дэмакратыі ў Грузіі.
Санкцыі закрануць адказных за «задушэнне грамадзянскай супольнасці і свабоды мірных сходаў у Грузіі з дапамогай гвалту або запалохвання і членаў іх сем'яў». Любы, хто падрывае дэмакратычныя працэсы або інстытуты ў Грузіі — у тым ліку, напярэдадні, падчас і пасля выбараў — можа быць пазбаўлены права атрымання амерыканскай візы і паездкі ў ЗША, паведамляе «Медуза» са спасылкай на дакумент Дзярждэпа.
Рашэнне знешнепалітычнага ведамства ЗША звязана з прыняццем грузінскім парламентам закона аб замежных агентах. На думку дзяржсакратара ЗША Энтані Блінкена, закон будзе душыць рэалізацыю свабоды аб'яднанняў і выказвання меркаванняў, перашкаджаць працы незалежных СМІ, а таксама стыгматызаваць арганізацыі, якія служаць грамадзянам Грузіі.
ЗША бачыць відавочныя прыкметы кампаніі запалохвання і прымянення гвалту для падаўлення мірнага іншадумства падчас пратэстаў супраць закона.
Еўрасаюз раней таксама заявіў пра магчымыя санкцыі праз закон аб замежных агентах. У Еўропе гучаць заклікі адмяніць бязвізавы рэжым і пазбавіць Грузію статусу кандыдата ў члены ЕС.
Прэзідэнт Грузіі заклікала Макрона прыехаць у Тбілісі на фоне пратэстаў
Прэзідэнтка Грузіі наклала вета на закон аб «замежных агентах»