«Reputacyjnaja škoda vielizarnaja». Ad cybulnaha płantatara Jorha Dornau dystancyrujecca navat «Alternatyva dla Hiermanii»
U prakuraturu Lejpcyha pastupiła niekalki zajaŭ ab ździajśnieńni złačynstva, datyčnych vykarystańnia niamieckim palitykam z partyi «Alternatyva dla Hiermanii» Jorham Dornau pracy palityčnych źniavolenych na cybulnaj fiermie ŭ Biełarusi. Ciapier niamieckaja prakuratura pačała papiaredniaje rasśledavańnie, piša Reform.news, spasyłajučysia na publikacyju ŭ vydańni Bild.
05.10.2024 / 22:17
Jorh Dornau
Pavodle słoŭ lejpcyhskaha advakata i palityka ad partyi «Zialonyja» Fierdynanda Miulera, dziejańni Dornau vidavočna traplajuć pad kryminalny artykuł ab ekspłuatacyi ludziej va ŭraźlivym stanoviščy.
Sam Dornau pakul abvinavačvańni nie kamientuje i nie adkazvaje na šmatlikija zapyty, navat z boku ŭłasnaj partyi. 1 kastryčnika adbyłasia hutarka, u jakoj udzielničaŭ, u tym liku hienieralny sakratar saksonskaha adździaleńnia «Alternatyvy dla Hiermanii» Jan Ćvierh, ale Dornau nie daŭ jasnych tłumačeńniaŭ i, pa słovach pradstaŭnikoŭ frakcyi, pavodziŭ siabie «vielmi ŭparta i zamkniona».
Mnohija členy frakcyi ciapier ličać jahonyja pavodziny «škodnymi dla partyi». Adzin z deputataŭ aburyŭsia:
«U našaj frakcyi pryniata, kab deputaty choć by paviedamlali pra svaje pajezdki za miažu. Ale spadar Dornau robić, što choča, i ni pra što nie dbaje».
U kiraŭnictvie fiederalnaj «Alternatyvy dla Hiermanii» ŭžo nibyta daŭno z tryvohaj sočać za dziejańniami Dornau, ale da hetaha času pakidali hetuju spravu vyrašać saksonskamu rehijanalnamu adździaleńniu. Adnak ciapier, padobna, ciarpieńnie łopnuła.
«Reputacyjnaja škoda, jakaja tut nanosicca, vielizarnaja», — zajaviŭ adzin z členaŭ fiederalnaha praŭleńnia partyi, paviedamlaje Bild.
Ciapier partyjnaje kiraŭnictva aficyjna dystancyravałasia ad Dornau, zajaviŭšy:
«Kali abvinavačvańni suprać saksonskaha deputata spadara Dornau adnosna jaho biełaruskaha biznesu akažucca praŭdzivymi, «Alternatyva dla Hiermanii» rašuča dystancujecca ad hetych biznes-praktyk i razhledzić adpaviednyja miery partyjnaj dyscypliny».
Deputatu ad «Alternatyvy dla Hiermanii» pahražaje vialiki štraf. Jon utaiŭ svoj biznes u Biełarusi