Polskaja mytnia patłumačyła, čamu biełarusam nie dazvalajuć vyvozić tavary
Novy pakiet sankcyj ES raspaŭsiudžvajecca na tavary, nabytyja fizičnymi asobami ź Biełarusi ŭ roźnicu na terytoryi Jeŭrasajuza i vyvoziacca za miežy ES. Pra heta havorycca ŭ adkazie mytnaj słužby Polščy na zapyt redakcyi vydańnia Most.
08.07.2024 / 20:17
«Nacyjanalnaja padatkovaja administracyja ažyćciaŭlaje kantrol u adpaviednaści ź dziejnym zakanadaŭstvam. U pryvatnaści, my kantralujem zachavańnie zabaronaŭ na vyvaz z Polščy i ŭvoz u Polšču tavaraŭ, jakija padpadajuć pad sankcyi ES.
Mytnyja dekłaracyi praviarajucca ŭ dačynieńni da fizičnych i jurydyčnych asob, na jakich raspaŭsiudžvajucca sankcyi ŭ adpaviednaści z normami Jeŭrapiejskaha Sajuza, — zajaviŭ Most pres-sakratar Lublinskaha adździaleńnia Padatkovaj administracyi Polščy Michał Dzieruś.
Dalej jon pryvioŭ śpis dakumientaŭ, na padstavie jakich robicca kantrol. Heta rehłamienty Jeŭrasajuza, pryniatyja ŭ suviazi z ahresijaj suprać Ukrainy: 8333/2014, 765/2006 i 269/2014. Jon taksama nahadaŭ, što śpis zabaronienych da vyvazu tavaraŭ byŭ dapoŭnieny rehłamientam 2024/1865 ad 29 červienia 2024 hoda.
«U abaviazki mytnaj i fiskalnaj słužby na hetym učastku źniešniaj miažy Jeŭrapiejskaha Sajuza, akramia zvyčajnaha pamiežnaha kantrolu, uvachodzić taksama zabieśpiačeńnie taho, kab sankcyi, uviedzienyja suprać Rasii i Biełarusi, nie parušalisia.
U suviazi z hetym zakanadaŭstva abaviazvaje supracoŭnikaŭ, jakija dziažurać na dziaržaŭnaj miažy, pravodzić dbajnyja i pracajomkija pravierki. Takija pravierki ŭklučajuć, u pryvatnaści:
- dbajny analiz supravadžalnaj dakumientacyi;
- pravierku, ci adpaviadaje mytnaja dekłaracyja rehłamientam i dadatkam da ich, što tyčacca sankcyjnych tavaraŭ;
- pry najaŭnaści padstaŭ — fizičny dahlad, — havorycca ŭ kamientary Michała Dzierusia.
Jon źviarnuŭ uvahu, što pryniatyja 29 červienia źmianieńni pašyryli śfieru prymianieńnia ŭžo najaŭnych sankcyj u dačynieńni da Biełarusi, a taksama pieralik subjektaŭ, da jakich pavinny prymianiacca abnoŭlenyja pałažeńni.
«Heta aznačaje, što adrasatami normaŭ na impart i ekspart źjaŭlajucca taksama fizičnyja asoby, jakija pieramiaščajuć tavary, nabytyja ŭ roźnicu», — prakamientavaŭ Dzieruś.
4 lipienia Polšča stała razvaročvać fizičnych asob, jakija sprabavali vyvieźci ŭ Biełaruś nabytyja ŭ ES tavary. Šmatlikija turysty nie zmahli aformić na miažy viartańnie PDV i pierasiekčy miažu z tavaram, paśla čaho stali zdavać u kramy techniku, adzieńnie, abutak i inšyja pakupki.
Inšyja padarožniki ŭsio ž zdoleli pravieźci tavary dla asabistaha karystańnia, u tym liku pradukty charčavańnia, myjnyja srodki, adzieńnie.
Čarha ŭ Polšču amal źnikła, ale ludzi ŭsio adno stajać pa 10 hadzin. Jak tak?
Čamu Polšča zabaraniła vyvaz tavaraŭ fizičnym asobam i jakija tavary ciapier nielha pravieźci?
Polšča ŭviała zabaronu na vyvaz mnohich tavaraŭ u Biełaruś dla fizičnych asob
Na miažy z Polščaj całkam źnikła čarha ź lehkavikoŭ. Što adbyvajecca?