Ужыванне алкаголю спрыяе развіццю некаторых відаў раку
Меркаваная карысць для здароўя сардэчна-сасудзістай сістэмы ўмеранага ўжывання чырвонага віна не пераважае рызыкі развіцця раку, папярэджваюць вучоныя.
29.09.2024 / 13:21
Фота: gstudioimagen / vecteezy.com
Выданне The New York Times звяртае ўвагу на навуковую справаздачу, падрыхтаваную Амерыканскай асацыяцыяй па вывучэнні раку. Яе аўтары адзначаюць, што нягледзячы на агульнае зніжэнне смяротнасці ад раку, захворванні на пэўныя яго віды, асабліва сярод моладзі, па не да канца зразумелых прычынах растуць.
Прычын такога росту можа быць шмат, але навукоўцы звяртаюць увагу на ўплыў алкаголю. У справаздачы адзначаецца, што ён павышае рызыку развіцця некалькіх тыпаў злаякасных новаўтварэнняў, у тым ліку плоскаклетачнага раку стрававода, некаторых відаў раку галавы, шыі, малочнай залозы, раку тоўстай кішкі, печані і страўніка.
У пошуках адказу на пытанне, як алкаголь можа справакаваць рак, вучоныя звяртаюць увагу на яго уплыў на мікрабіём кішэчніка. Ужыванне алкагольных напояў змяняе кішачныя бактэрыі, якія могуць адыгрываць ролю ў распаўсюджанні раку тоўстай і прамой кішак.
Таксама лічыцца, што ў жанчын алкаголь павышае ўзровень эстрагену, што можа спрыяць развіццю раку малочнай залозы. Адмову ад алкаголю аўтары называюць адным з нямногіх спосабаў, з дапамогай якіх жанчыны могуць знізіць рызыку гэтага захворвання.
І хоць жанчынам па шматлікіх прычынах ужо даўно не рэкамендуецца ўжываць алкаголь падчас цяжарнасці, у справаздачы прыводзіцца яшчэ адна: даследаванні паказалі, што ўжыванне алкаголю падчас цяжарнасці павялічвае рызыку дзіцячай лейкеміі ў патомства.
Аўтары звяртаюць увагу, што ў 2019 годзе прыкладна 5,4% выпадкаў раку ў ЗША былі звязаны з ужываннем алкаголю. Але пра гэта ведае вельмі мала людзей.
Напрыклад, пра сувязь алкаголю з рызыкай раку малочнай залозы, як паказала адно з даследаванняў, у ЗША ведаюць менш за траціну жанчын ва ўзросце ад 18 да 25 гадоў.
Побач з гэтым у грамадстве замацавалася меркаванне аб карысці ўмераных доз алкаголю ў прафілактыцы сардэчна-сасудзістых захворванняў.
Аўтары імкнуцца развянчаць гэты міф і звяртаюць увагу на вынікі буйнога даследавання, праведзенага на працягу больш чым дзесяці гадоў, якое ахапіла звыш 135 тысяч пажылых брытанцаў.
Яно паказала, што ўмеранае ўжыванне алкаголю не зніжае рызыкі сардэчна-сасудзістых захворванняў у параўнанні з яго рэдкім ужываннем. Наадварот, людзі, якія ўжывалі алкаголь у малой і ўмеранай колькасці, часцей паміралі ад раку.
Гэтыя тычыцца таксама і чырвонага віна.
Адна з аўтараў справаздачы, Джэйн Фігейрэда, эпідэміёлаг з Інстытута комплекснага лячэння раку ў Лос-Анджэлесе, адзначае, што меркаваныя карысныя ўласцівасці чырвонага віна для здароўя сардэчна-сасудзістай сістэмы не пераважаюць рызыку развіцця раку.
Паводле справаздачы, да 40% выпадкаў раку звязаны з фактарамі, на якія можна паўплываць. Аўтары заўважаюць, што знізіць рызыку захворванняў можа скарачэнне ўжывання алкаголю, змена ладу жыцця, адмаўленне ад тытуню, падтрымка здаровага харчавання і вагі, а таксама мінімізацыя ўздзеяння шкодных рэчываў.
Таксама важным бачыцца павышэнне інфармаванасці насельніцтва, у тым ліку праз папераджальныя надпісы пра рызыку раку на алкагольных напоях.
Чаму так шмат маладых хварэе на рак?
Рак стаў асноўнай прычынай смерці ў багатых краінах
Вучоныя знайшлі ключ да выяўлення раку за 7 гадоў да дыягназу