Stała viadoma, dzie ŭ Minsku pracuje fotafiksacyja prajezdu na čyrvonaje śviatło
Sistema pracuje ŭ testavym režymie, ale pieršyja parušalniki ŭžo atrymali štrafy.
03.11.2024 / 15:04
Adno z DTZ u Minsku, jakoje adbyłosia praz prajezd na čyrvonaje śviatło
Na adnym ź minskich skryžavańniaŭ u testavym režymie pracuje pieršaja ŭ stalicy kamiera fiksacyi prajezdu na čyrvonaje śviatło, raskazaŭ načalnik UDAI HUUS Minharvykankama Siarhiej Babič na ANT.
Pakul probnaja kamiera staić tolki na skryžavańni vulic Bahdanoviča i Šyrokaj.
Pa słovach Babiča, skryžavańnie ŭ Zialonym Łuzie abstalavali kamierami, jakija dazvalajuć elektronnaj sistemie adsočvać sihnały śviatłafora, jakija harać pry ŭjeździe transparta na skryžavańnie Jana taksama apracoŭvaje atrymanyja danyja dla fiksacyi parušeńnia.
«Źviestki, jakija atrymlivajucca z kamier videanazirańnia, užo dazvalajuć pryciahvać da adkaznaści, tych, chto prajazdžaje na zabaraniajučy sihnał. I za minuły miesiac tut vyjavili kala 20 takich parušeńniaŭ», — paviedamiŭ Babič.
Pavodle jaho słoŭ, u nastupnym hodzie takaja sistema budzie pracavać užo nie ŭ testavym režymie. Jaje płanujuć ustanavić na piaci samych avaryjnych skryžavańniach u Minsku.
U DAI taksama adznačyli, što ŭ Minsku ŭ 2024 hodzie adbyłosia 15 DTZ z prajezdam na čyrvony. U ich paciarpieli 16 čałaviek.