«Avijakampanija apłaciła adpačynak». Biełaruski raskazali, jak lohka i prosta dabilisia kampiensacyi za zatrymku rejsa
U kancy červienia siabroŭki Nastaśsia i Ksienija vyrašyli zładzić sabie nievialiki adpačynak — źlotać u Budapiešt. Kupili kvitki na rejs avijakampanii Wizz Air z Varšavy, zabraniravali hatel. Vylet byŭ zapłanavany na 8.10 ranicy, ale ŭ vyniku rejs zatrymali na šeść hadzin. Historyja pačynałasia nie vielmi dobra, ale ŭ vyniku dziaŭčaty zastalisia zadavolenyja: uvieś košt pajezdki pakryŭ avijapieravozčyk. Jak atrymać kampiensacyju za zatrymku i nie pazbavicca značnaj častki vypłaty, Ksienija raskazała vydańniu Most.
11.07.2024 / 23:42
Zdymak ilustracyjny. Fota: Jakub Porzycki/NurPhoto via Getty Images
Pieršaje paviedamleńnie pra zatrymku rejsa dziaŭčaty atrymali nočču napiaredadni pajezdki — čas vyletu ssunuli na 13.25. Siabroŭki žyvuć u Varšavie, tamu vialikich niazručnaściaŭ hetaja navina nie vyklikała — vyrašyli paźniej vyjechać u aeraport.
Ranicaj pryjšło jašče adno paviedamleńnie: vylet pieranieśli ŭžo na 14.05.
Tałony na charčavańnie
Dziaŭčaty prajšli elektronnuju rehistracyju i da 11-j ranicy pryjechali ŭ aeraport. Da taho momantu jany ŭžo viedali, što, pakolki rejs pieranieśli bolš čym na dźvie hadziny, im naležać tałony na charčavańnie. Pajšli daviedvacca, jak ich atrymać.
Tałony vydavali supracoŭniki, jakija absłuhoŭvajuć rejs. I tut Ksienija źviartaje ŭvahu pasažyraŭ, jakija mohuć apynucca ŭ padobnaj situacyi: tałony na charčavańnie vydavali nie pa zmoŭčańni, a pa prośbie pasažyra. Dziaŭčaty atrymali dva vaŭčary na 51 złoty kožny.
Kampiensacyja za zatrymku
«Za 30-40 chvilin da pačatku pasadki da nas padyšoŭ małady čałaviek. Nie pradstaviŭsia. Skazaŭ, što źbiraje danyja pasažyraŭ, kab padacca na kampiensacyju. My biez asablivych pytańniaŭ dali jamu numary telefonaŭ. Małady čałaviek skazaŭ, što nam pryjdzie paviedamleńnie sa spasyłkaj, pa jakoj treba budzie pierajści i niešta zapoŭnić», — raskazvaje Ksienija.
Tak siabroŭki daviedalisia, što im naležyć kampiensacyja. Zhodna z Rehłamientam ES 261/2004, pasažyry majuć prava na kampiensacyju ŭ vypadku zatrymki rejsa nie mienš čym na try hadziny (spaźnieńnie ličycca pa časie prybyćcia ŭ punkt pryznačeńnia).
Pamier kampiensacyi zaležyć ad adlehłaści palotu:
- 250 jeŭra — dla rejsaŭ da 1500 kiłamietraŭ;
- 400 jeŭra — dla rejsaŭ ad 1500 da 3500 kiłamietraŭ;
- 600 jeŭra — dla rejsaŭ bolš za 3500 kiłamietraŭ.
Rejs z Varšavy ŭ Budapiešt — karotki, tamu pasažyry mahli pretendavać na kampiensacyju ŭ pamiery 250 jeŭra.
Pasłuhi pasiarednika nie biaspłatnyja
Kali dziaŭčaty viarnulisia z adpačynku, ubačyli, što im sapraŭdy vysłali infarmacyju pra kampiensacyi i spasyłku dla zapaŭnieńnia formy. Ale prajšoŭšy pa joj, źviarnuli ŭvahu, što dasłała jaje ahienctva.
Aznajomiŭšysia z rehłamientam pasiarednika, jany daviedalisia, što, kali avijakampanija prymie rašeńnie ab vypłacie kampiensacyi, ahienctvu dastaniecca 25% srodkaŭ. Akramia taho, 50 jeŭra składzie administracyjny zbor za pieradaču prava na pretenziju — heta treba, kali pasažyr padaje zajaŭku na vypłatu srodkaŭ nie sam, a praź inšuju asobu.
Dziaŭčaty vyrašyli, što spraviacca z padačaj zajavy na kampiensacyju sami. Nie ź pieršaj sproby, ale ŭsio ž znajšli na sajcie avijakampanii formu i zapoŭnili jaje kožnaja za siabie (kab nie hublać 50 jeŭra za pieradaču prava na pretenziju). Zrabić heta akazałasia nieskładana.
«Ciaham dnia było vyniesiena stanoŭčaje rašeńnie ab kampiensacyi. Heta było ŭ sieradu. A ŭ piatnicu 250 jeŭra ŭžo pryjšli na rachunak u ekvivalencie ŭ złotych», — raskazvaje Ksienija. Anałahičnuju kampiensacyju atrymała i Nastaśsia.
Uličvajučy, što kvitki kaštavali 126 jeŭra, a žyllo braniravałasia tolki na dźvie nočy, srodki całkam pakryli vydatki dziaŭčat na pajezdku.
«Avijakampanija apłaciła nam adpačynak», — reziumuje Ksienija.
Jak samastojna spłanavać avijapadarožža i nie prahadać? Biełarusy padzialilisia łajfchakami
Roźnica — da 2000 rubloŭ. Paraŭnoŭvajem ceny na pieraloty ź Minska i susiednich stalic