Беларускіх старшакласнікаў навучаць праводзіць допыты
Міністэрства адукацыі пастановай №87 ад 19 ліпеня зацвердзіла абноўленую праграму факультатыва «Гатовы Радзіме служыць!» для вучняў X-XI класаў. Дакумент сёння апублікаваны на Нацыянальным прававым інтэрнэт-партале і ўступае ў сілу з 1 верасня, заўважыла Reform.news.
31.08.2024 / 20:19
Мінскія старшакласнікі падчас наведвання Акадэміі МУС. Фота: amia.by
Калі ў папярэдняй рэдакцыі праграма факультатыва павінна была пазнаёміць навучэнцаў толькі з асновамі вайсковай справы, то цяпер у ёй прадугледжаны профілі па спецыяльнасцях цэлага шэрагу сілавых ведамстваў.
У новай рэдакцыі праграма разлічаная на 69 гадзін: 35 гадзін у 10-м класе і 34 гадзіны ў 11-м. Яна скарочаная на 1 гадзіну ў выпускным класе ў параўнанні з дзейнай.
Праграма складаецца з агульнага модуля «Нацыянальная бяспека дзяржавы. Абарона Айчыны — доўг і абавязак грамадзяніна» (22 гадзіны) і варыятыўных модуляў «Вайсковая справа», «Будучы памежнік», «Будучы мытнік», «Будучы следчы», «Будучы выратавальнік», «Будучы ахоўнік правапарадку» (47 гадзін).
У рамках асноўнага модуля прадугледжана знаёмства вучняў з вытокамі і станаўленнем беларускай дзяржаўнасці, гераічнай гісторыяй краіны. Таксама будуць праводзіцца заняткі па тапаграфічнай падрыхтоўцы, інфармацыйнай бяспецы, медпадрыхтоўцы, фізічнай падрыхтоўцы.
У рамках варыятыўных модуляў школьнікаў будуць знаёміць са спецыфікай праходжання службы ва Узброеных сілах, Дзяржпагранкамітэце, Дзяржаўным мытным камітэце, Следчым камітэце, МНС і органах унутраных спраў.
Напрыклад, модуль «Будучы следчы» прадугледжвае засваенне навучэнцамі практычных прыёмаў і навыкаў правядзення «асобных следчых дзеянняў (допыту, вочнай стаўкі, прад'яўлення для апазнання, агляду месца здарэння)», а модуль «Будучы мытнік» — «духоўна-маральнае выхаванне, фарміраванне маральна-псіхалагічнай гатоўнасці да службы ў мытных органах».
Кожны варыятыўны модуль прадугледжвае знаёмства з нарматыўна-прававой базай працы ў сілавых ведамствах: напрыклад, будучым следчым будуць выкладаць асновы крымінальнага права, а мытнікам — мытнага заканадаўства.
Прадугледжаныя заняткі і па фізічнай падрыхтоўцы, страявой і стралковай падрыхтоўцы для будучых вайскоўцаў, памежнікаў і міліцыянераў, пры гэтым праграма для памежнікаў змяшчае і заняткі па метадах выжывання ў экстрэмальных сітуацыях.
Будучым выратавальнікам давядзецца пазнаёміцца з тэхнічным абсталяваннем МНС, а таксама метадам працы пры надзвычайных сітуацыях.
Трэба адзначыць, што гэта не адзіны факультатыў, у рамках якога старшакласнікі могуць пазнаёміцца з методыкай вядзення допыту. У студзені гэтага года Мінадукацыі зацвердзіла праграму факультатыва «Вайсковы пераклад» па вучэбным прадмеце «Англійская мова». Яна прадугледжвае, што школьнікі змогуць у выніку «ажыццяўляць двухбаковы пераклад гутаркі або допыту ваеннапалоннага (апытанне мясцовага жыхара)».
«А галаву ты дома не забыў?» Паглядзелі, пачым сёлета прадаюць кветкі да Дня ведаў
У школах Беларусі будуць праводзіць «ранішнія фільтры». Што гэта такое?
Беларуская школа ў Варшаве запрашае на навучанне беларускіх дзетак з розных краін свету
Лукашэнка: Настаўнік — гэта чалавек прэзідэнта