Ci mieŭ racyju Łukašenka, nazyvajučy zachodnich palitykaŭ biaździetnymi?
Ci sapraŭdy «ich rod zakančvajecca»?
03.07.2024 / 10:38
Sprava naleva: prezident Francyi Emanuel Makron, prezident ZŠA Džo Bajden, premjer-ministr Japonii Fumio Kišyda, premjer-ministr Kanady Džaścin Trudo, staršynia Jeŭrakamisii Ursuła fon der Lajen, premjer-ministr Vialikabrytanii Ryšy Sunak, prezident Jeŭrapiejskaha Savieta Šarl Mišel, kancler Hiermanii Ołaf Šolc i Premjer-ministr Italii Džordžyja Miełoni hladzić demanstracyju skačku z parašutam padčas samitu lidaraŭ krain G7 u Borha-Ehnacyja, Italija, čaćvier, 13 červienia 2024 h. Fota: AP Photo/Luca Bruno
Łukašenka ličyć, što «ŭ avanhardzie antybiełaruskaj, antyruskaj palityki stajać biaździetnyja palityki». Ale fakty śviedčać ab tym, što nie ŭsio tak adnaznačna.
Sapraŭdy, siarod kiraŭnikoŭ viadučych krain Zachadu jość niekalki tych, u kaho niama dziaciej. Heta, naprykład, fiederalny kancler Hiermanii Ołaf Šolc i prezident Francyi Emanuel Makron. Adnak u žonki Makrona jość dzieci ad papiaredniaha šlubu.
Nie maje dziaciej i 57-hadovy Mark Rute, jaki z kastryčnika zojmie pasadu hienieralnaha sakratara NATA. Mužčyna zastajecca chałaściakom. A voś jaho papiarednik na pasadzie Jens Stałtenbierh vyhadavaŭ dźviuch dačok.
Stolki ž dačok u prezidenta Litvy Hitanasa Naŭsiedy, staršyni Jeŭrapiejskaj rady Šarla Mišela, premjer-ministra Vialikabrytanii Ryšy Sunaka i byłoha prezidenta ZŠA (2009-2017) Baraka Abamy.
Troje synoŭ u premjer-ministra Japonii Fimia Kišydy. Dvuch synoŭ i dačku haduje premjer-ministr Kanady Džaścin Trudo.
Syna i dačku maje prezident Ukrainy Uładzimir Zialenski. Adna dačka ŭ prezidenta Polščy Andžeja Dudy i premjer-ministra Italii Džordžy Miełoni (narodžanaja nie ŭ šlubie).
Dvojčy byŭ žanaty prezident ZŠA Džo Bajden. Ź pieršaj žonkaj u jaho było dvoje synoŭ i dačka. Dačka zahinuła ŭ aŭtakatastrofie razam z maci ŭ 1972 hodzie. A druhi syn pamior ad ankałohii va ŭzroście 46 hadoŭ u 2015 hodzie. Ad druhoha šlubu ŭ Bajdena adna dačka.
Jeść siarod zachodnich palitykaŭ i šmatdzietnyja baćki. Naprykład kiraŭnica Jeŭrakamisii Ursuła fon der Lajen — maci siami dziaciej (dvuch synoŭ i piaci dačok).
Kiraŭnica Jeŭrakamisii Ursuła fon der Lajen sa svaimi siamiu dziećmi
Šmatdzietnym baćkam źjaŭlajecca i były premjer-ministr Vialikabrytanii Barys Džonsan, jaki byŭ žanaty trojčy. U druhim šlubie ŭ Džonsana naradziłasia čaćviora dziaciej — dźvie dački i dva syny. U trecim šlubie — dva syny i dačka. Akramia hetaha, u Džonsana jość adna pazašlubnaja dačka.
Piać dziaciej maje Donald Tramp. Ad pieršaha šlubu ŭ jaho troje dziaciej (syn i dźvie dački). Ad druhoha — dačka. Treciaja žonka, jakaja małodšaja za jaho na 24 hady, naradziła palityku syna.
Jak bačym, «hien nianaviści», ab jakim havaryŭ u svaim vystupie Łukašenka, zachodnim palitykam budzie kamu pieradać u spadčynu.
Demahrafičnaja katastrofa. Uzrovień naradžalnaści ŭ Biełarusi apuściŭsia nižej za vajennyja časy
U Biełarusi niedastatkova moładzi i zusim mała dziaciej. U čym pryčyny?