Муж палітзняволенай журналісткі Слаўнікавай дзякуе Лукашэнку і крытыкуе Ціханоўскую
Аляксандр Лойка выйшаў на свабоду пасля 45 сутак, яго жонцы, кіраўніцы прадстаўніцтва «Белсата» ў Мінску, прысудзілі 5 гадоў калоніі.
20.12.2024 / 10:09
Аляксандр Лойка і Ірына Слаўнікава.
Аляксандр Лойка — адзін з сузаснавальнікаў Асацыяцыі родных і былых палітвязняў FreeBelarusPrisoners — расказаў «Люстэрку» сваё бачанне сітуацыі з палітзняволенымі.
Апроч яго, у гэту ініцыятыву ўваходзяць Таццяна Хоміч (сястра Марыі Калеснікавай), Светлана Мацкевіч (былая жонка філосафа Уладзіміра Мацкевіча), а таксама Вольга Івашына (жонка журналіста Дзяніса Івашына).
Лойка лічыць, што цяперашняя стратэгія Захаду і Святланы Ціханоўскай няправільная. Ён перакананы, што беларускія ўлады заўсёды былі гатовыя ісці на кантакт. «Але яны хочуць размаўляць не праз плот», — адзначае Лойка.
У якасці магчымых крокаў насустрач Лукашэнку, якія мог бы зрабіць Захад, называюцца прыезд у Еўропу якога-небудзь беларускага чыноўніка высокага ўзроўню, а таксама візіт у Беларусь прадстаўнікоў Захаду. Таксама ён агучыў прапанову абмяняць санкцыі на «Белавія» на 500 палітвязняў.
«Можна знайсці якіх-небудзь медыятараў, якія змогуць паспрыяць. Дапусцім, я ведаю, што ў перагаворных працэсах ва Украіне медыятарамі выступалі алігархі. Медыятарамі ў Беларусі маглі б быць людзі ад бізнэсу, якія знаходзяцца на высокім узроўні. Або дзяржава-пасрэднік — дапусцім, Турцыя. Альбо яшчэ гэта можа быць які-небудзь палітык, які ўжо не з’яўляецца дзейным, але мае павагу ў грамадстве. Напрыклад, экс-канцлер Германіі Ангела Меркель. Да яе думкі прыслухоўваюцца».
Лойка прызнаецца, што размаўляў са Святланай Ціханоўскай адзін раз, у канцы 2022 года. Але яму «гэтага было дастаткова і зразумела».
«Яна вельмі агрэсіўна да нас адносіцца. Ёй не падабаецца нейкая крытыка, іншае бачанне. І ўвогуле, у Офісе, насамрэч, пачынаюць неяк зрушвацца ў бок такога ж дыктату і таталітарызму, які існуе ў Беларусі. Калі нешта не па іх меркаванні, не па іх жаданні ці бачанні — значыць, да пабачэння. Будуць ставіць палкі ў колы і не даваць прасоўваць нейкія свае ідэі», — наракае Лойка.
Затое хваліць Аляксандра Лукашэнку і камісію па памілаванні генеральнага пракурора Андрэя Шведа:
«Я выказваю падзяку Аляксандру Лукашэнку за тое, што ён працягвае падпісваць указы аб памілаванні людзей. Хаця, у прынцыпе, ён нічога зараз пакуль узамен не атрымлівае. Але гэта вельмі важны крок.
Камісія па памілаванні таксама робіць сваю працу. Ніхто на іх асабліва не ўплывае. Зразумелая справа, іх абвінавачваюць у тым, што «самі арыштавалі — самі памілавалі». Але калі б яны гэтым не займаліся, дык людзі б не выходзілі».
«Вось гэта добры знак», — адгукнуўся на інтэрв’ю прапагандыст Ігар Тур.