Бывай, Еўропа! Беларусы канчаткова перасаджваюцца на кітайскія аўто
20 аўтамабільных брэндаў маюць афіцыйных дылераў у Беларусі. Тры чвэрці з іх — кітайскія брэнды.
04.10.2024 / 08:00
Ілюстрацыйны здымак. Фота: «Наша Ніва»
Кітайскія брэнды амаль цалкам выціснулі іншыя
Татальная кітаізацыя беларускага рынку пачала адбывацца пасля таго, як у адказ на расійскую агрэсію супраць Украіны сусветныя аўтавытворцы пачалі пакідаць Расію і Беларусь.
Для параўнання, у 2022 годзе на нашым рынку афіцыйна былі прадстаўленыя 28 брэндаў, і толькі 4 з іх (14%) прыходзілася на кітайскія маркі.
Яшчэ адным пацвярджэннем таго, што беларускі рынак новых аўто цалкам аддадзены Кітаю — міжнародны аўтамабільны салон «Мотаршоу» 2024, які праходзіць з 2 па 6 кастрычніка ў Мінску.
Як адзначаюць журналісты, на ім упершыню на стэндах не было ніводнага афіцыйнага прадстаўніка еўрапейскіх брэндаў. Толькі Кітай.
Ілюстрацыйны здымак. Фота: geely.by
Geely мусіць быць удзячны санкцыям
Адметна, што каля 50% продажаў прыходзіцца на аўтамабілі беларуска-кітайскай вытворчасці (брэнды Geely і Belgee).
Яшчэ адна тэндэнцыя, якую на «Мотаршоу» агучылі прадстаўнікі Беларускай аўтамабільнай асацыяцыі (БАА) — нечуваны рост продажаў новых аўто ў Беларусі. Лепш, чым цяпер, справы ў афіцыйных дылераў ішлі толькі ў 2019 годзе, які лічыцца рэкордным.
Першапачаткова ў БАА прагназавалі, што дылерам удасца рэалізаваць 27 тысяч новых аўто на працягу года. Але гэты паказчык пераадолелі ўжо па выніках першых 8 месяцаў.
Нечаканаму росту продажаў новых аўто ў Беларусі ў першую чаргу спрыяюць заходнія санкцыі ў дачыненні да паставак аўто з Еўропы і ЗША ў Беларусі. Праз гэта БАА даводзілася ўжо некалькі разоў пераглядаць прагнозы на 2024 год у бок павелічэння.
Новыя прагнозы
Па выніках першага квартала 2024 года ў БАА прагназавалі, што ў 2024 годзе рынак дасягне і, магчыма, перавысіць 35 000 рэалізаваных новых аўтамабіляў, але новыя абмежаванні прымусілі іх зноў пераглядзець прагнозы.
Ілюстрацыйны здымак. Фота: «Наша Ніва»
Апошні прагноз быў днямі агучаны на «Мотаршоу». Цяпер дылеры чакаюць, што ім удасца рэалізаваць 47-48 тысяч новых аўто за 2024 год. А гэта больш, чым у даваенным 2021 годзе.
Бадай галоўнае адрозненне ад даваенных часоў будзе ў тым, што цяпер ільвіную долю гэтых машын будуць займаць кітайскія брэнды.
Нагадаем, што новы пакет санкцый, які працуе ад 1 ліпеня 2024 года, забараніў экспарт з Еўрасаюза машын з аб'ёмам рухавіка, большым за 1,9 літра, гібрыдаў, электрамабіляў і любых аўто, даражэйшых за 50 тысяч еўра ў Беларусь.
Дызель можа перамагчы электрамабілі? Як еўрапейскі аўтапрам аказаўся на мяжы крызісу
Было 430 тысяч — стала 90 тысяч. Як па дарозе з Еўрасаюза ў Беларусь машыны губляюць сотні тысяч кіламетраў прабегу
Кітайскі аўтапрам заваёўвае свет. Не без дапамогі Захаду