U Biełarusi źmianili praviły ŭvozu aŭto z krain JEAES. Niekatorym pakupnikam daviadziecca dapłacić nie małyja hrošy
Z 1 lipienia 2024 hoda ŭ Biełarusi buduć pa-novamu naličvać utylzbor na aŭto, jakija ŭvoziacca ź JEAES. Heta praduhledžvaje pastanova Saŭmina №432 ad 18 červienia 2024 hoda.
23.06.2024 / 15:58
Ilustracyjny zdymak. Fota: «Naša Niva»
Kaho zakranuć źmieny?
Novaŭviadzieńni tyčacca tych aŭto, jakija pryjazdžajuć da nas ź inšych krain JEAES. To-bok z Rasii, Kazachstana, Armienii i Kyrhyzstana.
Kali z momantu razmytnioŭki transpartnaha srodku ŭ adnoj z krain JEAES prajšło mienš za hod, biełaruskija mytnyja orhany pry naličeńni ŭtylizacyjnaha zboru buduć abapiracca na ekśpiertnuju acenku koštu transpartnaha srodku.
U vypadku, kali mytny košt aŭto, zajaŭleny pry mytnym afarmleńni ŭ adnoj z krain JEAES, budzie mienšy za košt, nazvany ŭ zaklučeńni ab niezaležnaj acency, to suma, na jakuju pavialičvajecca staŭka ŭtylizacyjnaha zboru, vyznačajecca jak roznaść mytnych pošlin, padatkaŭ.
Vyličvać sumu dapłat buduć, sychodziačy z toj sumy, jakuju treba było b apłacić pry ŭmovie, što hety aŭtamabil ad pačatku razmytnivaŭsia b u Biełarusi z ulikam ekśpiertnaj acenki koštu (jana abapirajecca na rynkavy košt anałahičnych tavaraŭ u krainach nabyćcia).
Takim čynam mytnyja orhany buduć zmahacca z uchileńniem ad upłaty mytnych pošlin u poŭnym pamiery.
Ilustracyjny zdymak. Fota: «Naša Niva»
Mašyny, pryviezienyja z Kyrhyzstana, lepiej abychodzić bokam
Asnoŭnaj krainaj, praź jakuju ŭ Rasiju, a taksama i Biełaruś pastaŭlalisia aŭtamabili, razmytnienyja pa zanižanych taryfach, źjaŭlajecca Kyrhyzstan.
Mytnaje afarmleńnie ŭ Kyrhyzstanie tvaryła «cudy», pra što nieadnarazova havaryłasia ŭ ŚMI. Reč u tym, što ŭ adroźnieńnie ad Biełarusi kyrhyzstanskaja mytnia bieź jakich-niebudź dadatkovych acenak i ekśpiertyz razmytnivała aŭtamabili na padstavie danych imparcioraŭ.
Heta dazvalała pierahonščykam pry afarmleńni praz Kyrhyzstan zanižać realny košt aŭtamabila navat u 3-4 razy.
Mienavita pa hetaj pryčynie razmytnioŭka darahich aŭto va ŭzroście da troch hadoŭ praz Kyrhyzstan była navat bolš vyhadnaj, čym 50% dyskont dla invalidaŭ i šmatdzietnych pry afarmleńni pa 140-m ukazie ŭ Biełarusi.
Dla prykładu, kali pry afarmleńni aŭtamabila koštam 100 tysiač jeŭra va ŭzroście da 3 hadoŭ ilhotnaja razmytnioŭka ŭ Biełarusi abychodziłasia ŭ 24 tysiačy jeŭra, to ŭ Kyrhyzstanie možna było ŭkłaścisia ŭ 12-15 tysiač.
Ilustracyjny zdymak. Fota: «Naša Niva»
Niekatoryja ŭžo paśpieli atrymać prablemy
Miarkujučy pa infarmacyi ŭ profilnych ŚMI, u Biełarusi ŭžo chapaje tych, chto nabyŭ aŭtamabili, razmytnienyja ŭ Kyrhyzstanie, i ciapier maje składanaści z apłataj utylizacyjnaha zboru.
Važna adznačyć, što, pakul mytnia čakaje adkazu na zapyt ad svaich kyrhyzskich kaleh, aŭtamabili zachoŭvajucca na terytoryi SVCH, a heta pasłuha płatnaja.
Praz hetuju krainu da nas traplajuć novyja aŭtamabili z Kitaja i patrymanyja z Karei.
Vyhladaje, što paśla taho, jak u Rasii z 1 krasavika ŭviali źmieny ŭ miechanizm naličeńnia ŭtylizacyjnaha zboru za aŭto, razmytnienyja z zanižeńniem koštu abo vykarystańniem ilhot u inšych krainach JEAES, častka mašyn, razmytnienych pa šerych schiemach u Kyrhyzstanie, była pieranakiravanaja na biełaruski rynak.
Z ulikam taho, što dapłačvać roźnicu ŭ mycie daviadziecca z raźliku 100% taryfaŭ, a nie lhotnych pa 140-ukazie, navat kupla novaha «kitajca» za 20-30 tysiač dalaraŭ razmytnienaha praz Kyrhyzstan — abiarniecca dapłatami ŭ niekalki tysiač dalaraŭ.
Rehistravać aŭtamabili buduć pa-novamu. Źjaviacca mašyny ź viečnaj rehistracyjaj