Chto taja žančyna, jakaja prymaje dakumienty ŭ kandydataŭ u prezidenty i dziažurna dakładvaje pra sumlennaść vybaraŭ?
Alena Hryharovič — adzin z novych tvaraŭ biełaruskaha Centrvybarkama. Raskazvajem, chto jana i adkul uziałasia.
05.11.2024 / 16:18
Alena Hryharovič. Fota: sb.by
Prymać dakumienty ŭ padkantrolnych Łukašenku pretendentaŭ u kandydaty daručyli jurystcy Alenie Hryharovič. Jana ž na pasiadžeńniach ahučvaje pierad členami kamisii zahadzia padrychtavany prysud: čyje dakumienty ŭ normie, a kaho z pretendentaŭ varta adsiejać.
Alenie Hryharovič 39 hadoŭ. Rodam jana z Maładziečna. Paśla škoły pierajechała ŭ Minsk i advučyłasia na jurfaku BDU. Pa źviestkach «Biełpoła», siamja žančyny nie maje anijakich admietnaściaŭ. Muž pracavaŭ u banku, baćki taksama na zvyčajnych pracach.
Z admietnych faktaŭ, jakija adšukała abjadnańnie byłych siłavikoŭ pra Alenu — jana ŭ 2020 hodzie jeździła va Ukrainu razam z namieśnikam načalnika ŭpraŭleńnia pravavoha zabieśpiačeńnia Śledčaha kamiteta Biełarusi, pałkoŭnikam justycyi Siarhiejem Papłaŭskim. Praŭda, nieviadoma, ci mahło siabroŭstva ź im paŭpłyvać na karjeru Aleny.
Siarhiej Papłaŭski. Fota z sajta SK
Pa źviestkach prajekta Digital intelligence team, Hryharovič z 2008 hoda pracavała ŭ Hałoŭnym upraŭleńni justycyi Minskaha abłvykankama. Spačatku kansultantkaj u sudzie Vilejskaha rajona, paśla na inšych pasadach unutry struktury. U vyniku darasła da pasady načalnicy ŭpraŭleńnia arhanizacyj pravavoha absłuhoŭvańnia.
Raniej u miedyja Hryharovič nie śviaciłasia. Jana ŭdzielničała ŭ dziažurnych sieminarach dla jurystaŭ i pasiadžeńniach Ministerstva justycyi, ale nie bolej za toje.
Alena Hryharovič niekalki hadoŭ tamu. Fota ź jaje staronki Ukantakcie (archiŭnaja kopija)
U 2023-m žančynu čakaŭ rost — jaje ŭziali pracavać u CVK. Dy nie prosta ŭ CVK, a adrazu na pazicyju načalnika adździeła pravavoj, mietadyčnaj i analityčnaj raboty aparata CVK. Ciapier mienavita jana dziažurna abviaščaje pra «adsutnaść falsifikacyjaŭ» padčas vybaraŭ i pieryjadyčna kamientuje niešta dziaržaŭnym miedyja.
Na hetaj pasadzie jana paśpieła vystupić z pramovaj «Sučasnyja technałohii pracy z vybarščykami: dośvied Respubliki Biełaruś». Adbyłosia heta na sieminary ŭ Rasii, jaki nazyvaŭsia «Abarona elektaralnaha suvierenitetu krainaŭ SND». Taksama jeździła nazirać za vybarami ŭ Kazachstan.
Hryharovič na vybarach u Kazachstanie (na zadnim fonie). Fota: egemen.kz
Padobna, što Hryharovič vučycca abo vykładaje ŭ Akademii kiravańnia pry Łukašenku — pa źviestkach DIT, paznaka pra heta jość u bazie FSZN.
CVK zarehistravaŭ inicyjatyŭnyja hrupy Kanapackaj, Bobrykava i Syrankova, a Kavalovaj i Kulaša — nie
Kampartyja: Naš kandydat idzie na vybary nie zamiest, a razam z Łukašenkam