Hubarevič patłumačyŭ, čamu rašyŭ udzielničać u prezidenckich vybarach
Kiraŭnik likvidavanaha ŭładami Ruchu «Za svabodu» i ekśpiert pa rehijanalnym raźvićci Narodnaha antykryzisnaha kiravańnia Juraś Hubarevič paviedamiŭ, što źbirajecca ŭdzielničać u novych prezidenckich vybarach. Jon užo dasłaŭ u CVK zajavu, śpis inicyjatyŭnaj hrupy i inšyja dakumienty, nieabchodnyja dla rehistracyi ŭ jakaści kandydata. Jon raspavioŭ «Našaj Nivie», dziela čaho robić heta, kali inšyja pradstaŭniki apazicyi zaklikajuć ci bajkatavać vybary, ci hałasavać «suprać usich».
28.10.2024 / 14:13
Juraś Hubarevič
Palityk kaža, što ŭdzieł u vybarach — heta najpierš jaho prava jak hramadzianina Biełarusi:
«Ja maju pašpart hramadzianina Respubliki Biełaruś. Usie ŭzrostavyja cenzy mianie nie tyčacca. Maju ŭsie padstavy dziela taho, kab maja zajaŭka na ŭdzieł była zadavolenaja».
Paśla źmienaŭ u Kanstytucyju kandydat u prezidenty pavinien pražyć nie mienš za 20 hadoŭ u Biełarusi niepasredna pierad vybarami i nie mieć DNŽ inšaj krainy. Juraś Hubarevič kaža, što jaho hetyja abmiežavańni nie tyčacca, jon — prosta «časova nie ŭ Biełarusi».
«Na dadzieny momant ja nie maju nijakich vidaŭ na žycharstva. Maje dakumienty ŭ pracesie razhladu, ale rašeńnia niama», — śćviardžaje palityk. «Što tyčycca momantu pra pražyvańnie za miažoj, iznoŭ taki: zakon nie akreślivaje kankretnuju kolkaść dzion ci kolkaść hod, jakija treba pražyć za miažoj, kab hetaje abmiežavańnie pačało dziejničać. Tut taki jurydyčny niuans».
Juraś Hubarevič užo vyłučaŭsia na prezidenckija vybary ŭ 2020 hodzie, ale źniaŭ svaju kandydaturu paśla 15 sutak za «niesankcyjanavanaje pikietavańnie». Z taho momantu represii suprać luboha «inšadumstva» tolki ŭzmacnilisia, usie palityčnyja hulcy, jakija nie vyjechali za miažu, znachodziacca za kratami — jaki tady sens udzielničać u vybarach u takich umovach?
«Adna sprava — słovy, i inšaja — źbirańnie dokazaŭ i faktaŭ. My, kaniečnie, možam aceńvać hetyja vybary jak niedemakratyčnyja, i, chutčej za ŭsio, ź vielizarnaj dolaj vierahodnaści, maja zajaŭka nie budzie zadavolenaja, ale heta krok, jaki dadatkova paćvierdzić, što ŭ siońniašnich umovach kazać pra roŭnyja mahčymaści dla ŭsich kandydataŭ nie prychodzicca.
Tym bolš dla tych, chto pradstaŭlaje adrozny ad aficyjnaha pohlady. Režym zaŭsiody moža skazać: vy navat nie sprabavali, usie, chto chacieŭ zajavicca, zajavilisia i ŭziali ŭdzieł u vybarach, my nikoha nie abmiažoŭvali. Maja zadača — pakazać, ci tak heta nasamreč».
U inicyjatyŭnuju hrupu palityka ŭvajšli ludzi, jakija byli ŭ joj u 2020 hodzie. Pry stanoŭčym vyniku Hubarevič płanuje adpravić zanosić sabranyja podpisy ŭ CVK svaju davieranuju asobu, jak toje robić Łukašenka.
«Tut treba, kab taksama byŭ roŭny padychod da ŭsich kandydataŭ — ja štości nie pamiataju, kab Łukašenka nasiŭ sam svaje dakumienty ŭ CVK».
U CVK padali dakumienty rehistracyi inicyjatyŭnaj hrupy Łukašenki
Apazicyja prapanuje hałasavać suprać usich, ale dapuskaje źmienu taktyki bližej da vybaraŭ
Knyrovič patłumačyŭ, čamu lepš hałasavać na vybarach za Hajdukieviča, čym za Łukašenku
Kaho Łukašenka pastavić na vybary kandydatami-spojlerami?