Jak rasijskija vajskoŭcy pierastralali adzin adnaho — dramatyčnaja historyja z-pad Łuhanska
Rasijskija śledčyja razabralisia ŭ abstavinach zabojstva čatyroch vajskoŭcaŭ z Baškartastana, jakoje adbyłosia ŭ žniŭni 2023 hoda.
08.09.2024 / 19:35
Rasijskija vajskoŭcy, ilustracyjnaje fota AP Photo / Alexei Alexandrov
Hałoŭny piersanaž u historyi — lejtenant Ramil U. z pazyŭnym Samuraj, jaki kiravaŭ atradam «Vatan», piša rasijskaja «Baza».
Hety Samuraj pryjechaŭ u punkt dysłakacyi svajho atrada, pastroiŭ padnačalenych i abraŭ ź ich tych, chto, na jaho dumku, byli pjanymi. Naličyłasia siem čałaviek — Śviaty, Raf, Jakudza, Fiks, Ren, Kir i Mucha. Jak pakazała paśla ekśpiertyza, jak minimum Jakudza i Raf byli całkam ćviarozyja.
Samuraj vyrašyŭ žorstka pakarać padnačalenych: pa jaho zahadzie ŭ ich adabrali zbroju, kožnaha pryviazali da dreva i źbili. Źbivaŭ i jon sam — prykładam, nahami i pałkaj. Paśla hetaha sieŭ sa svaim kiroŭcam Rucham u hruzavik i źjechaŭ. Ale historyja tolki pačynałasia.
Praz čas Samuraju patelefanavaŭ adzin z vajskoŭcaŭ i paviedamiŭ, što niekalki čałaviek, pryviazanych da drevaŭ, zmahli vyzvalicca. A nieŭzabavie na darozie jon sustreŭ inšych vajskoŭcaŭ, jakija raskazali, što ŭ jaho łahiery adbyłosia zabojstva — zahinuŭ vajskoviec z pazyŭnym Artyst. Chto mienavita zabiŭ Artysta, lejtenant vyśviatlać nie staŭ — ustanaviŭ na kuzaŭ hruzavika kulamiot i zahadaŭ kiroŭcu jechać nazad.
Pryjechaŭšy da łahiera, Samuraj staŭ kryčać, kab usie tyja, chto adviazalisia i schavalisia ŭ lesie, vyjšli, inakš jon adkryje ahoń z kulamiota. Pakazalisia troje: Śviaty, Raf i Jakudza. Lejtenant pačaŭ pytacca pra zabitaha Artysta, ale tyja ničoha nie adkazali. Tady Samuraj znoŭ pryviazaŭ ich da dreŭ i źbiŭ. Prykładna ŭ hety čas znajšli cieła Artysta.
Tady Samuraj zahadaŭ pahruzić cieła zahinułaha i ledź žyvych Śviatoha, Rafa i Jakudzu ŭ hruzavik. Vidavočcam jon paviedamiŭ, što źbityja ździejśnili asabliva ciažkaje złačynstva, tamu ich treba vyvieźci ŭ štab.
Adnak nasamreč ich vyvieźli ŭ les. Tam Samuraj uziaŭ niekalki hranat i padarvaŭ padnačalenych. Dvoje zahinuli adrazu, treciaha lejtenant dabiŭ jašče adnoj hranataj. Cieły vajskoŭcaŭ spalili.
Paśla hetaha Samuraj paviedamiŭ, što padazravanyja vajskoŭcy źbiehli. Ale praź niekalki dzion ich cieły znajšli, a samoha lejtenanta zatrymali.
Paźniej stała jasna, što nasamreč Raf i Śviaty nie mieli dačynieńnia da zabojstva Artysta. Pavodle danych śledstva, vajskoŭca zabiŭ Jakudza razam ź inšym vajskoŭcam (jon užo asudžany na 13 hadoŭ).
Śledstva pa spravie skončyłasia. Lejtenantu Ramilu-Samuraju i jaho kiroŭcu Ruchu pradjaŭlenyja abvinavačvańni ŭ zabojstvie, pry hetym lejtenant svaju vinu nie pryznaŭ, a jahony kiroŭca pryznaŭ častkova.
Były bajec PVK «Vahnier» atrymaŭ 23 hady za zabojstva — i praz 8 dzion znoŭ pajšoŭ na vajnu