Asanž zaklučyŭ ździełku z uładami ZŠA i byŭ vyzvaleny
Zasnavalnik WikiLeaks Džulijan Asanž pryznaŭ u amierykanskim sudzie vinu ŭ razhałašeńni vajskovych sakretaŭ, paśla čaho, zhodna z dasiahnutymi raniej z uładami ZŠA damoŭlenaściami, byŭ vyzvaleny.
26.06.2024 / 07:37
Zasnavalnik WikiLeaks Džulijan Asanž pakidaje fiederalny sud na Sajpanie, Maryjanskija astravy, u sieradu, 26 červienia 2024 h. Fota: AP Photo / Eugene Hoshiko
Pasiadžeńnie prachodziła ŭ Fiederalnym akruhovym sudzie na vostravie Sajpan u Cichim akijanie (terytoryja ZŠA), kudy Asanž prybyŭ z Łondana, piša BBC.
Paśla pryznańnia viny ŭ zmovie z metaj atrymańnia i vydavańnia sakretnych źviestak ab nacyjanalnaj abaronie sudździa Ramona Manhłona zajaviła, što budzie «spraviadlivym i razumnym» zaličyć u jakaści terminu pakarańnia 62 miesiacy, jakija Asanž pravioŭ u łondanskaj turmie strohaha režymu «Biełmarš», asprečvajučy ekstradycyju ŭ ZŠA.
Bolš surjoznyja abvinavačvańni, jakija pahražali doŭhim turemnym terminam, z Asanža byli źniatyja.
«Vy zmožacie vyjści z hetaj zały suda svabodnym čałaviekam», — skazała sudździa paśla zakančeńnia pasiadžeńnia.
Sprava suprać Asanža spynienaja, amierykanskija ŭłady taksama adklikali svoj zapyt ab ekstradycyi.
Astraŭnaja terytoryja dla ŭhody była abranaja nie vypadkova — jak havaryłasia ŭ sudovych dakumientach, Asanž nie chacieŭ pryznavać vinu na kantyniencie, akramia taho, vostraŭ Sajpan znachodzicca adnosna niedaloka (3200 km) ad Aŭstralii, kudy ciapier adpravicca zasnavalnik WikiLeaks.
U najbližejšy čas Asanž vylecić u aŭstralijskuju stalicu Kanbieru.
Džulijana Asanža vyzvalili z turmy ŭ Łondanie, u jakoj jon adbyŭ piać hadoŭ
Džulijan Asanž paprosić adpuścić jaho z turmy na pachavańnie Viŭjen Viestvud
Brytanija ŭchvaliła vydaču Asanža ŭ ZŠA