Raskryta žorstkaje zabojstva 1997 hoda ŭ Homieli, kali aŭtamatam rasstralali siamju z 4-hadovym synam
Na vačach u žonki i 4-hadovaha dziciaci złačyncy zabili 29-hadovaha baćku, a potym abmatali skotčam tvar žonki i zrabili nie mienš za 10 strełaŭ u žančynu i małaletniaha chłopčyka.
23.12.2024 / 10:28
Jak raspaviała Hienprakuratura, im udałosia pryciahnuć da adkaznaści mužčynu, jaki ŭ składzie bandy ździejśniŭ zabojstva ŭ Homieli bolš za 25 hadoŭ tamu. U 1997 hodzie tam była zabita siamja z troch čałaviek, u tym liku małaletniaje dzicia.
Jak ustanoŭlena, vosieńniu 1997 hoda paciarpieły raspavioŭ abvinavačanamu, što ŭdzielničaŭ u arhanizacyi finansavaj piramidy i atrymaŭ dachod u valucie, a taksama juvielirnymi ŭpryhažeńniami.
Jak piša Hienprakuratura, abvinavačany z metaj napadu na jaho siamju i inšych hramadzian stvaryŭ arhanizavanuju złačynnuju hrupu, kudy ŭvajšli jašče dvoje mužčyn.
Dalej jon raspracavaŭ płan i raźmierkavaŭ roli pamiž saŭdzielnikami. Zahadzia nabyŭ bajavuju aŭtamatyčnuju ahniastrelnuju zbroju — aŭtamat Kałašnikava.
Dziejničajučy pa raspracavanym płanie, abvinavačany zahadzia damoviŭsia ab sustrečy z 29-hadovym paciarpiełym.
Uviečary 4 śniežnia 1997 hoda haspadar, ničoha nie padazrajučy, adkryŭ dźviery złačynnaj hrupie.
Zatym zabojca na vačach u žonki i 4-hadovaha dziciaci zrabiŭ nie mienš za čatyry streły ŭ hałavu haspadaru kvatery. U hety čas dvoje inšych saŭdzielnikaŭ abmatali skotčam tvar žonki. Paśla čaho zrabili nie mienš za 10 strełaŭ u žančynu i małaletniaha chłopčyka.
Zhodna z zaklučeńniami sudova-miedycynskaha ekśpierta śmierć mužčyny nastupiła ad skraznoha ahniastrelnaha kulavoha ranieńnia hałavy, žančyny i dziciaci — u vyniku množnych skraznych ahniastrelnych kulavych ranieńniaŭ hrudziej i žyvata.
Dalej abvinavačany sumiesna ź inšymi ŭdzielnikami złačynnaj hrupy zavałodaŭ juvielirnymi ŭpryhažeńniami i hrašyma zabitaj siamji ŭ sumie bolš za 145 młn biełaruskich rubloŭ. Pa jakim heta kursie, śledstva nie ŭdakładniaje.
Jak vyjšli na złačyncu
Padčas stralby aŭtamatny zatvor mocna traŭmavaŭ ruku adnaho z saŭdzielnikaŭ — jaho kroŭ zastałasia na leśvičnaj placoŭcy kala kvatery zabitych.
U 2021 hodzie stała viadoma, što padazravany mužčyna na terytoryi Rasijskaj Fiederacyi zabiŭ jašče dvuch čałaviek i adbyvaŭ pakarańnie ŭ lačebna-prafiłaktyčnaj ustanovie.
Hienieralnaja prakuratura Respubliki Biełaruś nakiravała materyjały kryminalnaj spravy rasijskim kaleham dla arhanizacyi kryminalnaha pieraśledu.
Pryhavoram Kastryčnickaha rajonnaha suda h. Krasnadara abvinavačany pryznany vinavatym u zabojstvie. Pa sukupnaści złačynstvaŭ jamu pryznačana 25 hadoŭ papraŭčaj kałonii va ŭmovach strohaha režymu.