SpaceX upieršyniu paśpiachova viarnuła na Ziamlu šmatrazovy paskaralnik samaj ciažkaj rakiety «Staršyp»
Śpiecyjalisty nazyvajuć hetuju padzieju histaryčnaj — kampanija Iłana Maska vychodzić na pryncypova novy ŭzrovień u kaśmičnych palotach.
13.10.2024 / 22:05
Pasadka šmatrazovaha paskaralnika samaj ciažkaj rakiety Starship na viežu. Fota: X
Inžynieram SpaceX udałosia ŭpieršyniu ŭ historyi pasadzić paskaralnik na viežu. 69-mietrovy Super Heavy B12 paśpiachova pryziamliŭsia na startavuju placoŭku paśla taho, jak adpraviŭ u kosmas samy ciažki ŭ śviecie karabiel.
Rakietu Starship S30 zapuścili z kasmadroma ŭ Boka-Čyka ŭ Techasie ŭ 07:25 pa miascovym časie (15:25 pa Minsku). Šmatrazovaja stupień Super Heavy B12 adździaliłasia na vyšyni kala 74 kiłamietraŭ, a zatym viarnułasia na startavy kompleks. Tam jaje zachapiła vieža Mechazilla, admysłova raspracavanaja SpaceX dla takoha manieŭru.
Kala 16:32 pa minskim časie karabiel «Staršyp» pryvadniŭsia ŭ Indyjskim akijanie.
Pra značeńnie hetaj apieracyi raskazvaje vydańnie The Insider sa spasyłkaj na analityka rakietnych puskaŭ, aŭtara navukovych artykułaŭ pra kosmas i rakietabudavańnie Hieorhija Tryškina.
Pavodle jaho słoŭ, Starship nie tolki samaja ciažkaja i mahutnaja rakieta ŭ historyi, ale i pieršaja patencyjna poŭnaściu šmatrazovaja sistema, dzie i paskaralnik, i karabiel buduć pieravykarystoŭvacca ŭ budučyni.
«Adzin z najvažniejšych etapaŭ — heta viartańnie paskaralnika Super Heavy — pratatyp pad indeksam B12 staŭ pieršym, jaki viarnuŭsia z vyšyni 95 km, paśla taho jak paśpiachova «zakinuŭ» karabiel Starship S30.
Kancept hetaha mietadu pasadki ŭpieršyniu anansavali try hady tamu, i tady jon zdavaŭsia varjackim — praktyčna trochsottonny paskaralnik pavinien sieści na manipulatary na viežy.
I voś praz try hady my narešcie heta ŭbačyli paśla vialikaj kolkaści ciažkaściaŭ i adpracovak. Pryčym jon zrabiŭ heta ź pieršaha razu. Usie ruchaviki adpracavali biezdakorna na ŭsich etapach palotu, pryčym jak na karabli, tak i na paskaralniku», — ličyć ekśpiert.
Pa słovach Hieorhija Tryškina, samy składany momant u hetaj pasadcy — dakładnaść.
«Z punktu hledžańnia pasadki na manipulatary, u jakich jość vysoŭnyja rejki, dakładnaść nie pavinna vychodzić za ramki paŭmietra. Pa fakcie mienš, a z punktu hledžańnia nachiłu — nie bolš za 9 hradusaŭ. Nu heta značyć, ujavicie: paskaralnik z vyšyni 95 km pavinien juvielirna sieści na vielmi maleńki punkt na viežy».
Analityk ličyć, što siońniašniaja padzieja — histaryčnaja.
«Hetaja pasadka ŭvojdzie ŭ historyju, tamu što jana pieršaja ŭ svaim rodzie — nie tolki ŭ supierciažkim kłasie, ale i ŭ takim mietadzie pasadki. Kampanija SpaceX pa sutnaści adzinaja, chto rehularna viartaje paskaralniki z kosmasu, i jany vyšli nie prosta na nastupny ŭzrovień u paraŭnańni z kankurentami, a stali jašče na hałavu vyšej.
Nastupny palot — misija Flight 6 — adbudziecca raniej, čym praz 4,5 miesiaca, licenzija pad jaje ŭžo jość. Čakajem naviny pra stan viežy, vielmi cikava, u jakim stanie budzie sam paskaralnik, jakija dapracoŭki buduć dla nastupnaha, ale heta samaje ŭnikalnaje viartańnie ŭ historyi. Jašče nikoli paskaralnik ni takoha kłasa, ni takoj kanstrukcyi nie ździajśniaŭ uvachod u atmaśfieru, taksama na videa vidać, jak ruchalny adsiek haryć z-za vielmi vysokaj chutkaści padčas uvachodu ŭ atmaśfieru.
Pasadka šmatrazovaha paskaralnika samaj ciažkaj rakiety Starship na viežu. Fota: tvitar SpaceX
U najbližejšyja hady płanujecca zapuskać pa niekalki dziasiatkaŭ razoŭ u hod, heta piaty palot za paŭtara hoda, pa sutnaści nikoli tak časta nie zapuskalisia rakiety zvyšciažkaha kłasa navat u časy prahramy «Apałon». Pakul składana kazać, kolki zapłanavana puskaŭ na nastupny hod, ale vidavočna bolš za piać.
I kampanija SpaceX užo nie prosta siońnia stała kampanijaj № 1 [u historyi rakietabudavańnia] — jana joju ŭžo źjaŭlajecca niekatory čas jak pa kolkaści puskaŭ (sioleta ich amal 100), tak i pa kolkaści vyvodnaj nahruzki: na SpaceX prypadaje amal 90% vyvodnaj nahruzki siarod usich krain i kampanij. Pośpiech Starship Super Heavy i mienavita prahramy raspracoŭki zamacoŭvaje hetuju tendencyju.
Kankuravać inšym kampanijam budzie vielmi ciažka, i jany buduć zmušanyja spaborničać z rakietaj Falcon 9 u siarednim ci ciažkim kłasie. Na hety momant nijakaj alternatyvy abo anałaha ŭ Starship, pa sutnaści, niama».
SpaceX zapuściła misiju pa vyratavańni astranaŭtaŭ, jakija zatrymalisia na MKS
Kaśmičnyja turysty, jakija vychodzili ŭ adkryty kosmas, viarnulisia na ziamlu
SpaceX Iłana Maska vyvieŭ pieršuju pryvatnuju asobu ŭ adkryty kosmas