Biełarusy viartajucca ź Jeŭropy i sutkami stajać na miažy, kiłamietrovyja čerhi
Pierad navahodnimi śviatami na ŭjezd u Biełaruś ź Jeŭropy ŭtvarylisia vielizarnyja čerhi pierad usimi punktami propusku. Najbolš składanaja situacyja na miažy z Polščaj.
21.12.2024 / 20:22
Čarha z aŭtobusaŭ na biełaruska-polskaj miažy. Fota: telehram-čata t.me/granica_bypl
Polšča
Čarha ź lehkavikoŭ na ŭjeździe ŭ Biełaruś z Polščy pa stanie na 17 hadzin suboty raściahnułasia pryblizna na 9,5 kiłamietra.
Fota: skrynšot z telehram-čata t.me/granica_bypl, kałaž «Naša Niva»
Niekatoryja navat vyličvajuć siaredniuju chutkaść, ź jakoj ruchajecca čarha. Kali taki padlik słušny, to tym, chto ciapier stanovicca ŭ kalejku, daviadziecca pravieści ŭ čakańni kala troch sutak.
Ludzi, jakija stali ŭ čarhu daŭžynioj 5,3 kiłamietra, adpisvali ŭ čacie, što praz 33 hadziny prasoŭvańnia im zastavałasia 800 mietraŭ da zajezdu ŭ punkt propusku z polskaha boku.
Inšyja dadajuć, što za 24 hadziny prajechali roŭna pałovu adlehłaści da pahranpierachoda.
Fota: skrynšot z telehram-čata t.me/granica_bypl
U druhoj pałovie dnia 21 śniežnia z Polščy ŭ Biełaruś ujazdžali tyja, chto staŭ u čarhu poźnim viečaram 19 śniežnia. Prachodžańnie miažy ŭ ich zaniało 37 hadzin. Rekordnym pakazčykam, jakimi ludzi dzialilisia ŭ čatach, było 40 hadzin i 40 chvilin.
Fota: skrynšot z telehram-čata t.me/granica_bypl
A voś na vyjezd ź Biełarusi ŭ ES čarhi ź lehkavych mašyn, možna skazać, niama. Pa stanie na 16 hadzin tolki ŭ punkcie propusku «Brest» było 10 mašyn u čarzie.
Situacyja z aŭtobusami taksama składanaja. Pa stanie na 17 hadzin suboty naličvajecca kala 45-50 aŭtobusaŭ, jakija nakiroŭvajucca z Polščy ŭ Biełaruś. Ranicaj było kala 30-35 aŭtobusaŭ.
Ludzi, jakija ŭčora vyjechali aŭtobusam z Varšavy a 12-j dnia, trapili ŭ Biełaruś tolki ŭ 10:30 nastupnaha dnia.
Ciapier, kali nie pierasadžvacca ŭ aŭtobusy, jakija stajać bližej da šłahbauma, to tolki ŭ čarzie daviadziecca pravieści kala sutak. Kali atrymlivajecca padsieści ŭ pieršy aŭtobus, to samo prachodžańnie miažy zajmaje kala 12 hadzin — tak učora pisali ŭ čatach.
Fota: skrynšot z telehram-čata t.me/granica_bypl
Ale vyhladaje, što situacyja z padsadkaj pahoršyłasia. Adna z karystalnic padzialiłasia, što ŭ pieršych 25 aŭtobusach ad šłahbauma volnych miescaŭ užo niama.
Litva. «Kamienny Łoh»
Pierad śviatami čerhi ź lehkavikoŭ viarnulisia i na litoŭska-biełaruskuju miažu.
Aŭtobusy ŭ punkcie propusku «Kamienny Łoh» prachodziać miažu pryblizna za 9 hadzin.
Čarha na vyjezd ź Litvy ŭ Biełaruś u hetym punkcie propusku pa stanie na 16:30 raściahnułasia na 3,5 kiłamietra. U čatach pišuć, što heta kala 450 lehkavikoŭ.
Fota: skrynšot z telehram-čata t.me/granica_bypl
Ludzi spravazdačacca, što na toje, kab tolki dajechać z kanca čarhi da šłahbauma na litoŭskim baku, u ich pajšli roŭna sutki. I heta pry ŭmovie, što čarha na toj momant była kala 2 kiłamietraŭ.
Litva. «Bieniakoni»
Aŭtobusy praz «Bieniakoni» prajazdžajuć chutčej, čym u «Kamiennym Łozie». Na prachod miažy 21 śniežnia prachodzić kala 3 hadzin.
Fota: skrynšot z telehram-čata t.me/granica_bypl
Čarha ź lehkavikoŭ ź Litvy ŭ Biełaruś u «Bieniakoniach» a 17-j hadzinie składała 3,4 kiłamietra, choć jašče a 5-j ranicy była 2,5 km.
Ludzi, jakija ŭčora a 14-j stali ŭ čarhu pryblizna 210-j mašynaj, dabralisia da šłahbauma ź litoŭskaha boku tolki praz 10 hadzin. Inšyja karystalniki dadajuć, što pryblizna stolki ž daviadziecca pravieści ŭnutry punktu propusku. Takim čynam atrymlivajecca, što prajezd miažy zajmaje kala 20 hadzin.
Łatvija
Najmienšyja čerhi na miažy z Łatvijaj, bo praź jaje nielha jechać na aŭto ź biełaruskaj rehistracyjaj. Dniom u «Hryharoŭščynie» naličvałasia kala 200 mašyn (kala 1,5 km), jakija stajali ŭ čarzie na vyjezd z Łatvii ŭ Biełaruś.