Aryna Sabalenka trapiła ŭ top samych vysokaapłatnych tenisistaŭ. Kolki jana zarabiła za hod?
Forbes skłaŭ top-10 samych vysokaapłatnych tenisistaŭ śvietu — mužčyn i žančyn. U rejtynh trapiła i biełaruskaja rakietka Aryna Sabalenka.
24.08.2024 / 16:57
Aryna Sabalenka. Fota: Asanka Brendon Ratnayake / AP
Jaje dachod za apošni hod Forbes acaniŭ jak 13,7 młn dalaraŭ: ź ich 6,7 młn dalaraŭ — zarobak na korcie, 7 młn — dachod ad inšaj dziejnaści.
Vyjhraŭšy ŭ studzieni druhi zapar tytuł čempijonki Australian Open, Sabalenka prapuściła Uimbłdon z-za traŭmy plača i vyrašyła prapuścić Alimpijskija hulni, kab adpačyć. Ale jana viarnułasia i vyjhrała Adkryty čempijanat Cyncynaci ŭ žniŭni. Spartsmienka viarnułasia na 2-je miesca ŭ adzinočnym rejtynhu.
Akramia tenisa, Aryna supracoŭničaje ź sietkaj kram Oakberry (i sustrakajecca ź jaje ŭładalnikam brazilskim biznesoŭcam Hieorhijasam Franhulisam) i brendam navušnikaŭ Master & Dynamic.
U rejtynhu Sabalenka zaniała 10 miesca.
Samym vysokaapłatnym tenisistam za hod staŭ ispaniec Karłas Alkaras (dachod za hod — $42,3 młn), za im — sierbski hulec Novak Džokavič ($37,2 młn). Treci radok za amierykanskaj tenisistkaj Kory Haŭf ($27,1 młn). Pieršaja rakietka śvietu polka Iha Śviontak na čaćviortym miescy z hadavym dachodam $26,7 młn.
Jak vyličvali dachod? Danyja ab dachodach na korcie — heta pryzavyja i bonusy za alimpijskija miedali, sabranyja za apošnija 12 miesiacaŭ, pačynajučy z Adkrytaha čempijanatu ZŠA 2023 hoda, i akruhlenyja da bližejšych 100 000 dalaraŭ. Acenki dachodaŭ nie ad tenisu rabili na padstavie hutarak ź insajderami haliny i adlustroŭvajuć dachod (akruhleny z dakładnaściu da 1 miljona dalaraŭ) ad rekłamy, vystupleńniaŭ, licenzij i pamiatnych rečaŭ, a taksama hrašovyja pastupleńnia ad biznesu.
Sabalenka raspaviała, što jana adčuła paśla śmierci Kalcova
Aryna Sabalenka ŭpieršyniu sa studzienia vyjhrała turnir