Lidar hurta «Kasta» raskazaŭ pra zdymki klipa z BTRami ŭ Minsku i pracu z Maksam Karžom
Lidar rasijskaha hurta «Kasta» Uładzi (sapraŭdnaje imia Uładzisłaŭ Laškievič) daŭ intervju vydańniu «Lusterka». Siarod inšaha jon raskazaŭ pra svaje karani ź Biełarusi, zdymki viadomaha klipa «Vokruh šum» u Minsku i pracu z Maksam Karžom.
03.11.2024 / 19:31
Kadr z klipa «Vokruh šum»
— Vaš baćka biełarus. Raskažycie padrabiaźniej, dzie jon naradziŭsia i jak apynuŭsia ŭ Rasii.
— Moj baćka naradziŭsia ŭ Bresckaj vobłaści, na chutary Alpień (Stolinski rajon. — «Lusterka»). Jon vyras u Mahilovie. Uzimku ŭ biełaruskim pansijanacie jon studentam paznajomiŭsia z majoj mamaj, jakaja pryjechała tudy adpačyvać z Rastova-na-Donie. Z tych časoŭ jany siabrujuć i kachajuć adno adnaho.
— Vašy karani paŭpłyvali na vašu aktyŭnaść padčas pratestaŭ 2020 hoda?
— Tak. Heta było žudasna nazirać. Ja zachaplaŭsia biełarusami i ich kulturnym, kranalnym, trapiatkim, doŭhim masavym pratestam. I ŭ procivahu hetamu ja hladzieŭ na zastarełyja mietady ŭłady, jakija supravadžalisia pramovami asnoŭnaha jaje pradstaŭnika. Heta było dzika i soramna nazirać. Toje, što adbyvajecca nie prajšło bokam, my vielmi spačuvali.
— Klip da lehiendarnaha treka «Vokruh šum» zdymali ŭ Minsku. Čamu?
— Heta davoli važki klip. Vytvorčyja abstaviny ŭdała skłalisia mienavita ŭ Minsku.
— Prosta tańniej było?
— Kali ŭsio pieravieści ŭ hrošy, to, napeŭna, tak. Ale akramia vydatkaŭ, jość inšyja pytańni dla kinazdymak. Sumarna vybrać možna było tolki pradakšn ŭ Minsku, im kiravaŭ Uładzimir Niafiodaŭ.
— «Vokruh šum» — darahi klip. Kolki jon kaštavaŭ?
— Napeŭna, 50 tysiač dalaraŭ (videa vyjšła ŭ 2009 hodzie. — «Lusterka»).
— U klipie jość BTRy. Dzie i jak vy ich dastali?
— Heta niejkaja vajskovaja častka. Ja hetym nie zajmaŭsia. Ja hladzieŭ u kaštarysy, sprabavaŭ uzvažyć, nakolki heta realistyčna i ci sapraŭdy [usie] atrymajecca, ale damoŭlenaściami zajmaŭsia nie ja.
— Vajskovaj čaści płacili?
— Nie pamiataju, ale składana pavieryć, što heta było biaspłatna. Napeŭna, heta navat było vielmi doraha (śmiajecca).
— U Maksa Karža šmat hadoŭ byŭ padpisany kantrakt z łejbłam Respect Production, jakim vy kiravali. Raskažycie pra vašu pieršuju sustreču.
— Znajomyja zakinuli jaho dysk, skazali: «Vam prasili pieradać». Ja pasłuchaŭ i adrazu ŭjaviŭ sabie tačku, u jaje adkryty bahažnik, valić huk, vakoł tusiać studenty.
My ŭpieršyniu sustrelisia z Maksam u handlovym centry ŭ Maskvie. Jon byŭ surjozny, niešmatsłoŭny, uvažlivy, juny. Maks byŭ u štanach. Uvieś nastupny čas jon chadziŭ u šortach. Potym, kali ja ŭspaminaŭ pieršuju sustreču, dumaŭ: «Voś dziŭna, čamu jon tady byŭ nie ŭ šortach, a ŭ štanach?» (śmiajacca).
— Jakija ŭ vas byli ŭmovy pracy? Jon moh vam skazać: «Vaša ideja pryšpilnaja, ale mnie zdajecca, što jana nie pra mianie. Ja chaču voś tak»?
— Prosta, jak ty kažaš, heta dasłoŭna kazaŭ Maks.
— Vy ŭkładvali ŭ jaho hrošy całkam, heta było 50 na 50 ci niejak inakš?
— Mnie zdajecca, što my z Maksam damaŭlalisia nie raskryvać usich umoŭ pracy. Ale vidavočna, što ŭ pieršy pieryjad usie inviestycyi byli ad našaha łejbła, a paśla — sumiesnyja.
— Ciažka było Maksa Karža prymusić chadzić na intervju?
— My nie sprabavali prymušać, tolki prapanoŭvali. Jon rabiŭ heta vielmi redka. Jamu nie padabałasia. (…)
Ja pamiataju, što šmat razoŭ Juryj Dudź prasiŭ jaho dać intervju. Ja pieradavaŭ heta Maksu. Adzin čas jon navat byŭ nastrojeny pajści, ale potym nastroj kudyści dzieŭsia.
— Heta praŭda, što ŭ tym liku dziakujučy i vam u nas jość takija krutyja klipy Maksa Karža? Jak vy da hetaha datyčnyja?
— Pieršyja klipy arhanizoŭvali my, u niejkich udzielničali scenarna. Ale ŭ Maksa vyjaviŭsia ŭłasny zapał da zdymačnaha pracesu, i jon vielmi chutka raźvivaŭsia. Jon zachapiŭsia, staŭ raźbiracca ŭ kamierach, u śviatle i inšych rečach. Jamu stała cikava być režysioram i pradziusaram klipaŭ.
— Pavodle apošniaj publičnaj infarmacyi, u kastryčniku hetaha hoda Maks Korž źjechaŭ ź Biełarusi. Im zacikavilisia ŭ HUBAZ. Vy bačylisia abo źviazvalisia?
— My nie bačylisia daŭno. Źviazvalisia, napeŭna, apošni raz 1,5 hoda tamu. Pahutaryli pra vajnu va Ukrainie. Mnie było b pryjemna daviedacca, što jon taksama pieražyvaje.