Латушка выказаўся пра ідэю вярнуць заходніх паслоў у Беларусь
«Хтосьці думае, што амбасадары будуць хадзіць і ўльтыматумы выстаўляць Лукашэнку, пратэсты заяўляць?»
23.10.2024 / 08:00
Павел Латушка. Фота: SOPA Images LightRocket via Getty Images
Апошнім часам некаторыя выказваюцца за тое, каб у Мінск вярнуліся заходнія паслы. Гэта гучала ў артыкуле палітыка і былога палітзняволенага Андрэя Дзмітрыева, пра гэта казаў Валер Кавалеўскі.
Кіраўнік Народнага антыкрызіснага ўпраўлення Павел Латушка мае іншую пазіцыю. У інтэрв'ю «Еўрарадыё» ён патлумачыў:
«Як былы амбасадар, я магу сказаць: абсалютна дастаткова для сённяшняга дня камунікацыі з рэжымам Лукашэнкі ўзроўню часовых павераных у справах кожнай краіны ў Беларусі. Абсалютна дастаткова, бо ў гэтым кантэксце яны выконваюць функцыю пасярэднікаў. Яны атрымліваюць інфармацыю і перадаюць».
Латушка адзначыў, што для вяртання паслоў заходніх краін павінен быць пэўны мэсэдж з боку рэжыму Лукашэнкі. Ён спаслаўся на пазіцыю Германіі, выказаную дзяржміністрам МЗС гэтай краіны Тобіясам Лінднерам, што такім мэсэджам павінна стаць вызваленне ўсіх палітычных зняволеных, аднаўленне свабоды СМІ ў Беларусі, магчымасць правесці дэмакратычныя выбары.
«Ён гатовы на гэта? Не. Вось, калі ласка, умовы, якія мы паставілі ў 2020 годзе. Гэтыя ўмовы падтрымлівае на сённяшні дзень Германія», — заўважае Латушка.
«Тое, што амбасадары паўплываюць на штосьці — не. Хтосьці думае, што амбасадары будуць хадзіць і ўльтыматумы выстаўляць Лукашэнку? Не будуць. Пратэсты заяўляць? Не будуць», — лічыць палітык і тлумачыць:
«Па-першае, у дыпламатычнай практыцы гэта вельмі рэдкія гісторыі. А з іншага боку, уплываць гэта ні на што не будзе. Гэта проста бессэнсоўныя дзеянні. Таму часовы павераны як пасярэднік у гэтай камунікацыі абсалютна дастатковы».
Латушка адзначае, што адсутнасць паслоў краін Захаду не азначае пагрозы страты незалежнасці. Тым больш што ёсць паслы іншых краін:
«Факт пасольстваў ёсць. Дыпламатычныя адносіны ёсць. Часовыя павераныя — прадстаўнікі дзяржаў ёсць. Гэта не пытанне страты ці не страты незалежнасці. Няма ў гэтым кантэксце пагрозы страціць незалежнасць. Бо ёсць пасол Кітая, ёсць пасол Індыі, ёсць пасол Японіі, Швейцарыі. Паслоў вышэй за галаву».
Па словах Латушкі, накіраванне заходнімі краінамі сваіх паслоў у Мінск будзе азначаць, што яны прызнаюць легітымнасць Лукашэнкі. «Гэта ў першую чаргу будзе здрада нам усім, абраза нас усіх», — лічыць палітык.
«Тыя, хто гэта прапаноўвае, ведаеце, што яны робяць? Напрыклад, пасол Германіі ўручае даверчыя лісты Лукашэнку. Вы думаеце, пасля гэтага Германія перадасць сваю афіцыйную прапанову ў офіс пракурора Міжнароднага крымінальнага суда аб пачатку справы крымінальнай за злачынствы супраць беларускага народу? Не, немагчыма», — патлумачыў Павел Латушка.
{POLL#1250}
Санкцыі перагледзець, паслоў вярнуць? Што стаіць за «маніфестам» Андрэя Дзмітрыева
Вялікабрытанія прызначыла замест пасла часовага паверанага ў справах Беларусі