«Бессэнсоўна падаваць апеляцыю». Як беларусам адмаўляюць у польскіх візах і што яны з гэтым робяць
Візавы скандал у Польшчы працягваецца, канчаткова трансфармаваўшыся ў шэльмаванне праграмы PBH. На гэтым фоне ў беларусаў узмацніліся праблемы з атрыманнем польскіх віз. Devby.io зазірнуў у візавыя чаты — убачылі старую праблему («злавіць дату») і адносна новую («шмат адмоў»).
29.11.2024 / 13:36
Як ні старалася VFS Global абараніць электронную сістэму рэзервацыі візітаў ад пасярэднікаў — з дапамогай верыфікацыі праз МСІ (яе ўжо скасавалі) або з дапамогай фота — нічога не выйшла. Слотаў па-ранейшаму не злавіць, і дапамагатары па-ранейшаму прапаноўваюць свае паслугі.
Да гэтай праблемы дадалася новая: нават паспяховая падача дакументаў не гарантуе выдачы візы. Яна, вядома, ніколі не гарантавала на 100%, але апошнія месяцы адмоў як ніколі шмат, вынікае з паведамленняў у чатах.
Фёдар расказаў пра адмову ў працоўнай візе, нягледзячы на офер з Google, аднак беларусам таксама рэгулярна адмаўляюць у нацыянальных (D) і турыстычных візах. Часта ў матывіроўцы паказаны п. 10 — «сумневы ў дакладнасці заяўленай мэты знаходжання».
Кейсы, калі заяўнікі нічога не разумеюць
Вось як пішуць пра такія кейсы ў чатах:
- Падаўся на польскую працоўную ў Магілёве — адмова, п. 10. Абскардзіў у консула — таксама адмова. На абскарджанне прынёс умову наймання мяшкання, ліст ад фірмы і дамову на навучанне ў паліцэялцы. Нічога не дапамагло. У Польшчы жыву і працую ўжо тры гады, усе падаткі плаціў, фірма з запрашэннем жывая, працую там ужо восем месяцаў. Падаўся на побыт, але там канца-краю не відаць, а мне з сямейных [абставін] трэба бываць у Беларусі. Хто сутыкаўся з падобнымі рэчамі, што рабіць, чаму яны лепяць адмовы?
- Сёння забраў пашпарт. Атрымаў адмову па працоўнай візе. Падача была 28 кастрычніка ў Гомелі. 10-ы пункт, стандарцік. У мяне першы раз адмова, ніколі такога не было.
- У мяне 8 адмоў, і 2 адмовы па апеляцыях, [так што] у цябе яшчэ ўсё добра.
Рэцэптаў на выпадак адмовы два: апеляцыя і новая падача. Пры гэтым удзельнікі чата схіляюцца да таго, што апеляваць да консула — марнае дзела: дорага (ад 1 чэрвеня гэта каштуе 135 еўра) і неэфектыўна. Лепш падацца зноўку — можна ў той жа ВЦ і з тымі ж дакументамі. Зэканоміць наўрад ці ўдасца (бо ў дадатак да 35 еўра консульскага збору прыйдзецца заплаціць пасярэдніку за новую дату), але шанцаў на поспех так нібыта больш. Такія назіранні пераконваюць удзельнікаў чата ў тым, што часцяком адмовы рандомныя.
- Бессэнсоўна падаваць апеляцыю. Толькі лішнія грошы выкінуць на вецер. Была я ўжо ў такой сітуацыі. Таксама 10 п. І па апеляцыі таксама адмова.
- Значыць, спрабуйце без апеляцыі. Зноў. Пакуль не атрымаеш візы.
- У апошнія пару месяцаў сапраўды шмат неабгрунтаваных адмоў.
…і калі яны здагадваюцца пра прычыны
Але бываюць і іншыя кейсы, калі заяўнікі разумеюць (або думаюць, што разумеюць) прычыну адмовы. Так, адна беларуска мяркуе, што не атрымала турыстычнай візы С (у матывацыі — п. 10), бо па папярэдняй польскай шэнгенскай візе ездзіла толькі ў Літву і ў пашпарце няма штампа аб перасячэнні польскай мяжы. План — падавацца праз іншую краіну.
Другая кажа, што пры першай падачы не прыклала гарантыйнага ліста ад працадаўцы. На яе думку, гэта і стала прычынай адмовы. Апеляцыю падаваць яна не мае намеру, будзе лавіць/купляць дату на новы візіт у ВЦ.
Трэцяя беларуска сцвярджае, што прычынай адмовы (таксама п. 10) была памылка ў дакуменце. Яна яе выправіла, падалася зноўку і цяпер чакае пашпарт.
Бывае, прэтэндэнтам адмаўляюць па п. 3 (недастаткова сродкаў). У выпадку з працоўнай візай гэта адбываецца, калі ў дамове прапісаная мінімальная зп і яе памер ужо састарэў (планку мінімальнай зп рэгулярна павышаюць).
Хтосьці з удзельнікаў чата спрабуе прымірыць два меркаванні — што адмовы спрэс нематываваныя і што ў вялікай колькасці адмоў ёсць прычыны:
— Вельмі шмат фактараў: як пустыя адмовы, так і абгрунтаваныя. Вельмі шмат левых запрашэнняў робяць, па іх адмоў больш за ўсё.