«Adna z najbujniejšych pavietranych atak». Rasija vypuściła pa Ukrainie 120 rakiet i 90 dronaŭ
Pa ŭsioj krainie ekstrana adklučali elektryčnaść, u Adesie jość prablemy z vadoj.
17.11.2024 / 11:15
Nastupstvy ŭdaru ŭ Lvoŭskaj vobłaści. Fota: DSNS Lvoŭskaj vobłaści
Rasijskija vojski ranicaj vypuścili pa Ukrainie kala 120 rakiet i 90 dronaŭ. Pra heta paviedamiŭ prezident Ukrainy Uładzimir Zialenski.
Pavodle jaho słoŭ, siły PPA źniščyli bolš za 140 pavietranych celaŭ. Pry hetym rasijanam udałosia paškodzić niekalki abjektaŭ enierhietyčnaj infrastruktury Ukrainy. U Kijevie i vobłaści, a taksama ŭ Dnieprapiatroŭskaj, Danieckaj, Čarkaskaj, Kiravahradskaj i Žytomirskaj abłaściach ułady ŭžyli ekstranyja adklučeńni elektryčnaści.
U Adesie časova nie chadziŭ elektratranspart, ukrainskija ŚMI paviedamlajuć pra prablemy z vadoj i aciapleńniem. U Mikałajevie, pavodle apošnich danych, zahinuli dva čałavieki, jašče šeść atrymali ranieńni, u tym liku dvoje dziaciej.
Kiraŭnik MZS Ukrainy Andrej Sybiha nazvaŭ naniesieny vojskami RF ŭdar «adnoj z najbujniejšych pavietranych atak» ad pačatku poŭnamaštabnaha ŭvarvańnia. Rasijanie vykarystali ŭsie vidy kryłatych rakiet, a taksama roznyja typy dronaŭ-kamikadze.