Аўтобусы з Варшавы ў Мінск спазняюцца з выездам на 13 гадзін
Што са становішчам на межах з Літвой і Польшчай па стане на 08:00 і з выездам з пунктаў прызначэння?
26.08.2024 / 08:29
Ілюстрацыйнае фота
На памежным пераходзе «Брэст» на польскай мяжы па стане на 08:00 панядзелка стаіць 70 аўтобусаў (у чацвер даходзіла да 108) і 550 легкавікоў.
Чаканне аўтобуса можа расцягнуцца на 30-40 гадзін.
На літоўскай мяжы ў «Каменным Логу» чаргі з аўтобусаў перад заездам у зону чакання няма, але стаіць 30 легкавікоў.
У «Беняконях» і «Грыгараўшчыне» чэргаў з легкавікоў і аўтобусаў няма.
Разам з тым тэлеграм-канал Мінсктранса паведамляе, што аўтобус Варшава — Мінск, які павінен быў выехаць са сталіцы Польшчы ўчора а 21-й, будзе выконваць рэйс сёння а 10-й з-за працяглага праходжання межаў. І пасажыры, якія павінны былі ехаць а 23-й і а 7-й, могуць скарыстацца паездкай пры наяўнасці свабодных месцаў (аўтобус АС5278-7).
Аўтобус Варшава — Мінск, які павінен быў адправіцца з Варшавы а 23-й учора, выедзе сёння а 12-й. Пасажыры на 07:00 і 12:00 могуць скарыстацца паездкай пры наяўнасці свабодных месцаў (аўтобус АС5278-7).