Koń i «Džyli» na podyumie: u Minsku prajšło modnaje šou, dzie haściej prasili adziecca pa dres-kodzie
Biełaruskija modniki niadaŭna sabralisia ŭ Falcon Club Arena na hała-šou Belarus Fashion Art Week. Pahladzieli, jak vyhladali naviedvalniki fešn-mierapryjemstva, a taksama čym dzialilisia ŭ sacyjalnych sietkach.
28.11.2024 / 11:12
Dla haściej Belarus Fashion Art Week, jaki prajšoŭ 24 listapada, byŭ paznačany dres-kod: Black Tie («čorny halštuk»). Darečy, patrabavańni ŭ takim vypadku davoli strohija. Zvyčajnaha taki dres-kod vykarystoŭvajuć na ŭračystych pryjomach, teatralnych premjerach, śvieckich viečarynkach, jakija pačynajucca paśla 19:00.
Tradycyjna mužčynam dla Black Tie rekamiendujuć apranuć čorny kaścium, biełuju kašulu i čorny halštuk ci babačku. Tufli paviny być kłasičnymi, uvieś łakavy abutak pad strohaj zabaronaj.
Žančynam pry takim dres-kodzie lepš vybrać sukienku maksi (kali stupień uračystaści mierapryjemstva dazvalaje, to možna padabrać ubor krychu karaciejšy, ale daŭžynia vyšej za kalena zabaroniena). Kab dapoŭnić vobraz, nieabchodna vykarystoŭvać upryhožvańni. Adnak, u adroźnieńnie ad bieskampramisnaha White Tie, jaki pryznaje tolki darahija juvielirnyja vyraby, Black Tie dazvalaje bižuteruju premium-kłasa.
Niechta z haściej Belarus Fashion Art Week padyjšoŭ da dres-kodu z usioj adkaznaściu. Svaju padborku samych udałych vobrazaŭ prysutnych na fešn-mierapryjemstvie zrabiŭ instahram-akaŭnt «Ciažki Marks», jaki raspaviadaje pra śvieckaje žyćcio biełaruskaj stalicy.
Samym čaplalnym atrymaŭsia vobraz dyzajnierki Śviatłany Bast. Jana ŭraziła prysutnych atłasnaj sukienkaj, vyšytaj piorami, roznymi pacierami i bliskučkami. Tvar chavaŭ niezvyčajny velum u vyhladzie pavucińnia. Sama Śviatłana ŭ sacyjalnych sietkach pažartavała pra svoj vobraz: «Vobraz vybrała niakidki — lanota było rabić pryčosku i makijaž. Schavałasia krychu, ale, jak ni dziŭna, była navidavoku».
Dyzajnierka Śviatłana Bast. Tut i dalej skrynšoty videa instahram-akaŭnta hard_marks
Ale ŭsio ž treba adznačyć, bolšaść haściej ci to nie viedała, što chavajecca za tajemnym spałučeńniem Black Tie (i aryjentavałasia na słova «čorny»), ci to vyrašyła nie nadta staracca.
Modny błohier Illa Tryfanienkaŭ pryjšoŭ u zvyčajnaj čornaj bajcy.
Jašče adzin hość, mabyć, vyrašyŭ, što lepš prademanstravać muskuły, čym prysłuchacca da pažadańniaŭ arhanizataraŭ mierapryjemstva, tamu pryjšoŭ u majcy poła. Jon taksama vyrašyŭ być na fešn-pakazie ŭ čornaj kiepcy.
Mini-sukienka i batforty mohuć hladziecca efiektna, adnak u dres-kod Black Tie usio ž nie ŭpisvajucca.
Jašče adna hościa, jakaja trapiła ŭ modny ahlad, abrała dla śvieckaha mierapryjemstva bežavuju sukienku z čyrvonymi pacałunkami.
Siarod haściej byli zaŭvažany viciebskaja dyzajnierka Taćciana Jafremava i Vova Frak (rasijski dyzajnier upryhožvańniaŭ, jaki pierabraŭsia ŭ Biełaruś dva hady tamu).
Niechta chacieŭ vyłučycca z natoŭpu luboj canoj. Mabyć, adzin z samych ekzatyčnych varyjantaŭ parušyć dres-kod abrała žančyna, jakaja pryjšła ŭ kimano i japonskich saba.
Kali mierkavać pa videa, jakija publikavali naviedvalniki Belarus Fashion Art Week, najbolš urazili ich dva momanty šou. Pa-pieršaje, heta toje, što brend Nobility, jaki śpiecyjalizujecca na vypusku adzieńnia ŭ styli old money, vyvieŭ na podyum žyvoha kania. Koń vioŭ siabie prystojna, ale ŭžo pa-za pakazam pasprabavaŭ skinuć palito z madeli — moža, vyrašyŭ, što jano nie pasuje dziaŭčynie.
Skrynšot storys akaŭnta belarus.fashion.art.week
Druhi — heta toje, što dla pakazu kalekcyi papularnaj ciapier dyzajnierki Alony Acapkinaj na podyum vyjechali adrazu try biełych «Džyli». Darečy, zusim niadaŭna Acapkina demanstravała madeli ŭłasnaha brendu Atsapkina na Paris Fashion Week. A adkryvała i zakryvała jaje pakaz u Francyi adna z samych viadomych biełaruskich madelaŭ Poli Kanabis, jakaja maje 3,6 miljona padpisčykaŭ u instahramie.
Dyzajnierka patłumačyła, čamu biełaruskija brendy šyjuć mała adzieńnia plus-sajz
Dačka i muž pamierłaj biełaruskaj dyzajnierki pradoŭžyli jaje spravu ŭ Varšavie
Viadučaja ANT Iryna Rambalskaja pakazała svaje harsety na tydni mody ŭ Paryžy