Stryžak raskazaŭ, čamu Vieramiejčyk nie zmoh lehalizavacca ŭ Jeŭrasajuzie
Učora stała viadoma, što byłoha kalinoŭca Vasila Vieramiejčyka, jakoha zatrymali ŭ Vjetnamie, vydali śpiecsłužbam Łukašenki. Kiraŭnik BYSOL Andrej Stryžak raskazaŭ, što pajšło ŭ hetaj historyi nie tak. Pryvodzim jaho post.
21.11.2024 / 10:46
1) U studzieni 2024 Vasil źviarnuŭsia ŭ BYSOL pa dapamohu i atrymaŭ vyčerpnyja instrukcyi, jak pavodzicca va ŭmovach pryznańnia jaho pahrozaj nacbiaśpieki Litvie. Vasilu było rekamiendavana pakinuć JEZ i nakiravacca ŭ Hruziju. Hetuju rekamiendacyju jon vykanaŭ.
VAŽNA! Sistema pryznańnia pahrozaj nacbiaśpieki pastajanna krytykujecca z boku pravaabaroncaŭ jak niedaskanałaja, i my padtrymlivajem i adkryvajem zbory na advakataŭ dla ludziej, što ŭ zakonnym paradku abskardžvajuć takija rašeńni ŭ litoŭskich sudach.
2) U lipieni 2024 Vasil Vieramiejčyk znoŭ źviazaŭsia z BYSOL užo z Hruzii, dzie byŭ prainstruktavany, jakim čynam jon moža viarnucca ŭ JEZ i zrabić sprobu lehalizacyi. Paŭtaru. My dali jamu kankretnyja miechanizmy i ałharytmy, jak jon moža lehalizavacca ŭ JEZ. Na žal, kamunikacyja z Vasilom pierarvałasia pa jahonaj inicyjatyvie. Bolš jon z nami nie źviazvaŭsia.
3) Toje, što viadoma ź miedyja. Vasil Vieramiejčyk pasprabavaŭ ujechać u Polšču i padacca na abaronu. Ja nie byŭ na miažy razam ź im u hety momant, ale viedaju jak vyhladaje pracedura. Polski bok pavinny rastłumačyć umovy padačy. Adna z umovaŭ — utrymańnie zajaŭnika ŭ łahiery dla biežancaŭ (nie ŭ turmie), KALI Ŭ JAHO NIAMA INŠAHA MIESCA ŽYTŁA ŭ Polščy.
Kali b Vasil zastavaŭsia na suviazi z BYSOL, to moh by prymać kvalifikavanyja rašeńni ŭ hetaj situacyi. Na žal, im było pryniataje inšaje rašeńnie. Cytatu pra niežadańnie «siadzieć z pakistancami» ja pakinu biez kamientaroŭ.
4) Dziasiatki razoŭ i ja asabista, i maje kalehi pa siektary, i palityki prahavorvali važnaść spraŭdžvać biaśpiečnaść toj ci inšaj krainy dla vizitu/pierajezdu. Ja ŭdziačny kožnamu i kožnaj, chto piša da mianie asabista i źviartajecca na haračuju liniju fonda @help_bysol (TH) z pytańniami, ci varta jechać u tuju ci inšuju krainu. Jość vydatny resurs pashpart.org, stvorany Narodnymi ambasadami ŭ supracy z Ofisam Cichanoŭskaj. Usie hetyja instrumienty publičnyja i dastupnyja dla taho, kab praanalizavać pahrozu biaśpiecy. Vasil abraŭ niebiaśpiečnuju krainu dla žyćcia pa ŭłasnaj inicyjatyvie.
REZIUME: Kožny čałaviek adkazny za svajo žyćcio. My ŭsie traplajem u roznyja składanyja situacyi, časam takija, što padajecca, što vyjścia niama, ale zaŭsiody možna źviarnucca da tych, chto viedaje, što i jak rabić. Prymajcie rašeńni ŭzvažana, z ulikam dośviedu inšych ludziej, z ulikam mierkavańniaŭ i praktyki ekśpiertaŭ.
Padabajusia ja ci BYSOL kamuści ci nie, heta nie pryčyna adkidvać napracavanyja nami ałharytmy i miechanizmy. My vysłuchvajem i, pry mahčymaści, dapamahajem usim, chto da nas źviartajecca, nie zaležna ad taho, jak čałaviek stavicca da BYSOL ci mianie asabista. Tak było, jość i budzie zaŭsiody.
Nie litoŭskaja mihracyja, polskija čynoŭniki, vjetnamskija palicejskija, Stryžak ci Cichanoŭskaja, ci chtości jašče adkaznyja za vašaje žyćcio, a vy sami.
Bieražycie siabie i budźcie razvažlivymi.