«Budu zmahacca da kanca». Prezident Paŭdniovaj Karei adchiliŭ abvinavačvańni ŭ miaciažy
Jun Sok Jol vystupiŭ z novym telezvarotam, u jakim zajaviŭ, što ŭviadzieńnie vajennaha stanovišča na minułym tydni było pravilnym rašeńniem, i adchiliŭ abvinavačvańni ŭ miaciažy, piša Bi-bi-si.
12.12.2024 / 07:37
U doŭhaj pramovie Jun vykłaŭ svaje mierkavańni nakont pryniataha rašeńnia i skazaŭ, što vykarystaŭ prezidenckija paŭnamoctvy, kab abviaścić vajennaje stanovišča «dla abarony nacyi i narmalizacyi dziaržaŭnych spraŭ» suprać apazicyi, jakaja paralizavała pracu ŭrada, nazvaŭšy heta «hłyboka vyvieranym palityčnym rašeńniem».
Jon taksama adchiliŭ zakliki pajści ŭ adstaŭku i paabiacaŭ zmahacca da kanca, abvinavaciŭšy apazicyju ŭ tym, što jana «złoŭžyvaje impičmientami».
«Niezaležna ad taho, ci budzie mnie abvieščany impičmient ci ja apynusia pad śledstvam, ja budu sumlenna supraćstajać hetamu», — cytuje jaho ahienctva Yonhap.
Pierad pramovaj prezidenta lidar kiroŭnaj partyi «Siła naroda» Chan Don Chun vykazaŭsia ŭ padtrymku impičmientu, choć raniej vystupaŭ suprać jaho.
Mienavita praz pazicyju kiroŭnaj partyi parłamient nie zmoh abviaścić impičmient Junu ŭ vychodnyja. Čarhovaje hałasavańnie adbudziecca ŭ subotu.
«My pavinny spynić dalejšuju błytaninu. Ciapier jość tolki adzin efiektyŭny mietad, — skazaŭ Chan Don Chun na pres-kanfierencyi. — Pry nastupnym hałasavańni zakanadaŭcy ad našaj partyi pavinny ŭvajści ŭ zału pasiadžeńniaŭ i pryniać u im udzieł, kirujučysia svaimi pierakanańniami i sumleńniem».
Na pytańnie, ci padtrymlivaje jon impičmient, Chan adkazaŭ: «Tak», dadaŭšy, što inšaha šlachu niama.
Paŭdniovakarejskamu lidaru zabaroniena pakidać krainu, a rasśledavańnie padziej minułaha tydnia, jakoje viadzie niekalki viedamstvaŭ, imkliva nabiraje chod: u sieradu palicyja sprabavała pravieści pieratrus u prezidenckim ofisie, adnak achova jaje nie puściła.
U vyniku, jak paviedamlałasia, ofis prezidenta dobraachvotna pieradaŭ abmiežavany nabor dakumientaŭ.