Jak u školnyja elektronnyja dziońniki trapiła rekłama piva? Źjaviłasia tłumačeńnie
Karystalniku, jaki niekali šukaŭ u internecie piva, kantekstnaja rekłama Jandeksa prapanavała jašče adzin baner ź pivam. A jon napisaŭ skarhu na školnyja dziońniki — što vinavatyja jany.
04.12.2024 / 10:11
Fota: AP Photo / Michal Dyjuk
Servis elektronnych dziońnikaŭ schools.by mohuć zakryć. Pakul MARH vynies papiaredžańnie TAA «Adukacyjnyja sistemy», ale paŭtornaje parušeńnie paciahnie bolš surjoznyja nastupstvy. Sprava — u rekłamie piva, jakaja raźmiaščałasia tam.
U schools.by patłumačyli, jak u servisie źjaviłasia rekłama piva.
«U vyniku techničnaj pamyłki na baku rekłamnaj sietki Jandeksa ŭ servisie schools.by časova źjaviŭsia baner z rekłamaj piva, što supiarečyć našym standartam i praviłam filtracyi kantentu. My nieadkładna pryniali miery dla ŭchileńnia hetaj situacyi, praviali ŭnutranuju pravierku i padali zacikaŭlenym orhanam usiu nieabchodnuju infarmacyju ab incydencie, jaki zdaryŭsia», — takoje paviedamleńnie źjaviłasia va ŭsich elektronnych dziońnikach, piša «Točka».
U toj ža čas, u schools.by dali zrazumieć, što ad rekłamy admovicca nie mohuć, bo heta kamiercyjny prajekt, i adnoj z krynic dachodu jakraz źjaŭlajecca banernaja rekłama, raźmieščanaja praź Jandeks.
Pry hetym servis, pryznačany ŭ tym liku i dla dziaciej, vykarystoŭvaje roznyja miechanizmy dla praduchileńnia niedapuščalnaha kantentu. Naprykład, siamiejnyja filtry, błakavańnie asobnych brendaŭ i h. d.
Incydent z rekłamaj piva staŭ nahodaj, kab jašče raz źviarnuć uvahu na achoŭnyja miechanizmy. Servis abiacaje, što buduć pryniaty dadatkovyja miery dla praduchileńnia takich niespadziavanak.
Raniej MARH papiaredziŭ TAA «Adukacyjnyja sistemy»: kali jašče raz budzie zafiksavany fakt nienaležnaj rekłamy, adpaviednyja materyjały nakirujuć u Ministerstva infarmacyi. Jano maje paŭnamoctvy abmiažoŭvać dostup da internet-resursaŭ.
U listapadzie 2022 hoda, płatforma schools.by užo była abvinavačanaja ŭ raźmiaščeńni nienaležnaj rekłamy.