Čatyry biełaruskija filmy, jakija vy nie bačyli
Tynejdžerskaja drama, dakumientalnaje daśledavańnie, sacyjalna-fantastyčny tryler — u anłajn-kinateatry VODBLISK za miesiac dadałosia niekalki biełaruskich filmaŭ.
13.08.2024 / 16:30
Kadr ź filma «Małanka»
«Leta 1989»
Napeŭna, u vašym śpisie «prahledžana» značycca daloka nie adziny amierykanski sieryjał i film pra padletkaŭ. A ci šmat vy bačyli biełaruskich filmaŭ pra hety adnačasova cudoŭny i žudasny ŭzrost, praź jaki ŭsie prachodziać? Režysior Uładzimir Kazłoŭ źniaŭ taki film z nazvaj «Leta 1989».
Padziei čorna-biełaj stužki pieranosiać hledača u kaniec lipienia 1989 hoda, u BSSR. Piaciora siabroŭ razam vypraŭlajucca ŭ pachod, kab adpačyć paśla vypusknych i ŭstupnych ispytaŭ. Znachodziačysia «na parozie» sapraŭdnaha darosłaha žyćcia, siabry abmiarkoŭvajuć hety novy pieryjad, dzielacca svaimi nadziejami i čakańniami. Miž tym adpačynak pierarastaje ŭ jašče adzin ispyt…
«Kraj śvietu»
Hanna Saŭčanka u filmie «Kraj śvietu» dakumientuje historyi ludziej, jakija žyvuć na pamiežžy Biełarusi i Litvy. Tych, čyjo žyćcio niepaźbiežna mianiajecca z zakryćciom miažy. Kab pa-raniejšamu zavitać da svajakoŭ i siabroŭ, naviedać kaścioł ci mohiłki, im treba pradracca praź biurakratyčnaje piekła raskładaŭ, dazvołaŭ i vizaŭ. Heta takoje dakumientalnaje daśledavańnie, jakoje raskazvaje pra dźvie absalutna roznyja kancepcyi svabody: pra tuju, jakaja jość u Jeŭropie, i pra tuju, što ŭ Biełarusi.
U filmie navat jość scena, u jakoj źjaŭlajecca Aleś Bialacki, zasnavalnik Pravaabarončaha centra «Viasna», łaŭreat Nobieleŭskaj premii miru 2022 hoda.
«Dziońnik Anastasii»
Ci pamiatajecie trek, što źjaviŭsia ŭ pačatku hetaha leta, paśla prasłuchoŭvańnia jakoha na repicie krucicca ŭ hałavie: «Oj nie kažy, nie kažy ty mnie, chto ja»? Režysior Maksim Bujnicki ŭ 2022 hodzie źniaŭ film pra aŭtarku taho samaha treka, a taksama mastačku Anastasiju Rydleŭskuju.
Stužka «Dziońnik Anastasii» stała sapraŭdnaj dakumientalnaj spoviedździu ab žyćci ŭ emihracyi i tych ciažkaściach, jakija jana z saboj niasie. Film atrymaŭ Śpiecyjalnuju zhadku žury na kinafiestyvali «Paŭnočnaje źziańnie — 2023».
«Małanka»
«Małanka» — ihravy film Ahaty Michajłavaj u žanry fantastyčnaha realizmu. Stužka źniata pa matyvach apovieda biełaruskaha piśmieńnika Valera Hapiejeva «Aŭtobus». U mietafaryčnaj formie apisany žachi i kompleksy sučasnaha biełaruskaha hramadstva, niaŭpeŭnienaść i raźjadnanaść, jakija źnikajuć u adpaviednuju ekstremalnuju chvilinu. «Małanka» atrymała ŭznaharody za najlepšy scenar i mastackija rašeńni na kinafiestyvali ŭ Jerevanie.
Pa siužecie 11 roznych pasažyraŭ razam jeduć z maleńkaha miastečka ŭ Minsk. Raptam u ich aŭtobus traplaje małanka — ciapier jon jeździć tolki pa kole i nie moža spynicca. Hetyja abstaviny vymušajuć hierojaŭ abjadnacca dziela vyzvaleńnia. Pytańnie ŭ tym: ci atrymajecca heta ŭ ich?
U Biełarusi prahlad dastupny biaspłatna. Kali vy žyviacie pa-za Biełaruśsiu, to možacie luby z hetych filmaŭ pahladzieć za 5$.