U Azierbajdžanie aryštavali stryječnaha brata komika Idraka Mirzalizade. Byłoha vykładčyka BDU padazrajuć u dziaržzdradzie
Ihbał Abiłaŭ sprabavaŭ vylecieć z Baku, jamu nie dazvolili sieści na samalot.
26.07.2024 / 13:02
Fota: oxu.az
U Azierbajdžanie zatrymali daśledčyka Ihbała Abiłava — stryječnaha brata viadomaha biełaruskaha komika Idraka Mirzalizade.
22 lipienia Ihbała zatrymali ŭ vioscy Bała Kałatan supracoŭniki Dziaržaŭnaj słužby biaśpieki (DSB). Jon pryjechaŭ u Azierbajdžan 14 červienia, kab prysutničać na viasielli svajho kuziena.
Pieršapačatkova jaho zatrymali miesiac tamu, 22 červienia, ale paśla dopytu adpuścili. 27 červienia, kali jon sprabavaŭ vylecieć z Baku na šlachu ŭ Biełaruś, jamu nie dazvolili sieści na samalot, zabraŭšy jahony pašpart i dva telefony.
22 lipienia Abiłava znoŭ vyklikali ŭ adździeł DSB pad padstavaj viartańnia jaho pašparta i telefonaŭ. Adnak, nie paviedamiŭšy ničoha jaho rodnym, Abiłava dastavili ŭ Baku.
Paśla baćkam paviedamili, što Ihbał padazrajecca pa artykułach 274 (dziaržaŭnaja zdrada), 281.3 (publičnyja zakliki, nakiravanyja suprać dziaržavy, učynienyja pa zadańni zamiežnych arhanizacyj abo ich pradstaŭnikoŭ) i 283.1 (raspalvańnie nacyjanalnaj, rasavaj, sacyjalnaj abo relihijnaj nianaviści i varožaści) Kryminalnaha kodeksa Azierbajdžana.
Pa słovach svajakoŭ Abiłava, jon byŭ zatrymany pa nadumanych abvinavačvańniach, a sapraŭdnaj pryčynaj jaho pieraśledu źjaŭlajecca jaho daśledavańnie roznych nacyjanalnych mienšaściaŭ, uklučajučy tałyšaŭ Azierbajdžana.
24 lipienia na čas śledstva Ihbała źmiaścili pad čatyrochmiesiačny aryšt biez mahčymaści bačycca ź blizkimi.
Ihbał Abiłaŭ naradziŭsia ŭ 1989 hodzie. Jon — navukovy daśledčyk, hałoŭny redaktar «Vieśnika Tałyšskaj nacyjanalnaj akademii» i člen Tałyšskaj nacyjanalnaj akademii.
Z rańniaha dziacinstva Ihbał pražyvaje ŭ Biełarusi. U 2012 h. skončyŭ fakultet mižnarodnych adnosin BDU, mahistraturu i aśpiranturu. Siem hadoŭ vykładaŭ u BDU i Biełaruskim instytucie pravaznaŭstva. Maje publikacyi ŭ halinie historyi i etnahrafii Paŭdniovaha Kaŭkaza, Turcyi i Irana.
Jon źjaŭlajecca hałoŭnym redaktaram «Vieśnika Tałyšskaj nacyjanalnaj akademii» — mižnarodnaha navukovaha časopisa, pryśviečanaha navukovamu vyvučeńniu narodnaści tałyšaŭ.