U «Bajsole» raskazali pra apošniuju chvalu masavych zatrymańniaŭ i paraili, što rabić ludziam u zonie ryzyki
Masavyja zatrymańni, jakija pačalisia ŭ krainie 31 kastryčnika, praciahvajucca dahetul, paviedamili vydańniu «Lusterka» ŭ słužbie evakuacyi fondu «Bajsoł». Pavodle danych na 5 listapada, u arhanizacyju pastupaje infarmacyja pra tych, da kaho pryjšli. Pavodle papiarednich acenak fondu, pad rejdy siłavikoŭ užo trapili kala 80 čałaviek.
05.11.2024 / 23:06
Fota ilustracyjnaje
Pavodle danych supracoŭnika słužby evakuacyi «Bajsoł» Fiodara (imia źmienienaje), chvala zatrymańniaŭ užo zakranuła kala dziesiaci nasielenych punktaŭ. U fondzie ich nie pieraličvajuć, adnak častku ź ich raniej nazyvali pravaabaroncy: Maładziečanski i Asipovicki rajony, harady Chojniki, Smarhoń, Vaŭkavysk i inšyja.
«Pieršyja zatrymańni, pra jakija nam stała viadoma, prajšli jašče ŭviečary ŭ sieradu, 30 kastryčnika. Ale jany byli nie masavyja, i čamu adbylisia, my nie viedajem, — adznačaje surazmoŭca. — Užo masavyja zatrymańni zdarylisia 31 kastryčnika. Vielmi šmat śviedčańniaŭ, što pačalisia jany plus-minus u 7.30 ranicy pa ŭsioj krainie».
Pavodle infarmacyi, jakaja jość u «Bajsoła», za apieracyjaj staić KDB, choć udzielničać u joj mahli i supracoŭniki inšych siłavych struktur. Bolšaść zatrymańniaŭ prachodziła pavodle padobnaha scenaryja: u dźviery čałavieku hučna stukali, kab «u jaho byŭ šok».
«Kali jon adčyniaŭ, uryvałasia hrupa zachopu ŭ amunicyi, z aŭtamatami. Praviarała pamiaškańnie na pradmiet biaśpieki. Potym zachodziŭ śledčy. Pavodziny śledčych hrup byli roznyja, dzieści hvałtu nie było ci amal nie było. A dzieści ŭłomvaŭsia HUBAZiK i vykarystoŭvaŭ zusim inšy padychod ź vialikaj kolkaściu hvałtu.
U lubym vypadku ŭsio heta prajava dziaržaŭnaha teroru, — praciahvaje Fiodar. — Padčas razmovy ŭ kahości pytalisia pra pajezdki ŭ Jeŭropu, u kahości — pra ich aktyŭnaść u krainie, kamuści pradjaŭlali davoli žorstkija kryminalnyja artykuły, naprykład, art. 357 KK (zmova ci inšyja dziejańni, učynienyja z metaj zachopu dziaržaŭnaj ułady), art. 361 KK (zakliki da sankcyj) i art. 342 KK (arhanizacyja i padrychtoŭka dziejańniaŭ, jakija hruba parušajuć hramadski paradak).
Niekatorym ich nie pradjaŭlali, a prosta zabirali, dapytvali i davali «administratyŭku» za drobnaje chulihanstva (art. 19.1 KaAP). Mahčyma, adrazu bolš žorstki varyjant prapanoŭvali tym, na kaho ŭ supracoŭnikaŭ byŭ niejki kampramat».
Na pytańnie, što mahło b źviazvać usich hetych ludziej, u Fiodara niama adnaznačnaha adkazu. Pavodle jaho hipotezy, chvala zatrymańniaŭ — heta vynik «vialikaha rasśledavańnia siłavych słužbaŭ», jakoje, vierahodna, pačałosia ŭ 2021—2022 hadach. U «Bajsoła» jość infarmacyja, što ludziej na dopytach pytajucca pra hety pieryjad.
«Sapraŭdy, siłaviki źbirali niejkuju bazu ludziej u krainie, jakija mahli b im być cikavyja. Jak my razumiejem, jany pravodzili papiarednija dopyty, na ich atrymlivali niejkija imiony, potym sprabavali ich źviazać u niešta adzinaje. Adnak, jak nam viadoma, nie zaŭsiody zatrymanyja niejak abjadnanyja pamiž saboj. Naprykład, ludzi adzin adnaho nie viedajuć, a im, dapuścim, pradjaŭlajuć: «Nie, u vas tut adzinaja supolnaść», — pryvodzić prykład surazmoŭca.
Na dumku pradstaŭnika słužby evakuacyi «Bajsoła», siłaviki «sabrali karcinku» i napiaredadni vybaraŭ zładzili chvalu zatrymańniaŭ.
«My čakajem, što jana nie apošniaja, — adznačaje surazmoŭca. — Mahčyma, nastupnyja buduć na padstavie tych pakazańniaŭ, jakija siłaviki atrymajuć ad ludziej [ciapier]».
Pavodle infarmacyi Fiodara, koła zatrymanych «mocna šyrejšaje, čym tyja ludzi, jakija mahli b być datyčnyja da niejkaha abjadnańnia».
«Siarod zatrymanych byli i tyja, kamu inkryminujuć niejkuju aktyŭnaść, i tyja, da kaho pryjšli prosta za kamientary, padpiski, — koratka adkazvaje Fiodar. — Jość kiejsy, kali ŭ poli zroku apynulisia tyja, chto raniej byŭ na dopytach, a ciapier prosta jeździli ŭ Jeŭropu pa svaich spravach. Navat bieź iventaŭ».
Pavodle infarmacyi, što pastupiła ŭ «Bajsoł», z 31 kastryčnika pa 5 listapada siłaviki pryjšli prykładna da 80 ludziej. Kala 20% ź ich paśla dopytaŭ adpuścili. Kahości z «administratyŭkaj», kahości ŭ statusie śviedki.
«Pavodle źviestak, jakija ŭ nas jość, izalatar na Akreścina pierapoŭnieny. U kamierach na 3-4 čałavieki siadziać pa 16 čałaviek. Pra inšyja IČU nie viedaju, — raskazvaje Fiodar i dadaje: —
Chacieŭ by źviarnucca da ludziej, jakija razumiejuć, što znachodziacca ŭ zonie ryzyki. Da vybaraŭ vam lepš pažyć nie doma. U ideale navat nie ŭ krainie. Ale kali vy možacie choć by źjechać, naprykład, na lecišča da siabra, taksama dobra. U lubym vypadku heta lepš, čym ničoha.
Źviartajcie ŭvahu na svaje padpiski ŭ telefonie, pierapiski ŭ čatach, u telehramie i hetak dalej.
I jašče adzin važny momant. Kali raptam vas zabirajuć na dopyt, hałoŭnaje, nie nahavarycie na siabie. Nie kažycie, naprykład, «tak, sapraŭdy tam byŭ, kajusia». Skazać «kajusia», značyć, siadzieć».
Vializnaja chvala zatrymańniaŭ — stała zrazumieła, na kaho hetym razam palavali KDB i HUBAZiK
Stali viadomyja novyja padrabiaznaści zatrymańniaŭ i pieratrusaŭ na minułym tydni
Čarhovy chapun adbyŭsia ŭ Navahrudku
Palityčnyja zatrymańni ŭ Chojnikach: pryjšli da dvuch dziasiatkaŭ ludziej
Jak minimum 14 čałaviek zatrymanyja za palityku ŭ rabočym pasiołku Jalizava
Na zimu zapłanavanyja masavyja zatrymańni, składzienyja «pieršy i druhi śpisy»