U ZŠA znajšli 12 kasiet ź niavydadzienymi zapisami Majkła Džeksana
Znachodka ŭ Kalifornii — dobraja navina dla prychilnikaŭ Majkła Džeksana. Na zakinutym składzie znajšli 12 kasiet ź niavydadzienymi zapisami karala pop-muzyki, paviedamlaje The Hollywood Reporter.
14.12.2024 / 19:42
Majkł Džeksan. Fota: Getty Image
Kalekcyja była znojdziena na zakinutym składzie ŭ dalinie San-Fiernanda, jaki raniej naležaŭ muzyčnamu pradziusaru i śpievaku Brajanu Łoranu. Pra znachodku paviedamiŭ žychar štata Kalifornija, były palicejski Hreh Mashroŭv, jaki daviedaŭsia pra skład ad svajho znajomaha, što nabyŭ pamiaškańnie.
«Ja naviedaŭ usie fanackija sajty. Chodziać čutki, što niekatoryja z hetych piesień pratačylisia ŭ sieciva. Para ź ich navat pabačyła śviet», — adznačaje jon.
Zapisy datujucca pieryjadam z 1989 pa 1991 hod, kali Džeksan pracavaŭ nad materyjałam dla svajho alboma Dangerous (1991). Usiaho na plonkach 15 trekaŭ, 12 ź jakich całkam zavieršanyja.
Adnoj z samych zachaplalnych znachodak źjaŭlajecca pieśnia Don't Believe It («Nie vier hetamu»), jakaja, vierahodna, źjaŭlajecca adkazam na čutki pra śpievaka, jakija raspaŭsiudžvalisia ŭ ŚMI ŭ 1990-ch.
Taksama siarod trekaŭ — kampazicyja Truth on Youth, na jakoj Džeksan čytaje rep razam z vykanaŭcam LL Cool J. Nazvy niekatorych inšych piesień: Seven Digits, Son of Thriller, All The Truth You Need, Man In Black, Canʼt Come Back.
Na adnu ź plonak trapiŭ zapis hutarki Džeksana i, jak miarkujecca, Łorana.
«Ja słuchaju heta, i ŭ mianie muraški pa skury, tamu što nichto nikoli hetaha nie čuŭ, − pryznajecca Mashroŭv. — Pačuć, jak Majkł Džeksan u rečaisnaści razmaŭlaje i žartuje, było vielmi kruta».
Mashroŭv sprabavaŭ prapanavać znojdzienyja kasiety ŭładalnikam aŭtarskich pravoŭ na muzyku Džeksana, adnak, pavodle jaho słoŭ, jany admovilisia ad pakupki.
U aficyjnym liście, jaki siamja Džeksanaŭ dała byłomu palicejskamu, havorycca, što spadčyńniki nie pretendujuć na kasiety. Ale pry hetym jany dali zrazumieć, što luby ŭładalnik plonak nie zmoža atrymać aŭtarskija pravy na hetyja kampazicyi. Z čaho vynikaje, što hetyja pieśni naŭrad ci zmohuć być aficyjna apublikavanyja, robić vysnovu The Hollywood Reporter.
Ciapier Makshroŭv płanuje prapanavać kalekcyju na prodaž čatyrom bujnym aŭkcyjonnym damam.
Pamior lehiendarny kampazitar i pradziusar Kvinsi Džons
Pamior brat Majkła Džeksana, udzielnik hurta Jackson 5
Parašenka pierabłytaŭ amierykanskaha palityka Majka Džonsana sa śpievakom Majkłam Džeksanam
Tejłar Śvift pabiła rekord Majkła Džeksana